ކޮންގްރެސް ގެ ޕީޖީ ލީޑަރަކަށް ފަލާހު، ސީނިއާ ޑެޕިއުޓީ އަކަށް ޝުޖާއު

ވިހި ވަނަ ރައްޔިތުންގެ މަޖިލީހުގެ މެޖޯރިޓީ ޕާޓީ ކޮންގްރެސްގެ ޕާލަމެންޓަރީ ގްރޫޕް (ޕީޖީ) ގެ ލީޑަރު ކަމަށް އިނގުރައިދޫ ދާއިރާގެ އިންތިހާބީ މެންބަރު އިބްރާހިމް ފަލާހު ހަމަޖައްސަވައި، ސީނިއާ ޑެޕިއުޓީ ޕީޖީ ލީޑަރަކަށް ބާރަށު ދާއިރާގެ އިންތިހާބީ މެމްބަރު އިބްރާހިމް ޝުޖާއު ހަމަޖެއްސުމަށް ނިންމައިފިއެވެ.

މިފަދައިން ނިންމާފައިވަނީ މިއަދު މުލިއާގޭގައި ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ.މުޙައްމަދު މުޢިއްޒާއި ކެބިނެޓުގެ ވަޒީރުންނާއި ޕީއެންސީގެ އިންތިޚާބީ މަޖިލިސް މެންބަރުންނާއެކު ބޭއްވި ބައްދަލުވުމުގައެވެ.

ޝުޖާއު އާއި ފަލާހް ގެ އިތުރުން ވެސް ޕީޖީ ގެ ޑެޕިއުޓީ ކަމަށް އިތުރު ތިން މެމްބަރުން ހަމަޖެއްސުމަށް ރައީސް ޑރ.މުޢިއްޒު ވަނީ ނިންމާފައެވެ. އެ 3 ބޭފުޅުންނަކީ:

1) ވިލިމާލެ ދާއިރާގެ އިންތިހާބީ މެމްބަރު މުހައްމަދު އިސްމާއީލް

2) މަހިބަދޫ ދާއިރާގެ އިންތިހާބީ މެމްބަރު އަހްމަދު ތާރިޤް

3) ހުޅުދޫ ދާއިރާގެ އިންތިހާބީ މެމްބަރު މުހައްމަދު ޝާހިދު

ހަމައެއާއެކު މަޖިލީހުގެ ރައީސަކަށް ޕީއެންސީގެ ޗެއާޕާސަން އަދި ފޮނަދޫ ދާއިރާގެ އިންތިހާބީ މެމްބަރު އަބްދުﷲ އަބްދުއްރަހީމް އަދި މަޖިލީހުގެ ނައިބު ރައީސް ކަމަށް ދިއްގަރު ދާއިރާގެ އިންތިހާބީ މެމްބަރު އަހުމަދު ނާޒިމް ހަމަޖެއްސުމަށް ވެސް މި ބައްދަލުވުމުގެ ތެރެއިން ވަނީ ނިންމާފައެވެ.

ޕީއެންސީ އިން ބުނީ، މި ހުރިހާ ބޭފުޅުންގެ ނަންތައް މިއަދުގެ ބައްދަލުވުމުގައި ބައިވެރިވެވަޑައިގެން އިންތިހާބީ މެމްބަރުންގެ އިއްތިފާގުން ފާސްވެފައިވާ ކަމަށެވެ.

މި މަހުގެ 28 ވަނަ ދުވަހު އައު މަޖިލިސް ހުވާކުރުމަށް ހަމަޖެހިފައިވާއިރު، ވެރިކަން ކުރާ މައި ޕާޓީ ޕީއެންސީން ވަނީ ރައްޔިތުންގެ މަޖިލީހުގެ 74 މެންބަރުންނާއެކު މަޖިލީހުގެ ސުޕަ-މެޖޯރިޓީ ހޯދާފައެވެ.