ދަރިންނަށް ފައިސާ ނުދައްކާ މީހެއްގެ ފޮޓޯ ރަސްދޫ ކޯޓުން އާއްމުކޮށްފި

ދަރިފުޅަށް ދޭންޖެހޭ ސާބިތު ޚަރަދު ގަވާއިދުން ދައްކަމުން ނުދާތީ، އެ ފައިސާ ނުދައްކާ މީހާގެ މަޢުލޫމާތު އއ. ރަސްދޫ މެޖިސްޓްރޭޓް ކޯޓުން ޢާއްމުކޮށްފިއެވެ.

ރަސްދޫ މެޖިސްޓްރޭޓް ކޯޓުން ނެރުނު އިޢުލާނެއްގައި ބުނެފައިވަނީ، ދަރިފުޅުގެ ޚަރަދުގެ ގޮތުގައި ކޯޓު މެދުވެރިކޮށް ދައްކަންޖެހޭ ފައިސާ ގަވާއިދުން ދައްކަމުން ނުދާތީ، އެ ފަރާތާ މެދު ކޯޓުން އަޅާ ފިޔަވަޅެއްގެ ގޮތުން އެ މީހާގެ މަޢުލޫމާތު ޢާއްމުކުރަން ނިންމީ ކަމަށެވެ.

މި މައްސަލައިގައި ކޯޓުން މަޢުލޫމާތު ހާމަކޮށްފައިވަނީ އދ. މަންދޫ، ނޫރަންމާގެ، މުޙައްމަދު ޙަބީބު އެވެ.

ދަރިންނަށް ދޭންޖެހޭ ޚަރަދު ނުދީ ހިފަހައްޓާ ފަރާތްތަކުގެ ނަން ހާމަކުރުމަށް ފެމިލީ ކޯޓުން ނިންމީ 2018 ވަނަ އަހަރުއެވެ.

ނަމަވެސް އެ ކޯޓުން އެކަން ކުރުމުގެ ކުރީން، ޅ. ހިންނަވަރު ކޯޓުން އެކަން ވަނީ ފަށާފައެވެ. މިހާރު ފެމިލީ ކޯޓުންވެސް މަދު މަދުން ޚަރަދު ނުދޭ މީހުންގެ ނަން އާއްމު ކުރެއެވެ.