ތ.ގުރައިދޫގައި ބިދޭސީއަކު މެރުމުގެ ކުށް ސާބިތުވެ، ބަބުލް މިއާ އުމުރަށް ޖަލަށްލުމަށް ހުކުމްކޮށްފި
ތ. ގުރައިދޫގައި ބަންގްލަދޭޝްގެ ރައްޔިތެއް ކަމަށްވާ ޝާހް އަލަމް މިއާ ތޫނު އެއްޗަކުން ހަމަލާދީ މަރާލި މައްސަލައިގައި، އެ ގައުމުގެ ރައްޔިތެއް ކަމަށްވާ ބަބުލް މިއާ އުމުރަށް ޖަލަށްލުމަށާއި މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމަށް ކްރިމިނަލް ކޯޓުން އިއްޔެ ހުކުމްކޮށްފިއެވެ.
މި ހާދިސާ ހިނގާފައިވަނީ 2020 ވަނަ އަހަރުގެ ތެރޭގައެވެ. ޝާހް އަލަމް މިއާ މަރާލާފައި އޮއްވާ ފެނުނީ ތ. ގުރައިދޫގެ ސިނާއީ ސަރަހައްދުގައި އޭނާ ދިރިއުޅެމުން ދިޔަ ގެއާ ކައިރިންނެވެ. ފުލުހުން ކުރިން ހާމަކޮށްފައިވާ މައުލޫމާތުތަކަށް ބަލާއިރު، މި ހަމަލާ ދީފައިވަނީ އެ ދެ މީހުންގެ ދެމެދުގައި ހިނގި ހަމަނުޖެހުމެއްގެ ތެރެއިންނެވެ.
ހާދިސާ ހިނގިތާ ހަ އަހަރު ފަހުން ނިޔާ ކަނޑައެޅި މި މައްސަލައިގައި، ދައުލަތުން ބަބުލް މިއާގެ މައްޗަށް އުފުލީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ. ޝަރީއަތުން ބަބުލް މިއާގެ މައްޗަށް އެ ކުށް ސާބިތުވާ ކަމަށް ކަނޑައެޅުމަށް ފަހު، މަރުވި ޝާހް އަލަމް މިއާގެ ވާރިސުންގެ ބަސް ހޯދިއިރު، ވާރިސުން އެދިފައިވަނީ މަރުގެ އަދަބުގެ ބަދަލުގައި މަރުގެ ދިޔަ ނަގައިދިނުމަށެވެ.
އެހެންކަމުން ކޯޓުން ވަނީ އޭނާ އުމުރަށް ޖަލަށްލުމާއެކު، މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމަށާއި، އިސްލާމީ ޝަރީއަތުގައިވާ ގޮތުގެ މަތިން ކައްފާރާގެ ގޮތުގައި ޖެހިޖެހިގެން ދެ މަސް ދުވަހު ރޯދަ ހިފުމަށް ވެސް ބަބުލް މިއާގެ މައްޗަށް އަމުރުކޮށްފައެވެ.
ކްރިމިނަލް ކޯޓުގެ ހުކުމުގައި ވާގޮތުން، މި މައްސަލައިގެ ތަހުގީގަށާއި ޝަރީއަތުގެ މަރުހަލާގައި ބަބުލް މިއާ ބަންދުގައި ހޭދަކުރި މުއްދަތު އޭނާގެ ޖަލު ހުކުމުން އުނިކުރެވޭނެތީ، އޭނާ ތަންފީޒު ކުރަން ޖެހޭ ޖަލު އަދަބުގެ މުއްދަތު އެ މިންވަރަށް ކުރުވާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
