ފަވަރަ އާއި ޔޫޕީއައި ގުޅާލުމުން ރަނގަޅު ނަތީޖާތަކެއް ފެނިގެންދާނެ: އިކޮނޮމިކް މިނިސްޓްރީ

ފަވަރަ އާއި ޔޫޕީއައި  ގުޅާލެވިގެންދިއުމަކީ ދިވެހިރާއްޖެއާއި އިންޑިއާއާ ދެމެދު އޮތް އިގްތިސާދީ ގުޅުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެއްކަމަށް އިކޮނޮމިކް މިނިސްޓްރީން ބުނެފިއެވެ.

ރާއްޖޭގެ ފަވަރަ އާއި އިންޑިއާގެ ޔޫޕީއައި ގުޅާލުމުގެ ފުރަތަމަ މަރުހަލާގެ ދަށުން 'ފޮރިން އިންވާޑް ރެމިޓެންސް' (FIR) ގެ ހިދުމަތް މިހާރު ވަނީ ރަސްމީކޮށް ފަށާފައެވެ. މީގެ ސަބަބުން، ރާއްޖޭގައި ތިބެގެން އިންޑިއާގެ ފަރާތްތަކަށް ވަގުތުން، ރައްކާތެރިކަމާއެކު އަދި ކުޑަ ހަރަދެއްގައި ފައިސާ ފޮނުވުމުގެ މަގު ފަހިވެގެންދާނެއެވެ.

އިކޮނޮމިކް މިނިސްޓްރީން ނެރުނު ބަޔާނެއްގައި ބުނެފައިވަނީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އިންޑިއާގެ ބޮޑުވަޒީރު ނަރެންދުރަ މޯދީ، ދެ ގައުމުގެ ދެމެދުގައިވާ އިގްތިސާދީ ގުޅުން ބަދަހިކޮށް، ޑިޖިޓަލް ވަސީލަތްތަކުން ގުޅާލުމާއި، ދެ ގައުމުގެ ރައްޔިތުންގެ މެދުގައި އޮންނަ ގުޅުން ހަރުދަނާކުރުމަށް ގެންގުޅުއްވާ ތަސައްވުރުގެ ތެރެއިން ހާސިލްކުރެވުނު މުހިންމު ލަނޑުދަނޑިއެއް ކަމަށެވެ.

މި މަޝްރޫއުގެ ދެން އޮތް މަރުހަލާގައި، އިންޑިއާއިން ރާއްޖެއަށް ވަގުތުން ފައިސާ ފޮނުވޭނެ އިންތިޒާމު ހަމަޖެހިގެންދާނެއެވެ. އޭގެ ފަހުން 'ކިއު.އާރް ކޯޑް' މެދުވެރިކޮށް ވިޔަފާރިތަކަށް ފައިސާ ދެއްކޭނެ މަގު ފަހިވުމުން، އިންޑިއާއިން ރާއްޖެއަށް ޒިޔާރަތްކުރާ ފަތުރުވެރިންނަށް ފަސޭހަކަމާއެކު ރާއްޖޭގެ ވިޔަފާރިތަކަށް ފައިސާ ދެއްކި، ފަތުރުވެރިކަމުގެ ދާއިރާއަށް ބޮޑު ކުރިއެރުމެއް ލިބިގެންދާނެއެވެ.

މީގެ އިތުރުން، ކުރިމަގުގައި މި ޕްލެޓްފޯމް މެދުވެރިކޮށް ވިޔަފާރިތަކުގެ މެދުގައި މުއާމަލާތްކުރެވޭ (B2B payments) ހިދުމަތް ތައާރަފުކުރުމަށް ވަނީ އަމާޒު ހިފާފައިވާކަމަށްވެސް މިނިސްޓްރީން ބުންޏެވެ. މިއީ ދެ ގައުމުގެ ދެމެދުގައިވާ ވިޔަފާރީގެ ގުޅުން ވަރުގަދަކޮށް، 'އިންޑިއާ-މޯލްޑިވްސް ފްރީ ޓްރޭޑް އެގްރީމަންޓަށް އިތުރު ބާރަކަށް ވެގެންދާނެ ކަމެއް ކަމަށްވެސް އިކޮނޮމިކް މިނިސްޓްރީން ވަނީ ފާހަގަކޮށްފައެވެ.