ކިނޮޅަހުގެ އީދު ފޯރި މި އަހަރުވެސް ދީނީ ތަރަހައިގެ ތެރެއިން

ރައްޔިތުންގެ މެދުގައި އޮތް ބަދަހި ގުޅުމާއި، އިސްލާމީ ރިވެތި އުސޫލުތަކުގެ މަތީގައި ފާހަގަކުރަމުންދާ ރ. ކިނޮޅަހުގެ އަޟުހާ އީދުގެ ހަރަކާތްތައް މި އަހަރުވެސް ދީނީ ތަރަހައިގެ ތެރެއިން ކުރިއަށް ގެންދިއުމަށް އެ ރަށުން ތައްޔާރުވެއްޖެއެވެ.

މިއީ މިއުޒިކާއި، ބޮޑުބެރާއި، ދެ ޖިންސު މަސްހުނިވުން ފަދަ ކަންކަން ނުހިމަނައި، އިސްލާމީ އުސޫލުތަކާ އެއްގޮތަށް އީދު ފާހަގަކުރުމަށް ކިނޮޅަހުގެ ރައްޔިތުން މީގެ 15 އަހަރު ކުރިން ނިންމި ތާރީޚީ ނިންމުމުގެ ދަށުން ބާއްވާ ސިލްސިލާ ހަރަކާތްތަކެކެވެ. ރަށު ކައުންސިލާއި، މުއައްސަސާތަކާއި، ޖަމިއްޔާތައް ގުޅިގެން ރާވާފައިވާ މި ޕްރޮގްރާމްގައި ފިރިހެނުންނާއި އަންހެނުންނަށް ޚާއްޞަ ކުޅިވަރުތައް ވަނީ ވަކިވަކިން ތަރުތީބުކުރެވިފައެވެ.

ކައުންސިލްގެ ރައީސް އަޙުމަދު ޙުސައިން ވިދާޅުވި ގޮތުގައި، ދިވެހި ސަގާފަތުގައި ހިމެނޭ ދީނާ ޚިލާފު ކަންތައްތައް ނުލައި އީދު ފާހަގަކުރުމަކީ ކައުންސިލުން އެންމެ އިސްކަންދޭ ކަންތައްތަކެވެ.

"ސަގާފީ ކަންކަން ވެސް ދީނީ އިމުގެ ތެރޭގައި އީދުގައި ހިމެނޭނެ،" އޭނާ ވިދާޅުވިއެވެ.

މި އަހަރުގެ އީދުގައި އެންމެ ޚާއްޞަ ކަމެއްގެ ގޮތުގައި ފެނިގެންދާނީ މަޝްހޫރު ދަތުރުވެރިޔާ އިބުނު ބަތޫތާގެ ވާހަކަތަކުގެ މައްޗަށް ބިނާކޮށް ކުރިއަށްގެންދާ ހަރަކާތްތަކެވެ.

ހޯމަ ދުވަހު މަސް ރޭހަކުން އީދުގެ ފޯރި ފަށާފައިވާއިރު، އީދު ވިލޭރޭ މުޅި ރަށް ދިއްލާލައި، ”އިބުނު ބަތޫތާ“ އެ ރަށަށް ޒިޔާރަތްކުރުމުގެ ޚާއްޞަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މި ރަސްމިއްޔާތުގައި އެކަލޭގެފާނުގެ ޝަރަފުގައި 7 ބަޑީގެ ސަލާމެއް އެރުވުމާއި ހޫނު މަރުޙަބާއެއް ކިޔުން އޮންނާނެއެވެ.

އީދު ދުވަހުގެ ހަރަކާތްތައް ފެށޭނީ އީދު ނަމާދަށްފަހު ބާއްވާ ޚާއްޞަ އީދު ސަޔަކުންނެވެ. އަދި މުޅި ރަށުގެ ރައްޔިތުންނާއި މެހެމާނުންނަށް މެންދުރުގެ ޖާފަތެއް ބޭއްވުމަށް ހަމަޖެހިފައިވާއިރު، އީދުގެ ހަތަރު ދުވަހުވެސް ރަށުގެ ގޭގެއިން މެހެމާނުންނަށް ސައިގެ ދައުވަތު ދެވޭނެއެވެ. އަންހެން ކަނބަލުންނަށް ޚާއްޞަކޮށްގެން ތިންމުގޯލި، ފައިގަތަޅާ، ބަށިބޯޅަ އަދި ބީޗް ހޭންޑްބޯޅަ ފަދަ ގިނަ ކުޅިވަރުތަކެއް ތާވަލުކޮށްފައިވެއެވެ.

ސަގާފީ ކުޅިވަރުތަކުގެ ތެރޭގައި ހިމެނޭ ގުދުބެ ހެއްދުމާއި، މަހާއި ކޯޑި ނެރުމުގެ އިތުރުން ފުޅަނދުބުރުގެ ހަރަކާތްތައްވެސް ކުރިއަށްދާނެއެވެ. އީދުގެ ތިންވަނަ ދުވަހު އިބުނު ބަތޫތާގެ ޝަރަފުގައި ބާއްވާ ބޮޑު ބާބަކިއުއެއް އޮންނާނެއެވެ. މި ކެއުން ތައްޔާރުކުރުމުގެ އެންމެހާ ކަންކަމުގައި އުޅޭނީ ފިރިހެނުންނެވެ. އެރޭ ހަވާ އެރުވުމާއެކު އިބުނު ބަތޫތާ ފުރުވާލުމުގެ ރަސްމިއްޔާތު ބޭއްވުމަށް ވަނީ ނިންމާފައެވެ.

މި ފޯރިގަދަ އީދު ނިންމާލުމަށް ހަމަޖެހިފައިވަނީ "އީދު ފުރުވާލުން" ހަރަކާތުންނެވެ. މި ހަރަކާތުގައި ރަށުތެރެ ދިއްލުމުގެ މުބާރާތުން އެންމެ ރީއްޗަށް ދިއްލާލާފައިވާ 10 ގެއަކަށް އިނާމު ދިނުން އޮންނާނެއެވެ.