ކައުންސިލްތަކުން ކުރާ ތަޖުރިބާ ދަތުރުތަކާ ގުޅިގެން އޮޑިޓަރުގެ އެންގުމެއް އެލްޖީއޭއަށް

ކައުންސިލްތަކުން ތަޖުރިބާ ހޯދުމުގެ ނަމުގައި ކުރާ ދަތުރުތަކުގެ މަގްސަދު ހާސިލްނުވާ މައްސަލާގައި އޮޑިޓަރ ޖެނެރަލްގެ އޮފީހުން ކައުންސިލްތަކުގެ ބަލަދުވެރި ފަރާތް ލޯކަލް ގަވަމަންޓް އޮތޯރިޓީގެ ސަމާލުކަމަށް އެކަން ގެނެސްފިއެވެ.

ބައެއް ކައުންސިލްތަކުން ވަނީ މިދިޔަ އަހަރުތަކުގައި ތަޖުރިބާ ހޯދުމާއި އިންވެސްޓްމަންޓްތައް ހޯދުމުގެ ނަމުގައި ރާއްޖެއާއި ރާއްޖެއިން ބޭރަށް ދަތުރުތަކެއް ކޮށްފައެވެ. ކައުންސިލްތަކުން މިހާތަނަށް ކުރި އެއްވެސް ދަތުރެއްގެ މަގްސަދު ހާސިލްވެފައި ނުވާކަމަށް އޮޑިޓަރ ޖެނެރަލް މިހާތަނަށް ނެރުއްވި އޮޑިޓް ރިޕޯޓްތަކުގައި ވަނީ ފާހަގަކޮށްފައެވެ.

އެންމެފަހުން ށ އަތޮޅު ކައުންސިލުން ހައްދުންމައްޗަށް ތަޖުރިބާ ހޯދުމުގެ ނަމުގައި ކުރި ދަތުރާ ގުޅިގެންވެސް އޮޑިޓަރ ޖެނެރަލް ވިދާޅުވެފައިވަނީ އެ ދަތުރުން ކައުންސިލަށް މަންފާކުރަނިވި ބޭނުމެއް ހާސިލްވެފައި ނުވާކަމަށެވެ. ށ އަތޮޅު ކައުްނސިލުން ވަނީ ހައްދުންމައްޗަށް ކުރި ދަތުރަށް ޖުމްލަ 269,992 ރުފިޔާ ހޭދަކޮށްފައެވެ. މި ހަރަދަކީ ދައުލަތުގެ ހަރަދުތަކުގެ އެފިޝަންސީ މަތިކުރުމާއި ގުޅޭގޮތުން ފިނޭންސުން  ނެރެފައިވާ ސަެކިއުލާއިން އަންގާފައިވާ އެންގުމާއި އެއްގޮތަށް ކޮށްފައިވާ ހަރަދެއްކަމުގައި ބެލެވެން ނެތްކަމަށް އޮޑިޓަރުގެ ބަޔާނުގައި ވަނީ ބުނެފައެވެ.

އޮޑިޓަރު އެލްޖީއޭއަށް ދެއްވި ރައުޔުގައި ބުނެފައިވަނީ، ޓްރެއިނިންނާއި ތަޖުރިބާ އެންމެބޮޑަށް ބޭނުންވާ ކަންތައްތަކަކީ ކޮބައިކަން ދެނެގަތުމަށް އެސެސްމަންޓެއް ތައްޔާރުކޮށް އިދާރާތަކަށް ޓްރެއިނިންނާއި ތަޖުރިބާ ހޯދުމުގެ ދަތުރުތައް އެ އިދާރާ މެދުވެރިވެގެން ރަނގަޅު ނިޒާމެއްގެ ތެރެއިން ކުރިއަށް ގެންދިއުމަށް އެދިފައެވެ.

ބައެއް ރަށްރަށު ކައުންސިލްތަކާއި އަތޮޅު ކައުންސިލްތަކުން މިދިޔަ އަހަރުތަކުގެ ތެރޭގައި ތަޖުރިބާ ހޯދުމަށް މެލޭޝިއާ، ތައިލެންޑް އަދި ސްރީލަންކާ ފަދަ ޤައުމުތަކަށް ވަނީ ޒިޔާރަތްކޮސްފައެވެ.