އާސަންދައިގެ ބަޖެޓުން 60 އިންސައްތައަށް ވުރެ ބޮޑު ބައެއް ފާމަސީތަކަށް
މިދިޔަ އަހަރު އާސަންދަ ސްކީމުގެ ބަޖެޓުން އެންމެ ބޮޑު ޚަރަދެއް ހިނގީ ފާމަސީތަކުގެ ބިލްތައް ދެއްކުމަށް ކަމަށް އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅު ދައްކަވަމުން ޒީނިޔާ ވިދާޅުވީ, އާސަންދައިގެ ބަޖެޓުން ބޭސްފަރުވާ އަށް ކުރާ ޚަރަދު އަހަރުން އަހަރަށް މަތިވަމުންދާ ކަމަށެވެ.
"ޕޭބަލް މި އިންނަނީ ސަރުކާރުގެ ސެކްޓަރ އަކަށް ޕޭއައުޓް އެއް ނުކުރާނެ. ޕްރައިވެޓް ސެކްޓަރ އަށް އެކަނި ޕޭ ކުރަން ޖެހެނީ. އަޅުގަނޑުމެންގެ ޕޭބަލްގެ، ގާތްގަނޑަކަށް މިދިޔަ އަހަރުވެސް 60 ޕަސެންޓަށްވުރެ މަތިން ހުރީ ފާމަސީތަކަށް އެންމެ ބޮޑު ޚަރަދެއް ކުރެވިފައި " ޒީނީޔާ ވިދާޅުވިއެވެ.
ފާމަސީތަކަށް ފަހު ދެން އެންމެ ބޮޑު ހޭދައެއް ކުރަން ޖެހެނީ އަމިއްލަ ކްލިނިކްތަކާއި ހޮސްޕިޓަލްތަކަށް ކަމަށް ޒީނިޔާ ފާހަގަކުރެއްވިއެވެ. އޭގެ އިތުރުން ރާއްޖެއިން ބޭރުގައި އާސަންދައިގެ ޚިދުމަތް ދޭ ހޮސްޕިޓަލްތަކަށް ވެސް ބޮޑު ޢަދަދެއް ދައްކަން ޖެހޭ ކަމަށް ޒީނިޔާ ވިދާޅުވިއެވެ.
ޒީނިޔާ އިތުރަށް ވިދާޅުވީ، އާސަންދަ ސްކީމުގެ ދަށުން ރާއްޖެއިން ބޭރުގައި ފަރުވާ ދިނުމަށް މިހާރުވެސް 57 ހޮސްޕިޓަލަކާއެކު އެއްބަސްވުމުގައި ސޮއި ކޮށްފައިވާ ކަމަށެވެ. އޭގެ ތެރޭގައި، އިންޑިޔާ، ސްރީލަންކާ، ތައިލެންޑް އަދި ޔޫއޭއީ ހިމެނޭ ކަމަށް ވިދާޅުވިއެވެ. އަދި އާސަންދައިގެ ދަށުން ޚިދުމަތް ފޯރުކޮށްދޭ ގިނަ ހޮސްޕިޓަލްތައް ހުރީ އިންޑިއާގައިކަންވެސް ފާހަގަކުރެއްވިއެވެ.
"އެންމެ ފަހުގެ ޚިދުމަތްތައް ދެވޭ ކަހަލަ ތަންތަން ބަލާފައި މި އެއްބަސްވުންތައް ހަދަނީ. ކޮލިޓީއަށާއި އެފޯޑަބަލް ޕްރައިޒްތަކަށްވެސް ބަލަން. ޕެކޭޖް ޕްރައިޒްތަކާއެކު އެއްބަސްންތައް ހަދަނީ." ޒީނީޔާ ވިދާޅުވިއެވެ.
އާސަންދަ ސްކީމުގެ ދަށުން ރައްޔިތުންނަށް ބޭސްފަރުވާ ފޯރުކޮށްދިނުމަށް ކުރާ ޚަރަދު އެއް އަހަރުން އަނެއް އަހަރަށް އިތުރުވަމުން އަންނަ ކަމަށް އާސަންދަ ކުންފުނިން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
