މުޒާހަރާތަކަށްފަހު، ނޭޕާލް އާދައިގެ ހާލަތަށް

ނޭޕާލުގެ ވެރިރަށް ކަތަމަންޑޫގައި ޖެންޒީން ކުރިއަށްގެންދިޔަ ވަރުގަދަ މުޒާހަރާތަކަށްފަހު ކަތަމަންޑޫގެ ހާލަތު ހަމަޔަކަށް އެޅެން ފަށައިފިއެވެ.

ޖެންޒީން ކުރިއަށްގެންދިޔަ މުޒާހަރާތަކަށްފަހު އެޤައުމުގެ ބޮޑުވަޒީރަކަށް ހުރި ކޭޕީ ޝަރްމާ އިސްތިއުފާދެއްވިއިރު، އިއްޔެ ވަނީ އައު އެޤައުމުގެ ކަންކަން ކުރިއަށްގެންދިއުމަށް އައު ބޮޑުވަޒީރަކު އިންތިހާބުކޮށްފައެވެ.

ނޭޕާލްގެ ވަގުތީ ބޮޑުވަޒީރަކަށް އައްޔަނުކޮށްފައިވަނީ ކުރީގެ އުއްތަމަ ފަނޑިޔާރު ސުޝިލާ ކަރްކީއެވެ. އެކަމަނާ ބޮޑުވަޒީރުކަމަށް އައްޔަނުކޮށްފައިވަނީ ގިނަ އަދަދެއްގެ ރައްޔިތުން އެކަމަށް އެދިފައިވަނިކޮށެވެ. އެއާއެކު ސުޝީލާ ހިމެނެނީ ނޭޕާލްގެ ފުރަތަމަ އަންހެން ބޮޑުވަޒީރަށެވެ.

ކަތަމަންޑޫގެ މިހާރުގެ ހާލަތަށް ބަލާއިރު، އައު ބޮޑުވަޒީރު އިންތިހާބުކުރުމާއެކު ކުރިން ކަތަމަންޑޫގެ މަގުތަކުން ފެނިގެންދިޔަ ޖެންޒީންގެ މުޒާހަރާތައް ހުއްޓާލައި، ގިނަ މީހުން މިހާރު އުޅެނީ މަގުތައް ސާފްކުރުމާއި ސަލާމަތީ ބާރުތަކަށް އެހީތެރިވުމުގައެވެ. މަޝްރަހަށް ބަލައި ގިނަ ހިސާބުތަކުން ކާފިއުގެ ހާލަތު ނަގާފައިވާއިރު، ކަތަމަންޑޫގެ މަގުތައް މިހާރު ފެންނަނީ އާދައިގެ ހާލަތެވެ. އެގޮތުން މީހުން ދަތުރުފަތުރުކުރަން ނިކުތުމާއި، ގިނަ އޮފީސްތަކަކުން ވަނީ ހިދުމަތްތައް ދޭން ފަށާފައެވެ.

ކަތަމަންޑޫ ބައިނަލްއަޤްވާމީ ވައިގެ ބަނދަރުގެ ހިދުމަތް ފަށާފައިވައިރު، ޓްރެވަލް އޭޖެންޓުން ވަނީ ފަތުރުވެރިން ނޭޕާލަށް ޒިޔާރަތްކޮށް ކަތަމަންޑޫއަށް އައުމުގައި މިހާރު ނުރައްކާތެރިކަމެއް ނެތް ބުނެފައެވެ.

ޖެންޒީން ނޭޕާލްގެ މަގުތަކަށް ނިކުމެ، މުޒާހަރާތައް ފަށާފައިވަނީ މިމަހުގެ 8 ވަނަ ދުވަހުއެވެ. މުޒާހަރާތައް އެންމެ ހޫނުވެ ހަމަނުޖެހުމަކަށް ގޮސްފައިވަނީ މިދިޔަ އަންގާރަދުވަހެވެ. އެދުވަހު ހިނގާދިޔަ ހަމަނުޖެހުންތަކުގައި ސަރުކާރުގެ އިސްވެރިންގެ ގެކޮޅަށްވަދެ ހުޅުޖަހައި ބައެއް ވަޒީރުން ވަނީ ގަންހިންގުވާފައެވެ. އެދުވަހުގެ މުޒާހަރާތަކުގައި ފުލުހުންނާ ޖެންޒީންގެ ގްރޫޕްތަކާ ދެމެދު ހިނގި ހަމަނުޖެހުން ބޮޑުވެ، ބައެއް މީހުންގެ ފުރާނަ ގެއްލި ސަރުކާރުގެ އިމާރާތްތަކަށް ބޮޑެތި ގެއްލުންތަކެއް ލިބުމުން ބޮޑުވަޒީރު ކޭޕީ ޝަރުމާ ވަނީ މަގާމުން އިސްތިއުފާދެއްވާފައެވެ.

ނޭޕާލްގެ ޖެންޒީން މުޒާހަރާއަށް ނިކުމެފައިވަނީ، ސަރުކާރުން ސޯޝަލް މީޑިއާ މަނާކުރުމަށް ނިންމުމާއި، ސަރުކާރުގެ ބައެއް ވެރިން އިންތިހާއަށް ކޮރަޕްޓްވަމުންދާކަމަށް ބުނެއެވެ.