ކޭޕާކް މައްސަލާގައި ހަންބޯއިން މިލިއަނަކަށްވުރެ ގިނަ ރުފިޔާ ދޭންޖެހިއްޖެ

ކޭޕާކް މައްސަލާގައި ހަންބޯގެ މައްޗަށް ސިވިލްކޯޓުން އަނެއްކާވެސް މިލިއަނަކަށް ވުރެ ގިނަ ރުފިޔާގެ ބޮޑު ބަދަލެއް ދިނުމަށް ނިޔާކަނޑައަޅައިފިއެވެ.

ސިވިލްކޯޓުން ހަންބޯގެ މައްޗަށް އިއްޔެ ހުކުމް އިއްވާފައިވަނީ ކޭޕާކް އިމާރާތުން އެޕާޓްމަންޓެއް ގަތުމަށް ފައިސާ ދެއްކި މީހަކު ސިވިލްކޯޓަށް ހުށަހެޅި މައްސަލައަކާ ގުޅިގެންނެވެ. މި މައްސަލާގައި އެމީހާ ކޭޕާކްގެ ބަލަދުވެރިފަރާތް، ހަންބޯ ކުންފުނީގެ މައްޗަށް ދައުވާކޮށްފައިވަނީ، އެޕާޓްމަންޓް ގަތުމަށް ވެފައިވާ އެއްބަސްވުމާ ހިލާފްވުމުންނެވެ.

ދައުވާކުރި ފަރާތުން ހުށަހަޅާފައިވަނީ އެޕާޓްމަންޓް ގަތުމަށް ދެއްކި 4.1 މިލިއަން ރުފިޔާ އާއި އެޕާޓްމަންޓް ހަވާލުނުކޮށް ހުރުމުން ދައުވާކުރާ ފަރާތަށް ލިބިފައިވާ ގެއްލުމުގެ ބަދަލުފެ ގޮތުގައި 2019 ވަނަ އަހަރުގެ ޖުލައިމަހުގެ 29 ވަނަ ދުވަހުން ފެށިގެން އެޕާޓްމަންޓް ހަވާލުކުރާ ދުވަހާ ހަމަޔަށް ކޮންމެ މަހަކަށް 25،000 ރުފިޔާއެވެ.

ސިވިލްކޯޓުގެ ގަޒިއްޔާގެ ހުލާސާއަށް ބަލާއިރު، އެޕާޓްމަންޓް ހަވާލުކުރަން އަންގާ ހާލަތުގައި އެޕާޓްމަންޓް ގަތުމަށް ދެއްކިފައިސާ އަނބުރާ ދައްކަން ނުޖެހޭނޭކަމަށް ބަޔާންކޮށްފައިވާއިރު، ކޯޓުން ކުރި ހުކުމުގައި ވަނީ، ގެއްލުމުގެ ބަދަލުގެ ގޮތުގައި ނަގައިދިނުމަށް އެދުނު 1.9 މިލިއަން ރުފިޔާ އާއި އެޕާޓްމަންޓް ހަވާލުކުރުމާ ހަމަޔަށް ކޮންމެ މަހަކު 25،000 ރުފިޔާ ދައްކަން ހަންބޯގެ މައްޗަށް އަމުރުކޮށްފައެވެ.

ހަންބޯގެ މައްޗަށް މިފަދަ ބައިވަރު މައްސަލަތައް މިދިޔަ އަހަރުވެސް ނިމިފައި އެބަހުއްޓެވެ. ކޭޕާކު ފުލެޓުތައް އޮޅުވާލައިގެން ގިނަ އަދަދެއްގެ މީހުންނަށް ވިއްކި މައްސަލާގައި ތުހުމަތު ކުރެވޭ ހަސަން މަމްދޫހު (މަންޑޭ)ގެ މައްޗަށް 94 ދައުވާ ސާބިތުވުމާ ގުޅިގެން ކްރިމިނަލް ކޯޓުން ވަނީ އޭނާ 397 އަހަރަށް ޖަލަށް ލުމަށް ހުކުމްކޮށްފައެވެ.