އިންނަމާދޫއަށް ބޯކޮށް ވާރޭވެހި 13 ގެއަކަށް ފެންވަދެއްޖެ

މިއަދު މެންދުރުފަހު ރ. އިންނަމާދޫއަށް ބޯކޮށް ވާރޭ ވެހުމާ ގުޅިގެން އެ ރަށުގެ ގިނަ ގެތަކަކަށް ފެންވަދެ ބޮޑެތި ގެއްލުންތަކެއް ލިބިއްޖެއެވެ.

ވޮއިސްއަށް މައުލޫމާތު ހިއްސާކުރަމުން އިންނަމާދޫން ވާހަކަދެއްކި މީހަކު ބުނީ، މެންދުރުފަހު 1:30 ހާއިރުން ފެށިގެން ވެހެމުންދިޔަ ވާރެއާ ގުޅިގެން އެ ރަށުގެ ފުޓުސަލް ދަނޑު ހިމެނޭ ސަރަހައްދުގައި ދޮޅު ފޫޓަށް ވުރެ މައްޗަށް ފެންގަނޑު އެރި ކަމަށެވެ.

އެ ސަރަހައްދުން 13 ވަރަކަށް ގެއަށް ފެންވަދެފައިވާ އިރު އޭގެ ތެރެއިން ދެ ގެއަކަށް ވަރަށް ބޮޑަށް ފެންވަދެ ގެއްލުން ލިބުނުކަމަށް އޭނާ ބުންޏެވެ..

ފެންބޮޑުވުމުގެ ސަބަބުން ގިނަ ގެތަކެއްގެ ފާޚާނާތައް ބްލޮކްވެ މަގުތަކުގައި ހުރި ޖަންކްޝަންތަކުން ނަޖިސް ބޭރުވަމުންދާކަމަށް މައުލޫމާތު ލިބެއެވެ.

ހަމައެއާ އެކު އެ ސަރަހައްދުގައި ޤާއިމުކޮށްފައި ހުރި ނަރުދަމާ ނިޒާމުގެ ޕަމްޕް ސްޓޭޝަންގެ މައްޗަށް ވެސް ފެންގަނޑު އަރާފައިވެއެވެ.

އިންނަމާދޫ ކައުންސިލްގެ ރައީސް އިބްރާހީމް ހަލީމް ވިދާޅުވީ ފެންބޮޑުވި ސަރަހައްދަކީ ކޮންމެ މޫސުމީ ވިއްސާރައެއްގައި ވެސް މި މައްސަލަ ތަކުރާރުވާ ސަރަހައްދެއް ކަމަށާއި އެ ސަރަހައްދުގައި 50 އަށް ވުރެ ގިނަ ގެ ހުންނަ ކަމަށެވެ.

އެ މައްސަލައަށް ދާއިމީ ހައްލެއް ބޭނުންވާ ކަން ވެސް ކައުންސިލްގެ ރައީސް ފާހަގަކުރެއްވިއެވެ.

ފެންގަނޑު ހިންދުމުގެ މަސައްކަތުގައި ކައުންސިލާއި ފުލުހުންނާއި އެ ރަށުގައި މަޝްރޫޢުތައް ހިންގަމުން އަންނަ އެމްޓީސީސީގެ މުވައްޒަފުންނާއި ރައްޔިތުން ގުޅިގެން ކޯރު ކަނޑައި ފެން ހިންދުމުގެ މަސައްކަތް ދަނީ ކުރަމުންނެވެ.