މާލީ ވުޒާރާގެ ސިސްޓަމްގައި ނެތް 2 ބިލިއަން ރުފިޔާގެ މައްސަލަ ބަލަން މާރިޔާ ގޮވާލައްވައިފި

މާލީ ވުޒާރާގެ ސިސްޓަމްގައި އެކައުންޓް ނުކޮށް އޮތް 2 ބިލިއަން ރުފިޔާގެ މައްސަލަ ބަލަން މިދިޔަ ސަރުކާރުގެ ދިފާއީ ވަޒީރު މާރިޔާ އަޙްމަދު ދީދީ ގޮވާލައްވައިފިއެވެ.

މާލީ ވުޒާރާގެ ސިސްޓަމްގައި އެކައުންޓް ނުކޮށް 2 ބިލިއަން ރުފިޔާ އޮތްކަން ހާމަކުރައްވާފައިވަނީ، އިއްޔެ ރައީސުލްޖުމްހޫރިއްޔާ އޮފީހުން ބޭއްވި ނޫސްވެރިން ބައްދަލުވުމެއްގައި، ބަންޑާރަނައިބު އަހުމަދު އުޝާމެވެ.

މިކަމާއި ގުޅިގެން ލިޔެފައިވާ ހަބަރެއް ހިއްސާކުރައްވަމުން މާރިޔާ އެކްސްގައި ކުރެއްވި ޕޯސްޓެއްގައި ވަނީ ބަލަން ޖެހޭ ކަމަށް ދެކޭ މައްސަލަ ލަސްނުކޮށް ބެލުމަށް ގޮވާލައްވާފައެވެ.

ނަމަވެސް މިކަން ކުރުމަކީ ޤާނޫނުގައިވާ ގޮތުގެމަތީން މާލީ ހިސާބު ހާމަ ކުރަން ދައްކާ ބަހަނާއަކަށް ވެގެންނުވާނެ ކަމަށްވެސް މާރިޔާ ވިދާޅުވިއެވެ.

މާރިޔާ މިފަދައިން ވިދާޅުވިއިރު، އިއްޔެ ނޫސްވެރިންގެ ބައްދަލުވުމުގައި، މިކަން ހާމަކުރައްވާ އުޝާމް ވިދާޅުވީ، މި މައްސަލަ އޮޑިޓަރ ޖެނެރަލް އަށް ހުށަހަޅާފައިވާކަމަށާއި، މިކަމާއި ގުޅޭ ރިޕޯޓެއް ކުރިއަށް އޮތް ދެތިން ހަފްތާގެ ތެރޭގައި ފޯރުކޮށްދޭނެ ކަމަށް އޮޑިޓަރ ޖެނެރަލް ވިދާޅުވިކަމަށެވެ.

"އަޅުގަނޑުމެންނަކަށް ސީދާ އަދަދެއް ނޭނގެ، ގާތްގަނޑަކަށް ދެ ބިލިއަނެއްހާ ރުފިޔާ އަޅުގަނޑުމެންނަށް އެބަ އޮތް ސިސްޓަމްގެ ތެރެއިން އެކައުންޓް ނުކުރެވި،"

އުޝާމް ވިދާޅުވިއެވެ.

މި މައްސަލައިގައި އިތުރަށް ކުރިއަށްދާނެ ގޮތް ނިންމާނީ އޮޑިޓަރ ޖެނެރަލް ގެ ރިޕޯޓް ލިބުމުންކަން ފާހަގަކުރައްވަމުން އުޝާމް ވިދާޅުވީ، ގާނޫނާއި ހިލާފަށް ކަންތައްތަކެއް ކޮށްފައި ހުރި ކަމަށާއި، މި ފަރާތްތަކުގެ މައްސަލަތައް ބަލައި، ގާނޫނީ ގޮތުން އަޅަން ޖެހޭ ފިޔަވަޅުތައް އަޅުއްވާނެ ކަމަށެވެ.

މިފަދަ ކަންކަން ތަކުރާރު ނުވުމަށްޓަކައި ގާނޫނަށް ގެންނަންޖެހޭ އިސްލާހުތައް ގެންނާނެކަމުގެ ޔަގީންކަން އުޝާމް ވަނީ ދެއްވާފައެވެ.