ގޮނޑި ގެއްލޭ މައްސަލަ: އަލީ އެދުނު ވަގުތީ އަމުރެއް ނުދިން

ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހަށް އަމަލުކުރުން މަޑުޖައްސާލައި އެފަދަ އެއްވެސް އިޖުރާތެއް ކުރިއަށް ނުގެންދަން އަމުރުކޮށްދިނުމަށް އެދި ހުށައަޅާފައިވާ ހުށައެޅުމާމެދު ގޮތް ނިންމައިފި އެވެ.

ސަރުކާރުގެ ފަރާތުން ގާނޫނު އަސާސީއަށް ހުށަހެޅުނު މި އިސްލާހު ރައްޔިތުންގެ މަޖިލީހުން ފާސްކޮށް ތަސްދީގުކުރީ މިދިޔަ އަހަރުގެ ނޮވެމްބަރު މަހުގެ 20 ވަނަ ދުވަހު އެވެ. އެކަމާއި ގުޅިގެން ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ސްޕްރީމް ކޯޓަށް މައްސަލައެއް ހުށަހެޅުއްވީ ނޮވެމްބަރު މަހުގެ 24 ވަނަ ދުވަހުއެވެ.

އެ މައްސަލާގައި އަލީ ހުސައިން ވިދާޅުވެފައިވާ ގޮތުގައި، ރާއްޖޭގެ ޖުމްހޫރިއްޔާގެ ގާނޫނުއަސާސީއަށް 6 ވަނަ އިސްލާހު ގެނެސްފައިވަނީ ގާނޫނުއަސާސީގެ 4، 8، 26، 75 އަދި 90 ވަނަ މާއްދާއާހިލާފަށް އަދި ގާނޫނުއަސާސީގެ އަސާސީ އޮނިގަނޑާވެސް ހިލާފަށް ކަމަށެވެ.

އަދި އޭނާ ވަނީ ސުޕްރީމް ކޯޓަށް ހުށަހަޅާފައިވާ މައްސަލަ ކޯޓުން ނިންމުމުގެ ކުރިން ރައްޔިތުންގެ މަޖިލީހުގެ އެއްވެސް މެންބަރެއްގެ މަގާމުން ވަކިކުރުމާބެހޭ އެއްވެސް އިޖުރާއަތެއް ނުހިންގުމަށް އަމުރުކޮށްދީ ވަގުތީ އަމުރެއް ނެރެދިނުމަށް އެދި ހުށައަޅާފަ އެވެ.

އެ މައްސަލާގައި ކޯޓުން މިއަދު ގޮތް ނިންމާފައިވާއިރު އެ ކޯޓުން ނިންމީ އެފަދަ އަމުރެއް ނެރެދެވެން ނެތް ކަމަށެވެ. ހަތް ފަނޑިޔާރުން ސޮއިކޮށް ނެރެފައިވާ ނިންމުމުގައި ވަނީ އެފަދަ ވަގުތީ އަމުރެއް ނެރުމުގެ ނަތީޖާއަކީ މި މައްސަލާގައި މައުޟޫއީ ގޮތުން ކަނޑައަޅަން ޖެހޭ ނުކުތއަކަށް އަސަރުކުރުން ކަމަށް ބުރަވެވޭތީވެ އެފަދަ އަމުރެއް ނެރެެދެވޭނެ ތަނެއް ނެތް ކަމަށް ސުޕްރީމް ކޯޓްގެ ފަނޑިޔާރުންގެ އިއްތިފާގުން ކަނޑައަޅާ ކަމަށެވެ.