އެމެރިކާގެ ވައިގެ އެކްސިޑެންޓާއި ގުޅިގެން ރައީސް މުޢިއްޒުގެ ތައުޒިޔާ!

އެމެރިކަން އެއާލައިންސްގެ މަތިންދާބޯޓަކާއި ހެލިކޮޕްޓަރެއް ޖެހި ހިނގި އެކްސިޑެންޓާއި ގުޅިގެން މަރުވި މީހުންގެ އާއިލާތަަކަށް ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

އެމެރިކާގެ ވޮޝިންގްޓަން ޑީސީގައި އިއްޔެ ރޭ ހިނގި ވައިގެ އެކްސިޑެންޓެއްގައި 67 މީހުން ވަނީ މަރުވެފައެވެ. މިއީ 2001 ވަނަ އަހަރުގެ ފަހުން އެމެރިކާގައި ހިނގި އެންމެ ނުރައްކާތެރި ވައިގެ އެކްސިޑެންޓެވެ.

އެމެރިކަން އެއަރލައިންސްގެ ބޮމްބާޑިއަރ ސީއާރްޖޭ 700 މަތިންދާބޯޓަކާއި އެމެރިކާ އާމީގެ ބްލެކް ހޯކް ހެލިކޮޕްޓަރެއް ޖެހި، މަތިންދާބޯޓު ޕޮޓޯމެކް ކޯރަށް ވެއްޓިފައިވާއިރު، މި ހާދިސާ ހިނގީ މަތިންދާބޯޓު ވޮޝިންގްޓަން ނެޝަނަލް އެއަރޕޯޓަށް ޖައްސަން އުޅެނިކޮށެވެ.

މަތިންދާބޯޓުގައި 60 ފަސިންޖަރުންނާއި 4 ކުރޫ މެމްބަރުން ތިބި ކަމަށް ރޮއިޓާސްއިން ރިޕޯޓް ކޮށްފައިވާއިރު މަރުވި މީހުންގެ ތެރޭގައި ރަޝިއާ، ފިލިޕީންސް އަދި ޖަރުމަނުވިލާތުގެ ރައްޔިތުން ހިމެނެއެވެ. އަދި ކެންސަސް ސްޓޭޓުން ގިނަ ބަޔަކާއި ޒުވާން ސްކޭޓަރުންތަކެއްވެސް މަރުވެފައިވެއެވެ.

މަތިންދާ ބޯޓާއި ހެލިކޮޕްޓަރގައި ތިބި މީހުންނާއި ބެހޭ މައުލޫމާތުތައް އަދި އާއްމު ކޮށްފައި ނުވި ނަމަވެސް، މި ހާދިސާގައި އެއްވެސް މީހެއްގެ ފުރާނަ ސަލާމަތް ނުވާކަމަށް ރިޕޯޓްތައް ބުނެއެވެ.

މި ހާދިސާއާ ގުޅިގެން ރައީސް މުއިއްޒު އެކްސްގައި ކުރި ޕޯސްޓެއްގައި ވިދާޅުވީ، މި ހާދިސާގެ ހަބަރު އެއްސެވީ ހިތާމައާ އެކުގައި ކަަމަށެވެ.

އަދި ހާދިސާގައި މަރުވި މީހުންގެ އާއިލާތަކަށާއި، ރައްޔިތުންނަަށް އެމަނިކުފާނު ވަނީ ތައުޒިޔާ ވިދާޅުވެފައެވެ.

"އަޅުގަނޑުމެން މި ތިބީ ރައީސް ޑޮނަލްޑް ޓްރަމްޕް އާއި އެމެރިކާގެ ރައްޔިތުންނާއެކު،". އެމަނިކުފާނުގެ ޕޯސްޓްގައި ވެއެވެ.

މި ހާދިސާ ހިނގަން މެދުވެިރިވި އަސްލު ސަބަބު ނޭނގޭއިރު، އެ ހޯދުމަށް އެމެރިކާގެ ނެޝަނަލް ޓްރާންސްޕޯޓޭޝަން ސޭފްޓީ ބޯޑުން އަންނަނީ މަސައްކަތް ކުރަމުންނެވެ. އެގޮތުން މިހާރު ވަނީ މަތިންދާބޯޓުގެ ކޮކްޕިޓް ވޮއިސް ރެކޯޑަރާއި ފްލައިޓް ޑޭޓާ ރެކޯޑަރ ހޯދާފައެވެ.

ޓްރާންސްޕޯޓޭޝަން ސެކްރެޓަރީ ޝޯން ޑަފީ ބުނީ، ދެ އުޅަނދުވެސް އާންމުކޮށް ދަތުރުކުރާ މަގުތަކުގައި ދުއްވަމުން ދިޔައިރު މުވާސަލާތީ މައްސަލައެއް ދިމާވެފައި ނުވާ ކަމަށެވެ. އަދި އެއަރ ޓްރެފިކް ކޮންޓްރޯލަރުން ހެލިކޮޕްޓަރަށް މަތިންދާބޯޓު އަންނަކަން އަންގައި، މަގު ބަދަލުކުރުމަށް އެންގި ކަމަށް ރޭޑިއޯ މުވާސަލާތްތަކުން ދައްކާ ކަމަށްވެސް ބުންޏެވެ.