ރަޝިއާ މާކެޓް ވެއްޓި، ރާއްޖޭގެ ދެވަނަ މާކެޓަކަށް އިނގިރޭސިވިލާތް!

ރަޝިއާ މާކެޓް ވެއްޓި ދެވަނައަށް އެންމެގިނައިން ދިވެހިރާއްޖެއަށް ފަތުރުވެރިން ޒިޔާރަތްކުރާ ޤައުމަކަށް އިނގިރޭސިވިލާތް ވެއްޖެއެވެ.

ޓޫރިޒަމް މިނިސްޓްރީން ނެރެ އާއްމުކޮށްފައިވާ ރާއްޖެއަށް ފަތުރުވެރިން ޒިޔާރަތްކުރި ނިސްބަތް ދައްކުވައިދޭ ތަފާސްހިސާބަށް ބަލާއިރު، މިހާރު ރާއްޖެއަށް ދެވަނައަށް އެންމެ ގިނައިން ފަތުރުވެރިން ޒިޔާރަތްކުރާ މާކެޓަކީ އިނގިރޭސިވިލާތެވެ. މި ފަހަކާ ޖެހެންދެން ރައްޖެއަށް ދެވަނައަށް އެންމެ ގިނައިން ފަތުރުވެރިން ޒިޔާރަތްކުރަމުން އައިސްފައިވަނީ ރަޝިއާއިންނެވެ.

ޓޫރިޒަމް މިނިސްޓްރީގެ ތަފާސްހިސާބަށް ބަލައިރު، މިހިގާ އޭޕްރިލްމަހުގެ 5 ވަނަ ދުވަހުގެ ނިޔަލަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ.

އެންމެގިނައިން ފަތުރުވެރިން ޒިޔާރަތްކުރި ޤައުމުތައް:

1. ޗައިނާ: 76,674

2. އިނގިރޭސިވިލާތް: 70,561

3. ރަޝިއާ: 70,538

4. އިޓަލީ: 59,978

5. ޖަރުމަނުވިލާތް: 47,470

މި ޤައުމުތަކަށްފަހު ދެން އެންމެގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ހިމެނެނީ އިންޑިއާ، ފަރަންސޭސިވިލާތް، އެމެރިކާ، އަދި ސްވިޒަރލެންޑާއި ޕޮލެންޑެވެ.

އިނގިރޭސިވިލާތުން ޒިޔާރަތްކުރާ ފަތުރުވެރިންގެ އަދަދު އިތުރުވެފައިވާއިރު، އެމްއެމްޕީއާރުސީން ވަނީ އިނގިރޭސި ޕްރިމިއާ ލީގްގެ ކްލަބް، ލިވަޕޫލާއެކު ރާއްޖޭގެ ފަތުރުވެރިކަން އިސްތިހާރުކުރުމަށް އެއް އަހަރުދުވަހުގެ ކެމްޕެއިނެއް ފަށާފައެވެ. މި ކެމްޕެއިނުގެ ސަބަބުން އިނގިރޭސިވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނޭކަމަށް އެމްއެމްޕީއާރުސީން ވަނީ ބުނެފައެވެ.

އިނގިރޭސިވިލާތަކީ ރާއްޖޭގެ ޓޫރިޒަމް ސިނާއަތުގެ ތާރީހުގައިވެސް އެންމެ ގިނައިން ރާއްޖެއަށް ފަތުރުވެރިން އަންނަ އެއް ޤައުމެވެ. އިނގިރޭސިވިލާތުގެ ޤައުމީ އެއާލައިން ބްރިޓީޝް އެއާވޭސް އާއި އެޤައުމަށް ނިސްބަތްވާ އަމިއްލަ ބައެއް އެއާލައިންތަކުން މިހާރުވެސް ރާއްޖެއަށް އުދުހުންތައް ބާއްވަމުން އަންނަކަން ފާހގަކޮށްލެވެއެވެ.

އަހަރުގެ މިހާތަނަށް ރާއްޖެއަށް 667,730 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 5.8 އިންސައްތައިގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް 630,867 ފަތުރުވެރިން ޒިޔާރަތްކުރި އެވެ.