ވެރިކަމުގެ ފުރަތަމަ ދުވަހު މީޑިއާ ބިލު އުވާލާނަން: ފައްޔާޒު

އެނބުރި ރާއްޖެ ވެރިކަމަށް އެމްޑީޕީން އަންނާނެ ކަމަށާއި، އެގޮތުން ވެރިކަން ލިބޭ ފުރަތަމަ ދުވަހު ވެސް މީޑިޔާ ރެގިއުލޭޓްކުރާ ގޮތަށް ފާސްކުރި ބިލު އުވާލައްވާނެ ކަމަށް އެ ޕާޓީގެ ޗެއާޕާސަން ފައްޔާޒް އިސްމަޢީލް ވިދާޅުވެއްޖެއެވެ.

ފައްޔާޒް އެފަދައިން ވިދާޅުވީ، އަންގާރަ ދުވަހު މަޖިލީހުން ފާސްކުރި މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލާ ގުޅިގެން ކަންބޮޑުވުން ފާޅުކުރުމަށް އެ ޕާޓިީން ރޭ ބޭއްވި ޤައުމީ މަޖިލީހުގެ ޖަލްސާ ނިންމަވާލައްވަމުންނެވެ. 

އެ ބިލު ރައީސް ޑރ. މުޙައްމަދު މުޢިއްޒު ތަސްދީޤުކުރައްވައިފި ނަމަ، އެ ޤާނޫނަށް ޢަމަލުނުކުރަން އެ ޖަލްސާގައި އެ ޕާޓީގެ ޤައުމީ މަޖިލީހުން ވަނީ ނިންމާފައެވެ.

އެގޮތުން އެ ޖަލްސާ ނިންމަވާލައްވަމުން ފައްޔާޒު ވިދާޅުވީ، މި ސަރުކާރުން ޤާނޫނު އަސާސީ "އިރާލުމަށް" ކުރި ހުރިހާ މަސައްކަތެއް އަނބުރާ އިޔާދަކުރާނެ ކަމަށާއި، ދެވަނަ ފަރާތަކަށް ޤާނޫނު އަސާސީއާ ނުކުޅެވޭ ވަރު ކުރާނެ ކަމަށެވެ.

އެގޮތުން އެންމެ ފުރަތަމަ ވެސް އުވާލާނީ މީޑިޔާ ރެގިއުލޭޓްކުރާ ބިލު ކަމަށް ފައްޔާޒް ވިދާޅުވިއެވެ.

އަޅުގަނޑުމެން އަނެއްކާ ވެސް އިރާދަފުޅު ކުރެއްވިއްޔާ ދިވެހި ރާއްޖޭގެ ވެރިކަމާއި ހަވާލުވެ، ރައީސް މުޢިއްޒު އެ ކުރައްވަމުންދާ ހުރިހާ ކަމެއް އިރާދަކުރެއްވިއްޔާ ރަނގަޅުކުރާނަން. ޤާނޫނު އާސާސީ އިރާލުމުގެ ތެރެއިން އެ ކުރައްވާފައިހުރި މަސައްކަތްތައް އަނބުރާ އަޅުގަނޑުމެން އިޔާދަކުރާނަން. އަދި އެއަށްވުރެ ފުރިހަމައަށް އަލުން މިފަދަ މީހަކަށް އައިސް ޤާނޫނު އަސާސީއާ ނުކުޅެވޭ ވަރު އިރާދަކުރެއްވިއްޔާ އަޅުގަނޑުމެން ކުރާނަން. މީޑިޔާ ކޮންޓްރޯލް ބިލް ހަމަ ގައިމުވެސް ފުރަތަމަ ދުވަހު އުވާލާނެ ބިލެއް. ޤާނޫނެއް.

އެމްޑީޕީގެ ޗެއާޕާސަން ފައްޔާޒް އިސްމަޢީލް

އަދި މި ސަރުކާރުން ރައްޔިތުންނަށް ދީފައިވާ ތަކުލީފުތައް ވެސް ރަނގަޅުކުރާނެ ކަމަށް ފައްޔާޒު ވިދާޅުވިއެވެ. އެގޮތުން ޤާނޫނު އިސްލާޙުކޮށްގެން މި ސަރުކާރުން ރާއްޖޭގައި ބޭނުންކުރުން މަނާކުރި ވޭޕުގެ އިތުރުން ސިނގިރޭޓަށް ނަގާ ޑިއުޓީ ވެސް ރައްޔިތުންގެ މަޝްވަރާއާއެކި ބަދަލުކުރާނެ ކަމަށް ފައްޔާޒް ވިދާޅުވިއެވެ.

ހަމައެއާއެކު އަދިވެސް ރައްޔިތުންނަށް ވެފައި ހުރި ތަކުލީފުތައް އޭގެ ތެރޭގައި ސިނގިރޭޓުގެ ޑިއުޓީ، ވެޕް މި ހުރިހާ ކަމަކީ އަޅުގަނޑުމެން ރައްޔިތުންގެ މަޝްވަރާއާއެކީ ބަދަލުކުރާނެ ކަންކަން އަޅުގަނޑު މިއަދު ފާހަގަކޮށްލަން ބޭނުންވޭ.

އެމްޑީޕީގެ ޗެއާޕާސަން ފައްޔާޒް އިސްމަޢީލް

ފައްޔާޒް އެފަދައިން ވިދާޅުވިއިރު، ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު މަޖިލީހަށް ހުށަހެޅުއްވި މޯލްޑިވްސް މީޑިޔާ އެންޑް ރެގިއުލޭޝަން ބިލު މަޖިލީހުން ފާސްކުރީ ގިނަ ނޫސްވެރިންނާއި އިދިކޮޅު ފަރާތްތަކުން އެބިލާ ގުޅޭ ގޮތުން ކަންބޮޑުވުން ފާޅުކުރަމުން ދަނިކޮށެވެ.

ހަމަ އެގޮތަށް، މިދިޔަ ސަރުކާރުން ހެއްކާބެހޭ ބިލުއެއްގެ ނަމުގައި އެމްޑީޕީގެ ސުޕަ މެޖޯރިޓީ އޮތް މަޖިލީހަށް ބިލެއް ހުށަހަޅައި، އެ ބިލުގައި ނޫސްވެރިޔާގެ މަސްދަރު ހާމަކުރުމަށް ފަނޑިޔާރުންނަށް މަޖުބޫރުކުރެވިދާނެ ހާލަތްތައް އިސްތިސްނާ ހާލަތުގެ ގޮތުގައި ހިމަނާފައިވުމުން، އެކަމުގެ ކަންބޮޑުވުން އޭރު ވެސް ގިނަ އަދަދެއްގެ ނޫސްވެރިން ކުރިއެވެ. އެހެން ނަމަވެސް އޭރުވެސް އެ ނޫސްވެރިންގެ ކަންބޮޑުވުންތަކަށް ބީރުކަންފަތެއް ދީ އެ މަޖިިލީހުން އެ ބިލު ފާސްކުރިއެވެ.

އަދި އެ ބިލު ތަސްދީގުކުރައްވައި، 18 ޖެނުއަރީ 2023 އިން ފެށިގެން އެ ޤާނޫނަށް ގެންދަނީ ޢަމަލުކުރަމުންކަން ވެސް ފާހަގަކުރެވެއެވެ.