ރައީސް ޑރ. މުޢިއްޒު ސްރީލަންކާއަށް ކުރެއްވި ރަސްމީ ދަތުރުފުޅު ނިންމަވައި މާލެ ވަޑައިގެންފި

ސްރީލަންކާގެ ރައީސް އަނޫރާ ކުމާރާ ދިސާނާޔަކަގެ ދައުވަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ސްރީލަންކާއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށް ފަހު މާލެ ވަޑައިގެންފިއެވެ.

މެއި 3 އިން 6 އަށް ކުރެއްވި މި ދަތުރުފުޅުގައި ރައީސް ޑރ. މުޢިއްޒު ވަނީ ސްރީލަންކާގެ ރައީސް ދިސާނާޔަކައާ ރަސްމީ މަޝްވަރާތައް ބާއްވަވައިފައެވެ.

ރައީސް އޮފީހުން ހާމަކުރި ގޮތުގައި މި މަޝްވަރާތައް އަމާޒުކުރެއްވީ ދެ ޤައުމުގެ ދެމެދުގައި ޒަމާނުއްސުރެ އޮތް ގުޅުން އިތުރަށް ބަދަހިކުރެއްވުމަށާއި އެއްބާރުލުމުގެ އާ ދާއިރާތައް ހޯއްދެވުމަށެވެ. ދެ ބޭފުޅުން ވަނީ ޒުވާނުންގެ ތަރައްޤީ، އާކައިވިން، ފަތުރުވެރިކަން، ހައްދުފަހަނައެޅުން ހުއްޓުވުން، ދިފާޢީ އަދި ޞިއްޙީ ދާއިރާއިން ޢިލްމީ އެއްބާރުލުން، އަދި ސްކޫލް ޓީޗަރުން ތަމްރީނުކުރުން ހިމެނޭ ގޮތަށް ގިނަ ދާއިރާތަކުން ފަހުމުނާމާތައް ބަދަލުކުރައްވައިފައެވެ.

ދެ ޤައުމުގެ ޑިޕްލޮމެޓިކް ގުޅުމަށް 60 އަހަރު ފުރުން ފާހަގަކުރެއްވުމުގެ ގޮތުން ދެ ރައީސުން ވަނީ ވިހާރަ މަހާދޭވީ ޕާކުގައި ގަސް އިންދެވުމުގެ ރަސްމިއްޔާތެއްގައި ބައިވެރިވެވަޑައިގެންފައެވެ.

ދަތުރުފުޅުގެ ތެރެއިން ސްރީލަންކާގެ ބޮޑުވަޒީރު ޑރ. ހަރިނީ އަމަރަސޫރިޔާ އާއި ޕާލިމެންޓުގެ ރައީސް ޑރ. ޖަގަތް ވިކްރަމަރަތުނެ އާއި ޚާރިޖީ ވަޒީރު ވިޖިތާ ހެރަތް ވެސް ވަނީ ރައީސް ޑރ. މުޢިއްޒުގެ އަރިހަށް އިޙްތިރާމުގެ ޒިޔާރަތް ކުރައްވައިފައެވެ.

މީގެ އިތުރުން ރައީސް ވަނީ މޯލްޑިވްސް-ސްރީލަންކާ ބިޒްނަސް ފޯރަމްގައި ތަޤްރީރު ކުރައްވައި ސްރީލަންކާގެ އިންވެސްޓަރުން ބައިވެރިވެވަޑައިގަތުމަށް ހިތްވަރު ދެއްވައިފައެވެ. އަދި މިފްކޯގެ އުފެއްދުންތައް ސްރީލަންކާގައި ލޯންޗުކުރެއްވުމުގެ ރަސްމިއްޔާތުގައި ވެސް ބައިވެރިވެވަޑައިގެންނެވިއެވެ.

އެމަނިކުފާނުގެ އަނބިކަނބަލުން ސާޖިދާ މުޙައްމަދު ވަނީ ލޭޑީ ރިޖްވ ހޮސްޕިޓަލް ފޯ ޗިލްޑްރެންއަށް ޒިޔާރަތްކުރައްވައި ބަލި މީހުންނާ ބައްދަލުކުރައްވައިފައެވެ. އަދި އަންހެނުން ހިންގާ ވިޔަފާރިތައް ދައްކައިދޭ ގުޑް މާކެޓް ސްރީލަންކާ އޮފީހަށް ވެސް ޒިޔާރަތްކުރެއްވިއެވެ. ރައީސް އަދި ފަސްޓް ލޭޑީ ވަނީ ކޮލޮމްބޯގައި ދިރިއުޅޭ ދިވެހިންނާ ވެސް ބައްދަލުކުރައްވައިފައެވެ.

މިއީ 2023 ވަނަ އަހަރުގެ ނޮވެމްބަރުގައި ރައީސް ޑރ. މުޢިއްޒު މަޤާމާ ހަވާލުވެވަޑައިގެންނެވި ފަހުން ސްރީލަންކާއަށް ކުރެއްވި ފުރަތަމަ ރަސްމީ ދަތުރުފުޅެވެ. ސްރީލަންކާގެ ރައީސް ދިސާނާޔަކަ ވަނީ 2025 ވަނަ އަހަރުގެ ޖުލައި 28 އިން 30 އަށް ރާއްޖެއަށް ރަސްމީ ދަތުރުފުޅެއް ކުރައްވައިފައެވެ.

ވަޒީރުންނާއި ސަރުކާރުގެ އިސް ބޭފުޅުން ހިމެނޭ މަތީ ފެންވަރުގެ ވަފުދެއް ރައީސްގެ މި ދަތުރުފުޅުގައި ބައިވެރިވެވަޑައިގެންނެވިއެވެ.