10 ކުޅުންތެރިންނާއެކު ކުޅެ ބުޓާނުން ދިވެހި ޓީމު ބަލިކޮށްފި

ނޭޕާލުގެ ވެރިރަށް ކަތަމަންޑޫގައި މިހާރު ކުރިއަށްދާ 20 އަހަރުން ދަށުގެ ސާފް ޗެންޕިއަންޝިޕް ފުޓްބޯޅަ މުބާރާތުގެ ގުރޫޕް ބީގައި، ދެވަނަ ހާފުގެ ބޮޑުވައި 10 ކުޅުންތެރިންނާއެކު ކުޅުނު ބޫޓާން އަތުން ދިވެހި ޓީމު ބަލިވެއްޖެއެވެ.

މުބާރާތުގައި ބޫޓާން ކުޅުނު ފުރަތަމަ މެޗުގައި 1-0 ގެ ނަތީޖާއަކުން އެންމެ ފަހުގެ ޗެންޕިއަން އިންޑިއާ އަތުން އެޓީމު ބަލިވެފައިވާއިރު، މިއީ ރާއްޖެއިން މުބާރާތުގައި ކުޅުނު ފުރަތަމަ މެޗެވެ. އަދި މިނަތީޖާއެކު ގުރޫޕް ސްޓޭޖުގެ ފަހު މެޗުގައި އިންޑިއާ އަތުން މޮޅުވެގެން ނޫންގޮތަކަށް މުބާރާތުގައި އިތުރަށް ކުރިއަށް ދިއުމުގެ ފުރުސަތެއް ދިވެހި ޓީމަށް ނެތެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ބޫޓާނުން މެޗު ޑޮމިނޭޓްކުރިއިރު، މިމެޗުގައި ފުރަތަމަ ލަނޑުޖަހައި ކުރިހޯދީވެސް އެޓީމުންނެވެ. މިލަނޑު ފުރަތަމަ ހާފުގެ 21 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖެޓްސުއެން ޑޯޖީއެވެ. މިއީ އަރިމަތިން އެޓީމުގެ ކުޅުންތެރިއަކު ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި ދިވެހި ޓީމުގެ ކީޕަރަށް ހެދުނު ގޯހެއްގެ ފައިދާނަގައި މުޅިން ހުސްކޮށްހުރެ ބޯޅަ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުންވެސް މިހާފުގައި ބޫޓާނުން ދިވެހި ޓީމުގެ ގޯލާއި އަމާޒުކޮށް ރަނގަޅު ހަމަލާތަކެއް ފޮނުވާލާފައިވާއިރު، މިހާފުގައި ދިވެހި ޓީމުގެ ކީޕަރު ޔާމީންގެ ފަރާތުން ވަނީ ރަނގަޅު ސޭވްތަކެއް ފެނިގެން ގޮސްފައެވެ.

މެޗުގެ ދެވަނަ ހާފުގައި ދިވެހި ޓީމުން ވަނީ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 53 ވަނަ މިނެޓުގައި ދިވެހި ޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. ބޫޓާންގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި މިލަނޑު ދިވެހި ޓީމަށް ކާމިޔާބުކޮށްދިނީ އިޝްއާފު މުހައްމަދު ފިރާގެވެ.

މި ހިލޭޖެހުމަކީ ދިވެހި ޓީމުން އުފެއްދި ހަމަލާއެއް ދިފާއުކުރަން އުޅުމުގެ ތެރޭގައި ބޫޓާންގެ ކީޕަރު ޓެންޒިން އޭރިއާ ބޭރުން ބޯޅައިގައި އަތްލުމުގެ ސަބަބުން ދިވެހި ޓީމަށް ލިބުނު ޖެހުމެކެވެ. އަދި މިއާއެކު މެޗުގެ ރެފްރީ ވަނީ ޓެންޒިން އަށް ސީދާ ރަތް ކާޑެއްދައްކައި ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިއަކު މަދުކޮށެވެ.

ވެހެމުންދިޔަ ބޯ ވާރޭގެ ތެރޭގައި ކުޅެވުނު ދެވަނަ ހާފުގައި އެއްކުޅުންތެރިއަކު މަދުކޮށް ކުޅެމުންދިޔަ ބޫޓާނުން ދެވަނަ ފަހަރަށް މެޗުގެ ލީޑު ހޯދީ ފަހުހާފުގެ 90 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ގަވާންގް ޗޮޕެލް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ބޫޓާން ކުރީގައި އޮވެގެންނެވެ.

މުބާރާތުގެ ގުރޫޕް ސްޓޭޖުގައި ދިވެހި ޓީމު ކުޅޭ ފަހު މެޗުގައި ރާއްޖެ ގަޑިން 14:15 ގައި ދިވެހި ޓީމު ނުކުންނާނީ އެންމެ ފަހުގެ ޗެންޕިއަން އިންޑިއާއި ދެކޮޅަށެވެ.