އާޒިމް ސަރުކާރަށް؛ މެނިފެސްޓޯ ތަންފީޒުކުރަން ފުރުސަތު ނުދީފިނަމަ ގޯސްވާނެ

މާލެސިޓީއަށް ވީ ވައުދުތައް ފުއްދުމަށް މެނިފެސްޓޯ ތަންފީޒުކުރުމުގެ ފުރުސަތު ނުދީފިނަމަ އެކަމާ ދެކޮޅަށް ނިކުންނަވާނޭކަމަށް މާލެސިޓީގެ އިންތިހާބީ މޭޔަރު އާދަމް އާޒިމް ވިދާޅުވެއްޖެއެވެ.

ނިމިގެންދިޔަ އިންތިހާބުތަކުގައި އެމްޑީޕީއަށް ލިބުނު ކާމިޔާބީތައް ފާހަގަކުރުމަށް މިރޭ ބޭއްވި ޖަލްސާގައި ވާހަކަދައްކަވަމުން މިހާރުވެސް މާލެ ސިޓީގެ މޭޔަރުކަމުގެ މަޤާމް ފުރުއްވަމުން އަންނަ އާޒިމް ވިދާޅުވީ، މެނިފެސްޓޯ ތަންފީޒުކުރަން އެއްބާރުލުންދީ އެކަމަށް ހުރަސް ނޭޅުމަށް އެދޭކަމަށެވެ. މެނިފެސްޓޯ ތަންފީޒުކުރަން ފުރުސަތު ނުދީފިނަމަ ސަރުކާރާ ދެކޮޅަށް މުޒާހަރާކުރަން ނިކުންނާނޭކަމަށް އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ ރައްޔިތުންނަށް ކުރުމަށް ހުށަހެޅި ކަންކަން ކުރުމަށް ސަރުކާރުން ފުރުސަތު ދޭންޖެހޭނޭ ކަމަށާއި، އެކަމަށް ހުރަސްއެޅުމަކީ ސަރުކާރަށް ލިބިގެންވާ ހައްގެއް ނޫންކަމަށެވެ.

އާޒިމް ވިދާޅުވީ އެމްޑީޕީއަށް އިންތިހާބުން މިވަރުގެ ކާމިޔާބީއެއް ލިބިފައިމިވަނީ، އާސަންދައަށްވުރެ ބޮޑަށް ސިޔާސީކަންކަމަށް ހަރަދުކޮށް މަޤާމުތައް އުފައްދަމުން ދަނިކޮށްކަމަށެވެ. ނަމަވެސް ފެނިގެން މިދިޔައީ އެކަން ރައްޔިތުން ބަލައިނުގަތް މަންޒަރުކަމަށް އާޒިމް ފާހަގަކުރެއްވިއެވެ.

މިއަދު ދިވެހިރާއްޖޭގައި ފުރަތަމަ ފަހަރަށް، ފުރަތަމަ ފަހަރަށް، ފުރަތަމަ ފަހަރަށް ސިޔާސީ މީހުންނަށް ދޭ މުސާރައިގެ އަދަދު ބޮޑުވެއްޖެ އާސަންދަ އާއި ބޭސްފަރުވާގެ ހުރިހާ ހިދުމަތެއް ހުއްޓިއްޖެ

އިންތިހާބީ މޭޔަރު އާދަމް އާޒިމް

އާޒިމް ވިދާޅުވީ، އެމްޑީޕީގެ ފިކުރަނީ އަބަަދުވެސް ވައްކަމާއި ކޮރަޕްޝަނާ ދެކޮޅަށް މަސައްކަތްކުރުން ކަމަށާއި، ރައްޔިތުން މިއަދު އެމްޑީޕީއަށް ފުރުސަތު ދިނީ އެކަން ގަބޫލުކުރާތީ ކަމަށެވެ. އޭނާ ވިދާޅުވީ ދިވެހިރާއްޖޭގަ ސިޔާސީ މީހުންނަށް އިތުބާރު ގެއްލިގެން ގޮސްފައި ވަނީ ވައްކަމާއި ކޮރަޕްޝަން އިންތިހާއަށް ބޮޑުވުމުން ކަމަށެވެ.

ކުރިއަށްއޮތީ އެމްޑީޕީގެ ބޮޑު މެޖޯރިޓީއާއެކު މާލެސިޓީ ކައުންސިލާ ހަވާލުވެ، ކޮރަޕްޝަންތައް ފުހެލުންކަމަށާއި، ސަރުކާރަށް ނިސްބަތްވާ ފަރާތްތަކުން ހިންގާފައިވާ ކޮރަޕްޝަނުގެ ކަންކަން ރައްޔިތުންނަށް ވަރަށް ރަނގަޅަށް އެނގޭކަމަށެވެ. ކޮރަޕްޝަނުގެ ވާހަކަ އެބޭފުޅުން އެބީދައިން ދައްކަވަނީ އެބާވަތުގެ ކަންކަން ކޮށްފައި ހުރުމުންކަމަށް އާޒިމް ފާހަގަކުރެއްވިއެވެ.