ސަރުކާރުގެ ރިކަރަންޓް ހަރަދުތައް ދަށްވެއްޖެ

އަހަރުގެ މިހާތަނަށް އާއިރު، ސަރުކާރުގެ ރިކަރަންޓް ހަރަދުތައް ނިސްބަތުން ދަށްވެފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން ނެރެފައިވާ ވީކްލީ ފިސްކަލް ރިޕޯޓުން ދައްކާގޮތުން ދައުލަތް ހިންގުމުގެ ހަރަދާއި ދަތުރުފަތުގެ ހަރަދުތައް ވަނީ ނިސްބަތުން ދަށަށް ގޮސްފައެވެ. އެގޮތުން މިހިނގާ މެއިމަހުގެ އެއްވަނަ ދުވަހުގެ ނިޔަލަށް ދައުލަތް ހިންގުމުގެ ޚަރަދު 8.6 އިންސައްތަ އަދި ދަތުރުފަތުރުގެ ޚަރަދު 21.8 އިންސައްތައިން ދަށްވެ، ޖުމުލަ ރިކަރަންޓް ޚަރަދު 3.3 އިންސައްތަ ވަނީ ދަށަށް ގޮސްފައެވެ.

މި ރިޕޯޓްގައިވާ ގޮތުން، މިހިނގާ މެއިމަހުގެ އެއްވަނަ ދުވަހުގެ ނިޔަލަށް އާމްދަނީގެ ގޮތުގައި 13.5 ބިލިޔަން ރުފިޔާ ދައުލަތަށް ލިބިފައިވާއިރު، މި މުއްދަތުގެ ތެރޭގައި ދައުލަތުގެ ޚަރަދުގެ ގޮތުގައި ރެކޯޑުކޮށްފައިވަނީ 12.0 ބިލިއަން ރުފިޔާއެވެ. މިދިޔަ އަހަރުގެ މެއިމަހުގެ އެއްވަނަ ދުވަހުގެ ނިޔަލަށް ދައުލަތުގެ ހަރަދުތައް 15.2 ބިލިއަން ރުފިޔާގައި ހުރިއިރު، އާމްދަނީ ހުރީ 13 ބިލިއަން ރުފިޔާގައެވެ.

އަހަރުގެ މިހާތަނަށް ދަތުރުފަތުރަށް 59.5 މިލިއަން ރުފިޔާ ހަރަދުވެފައިވައިރު، މިދިޔަ އަހަރުގެ މި މުއްދަތުގެ ތެރޭގައި ދަތުރުފަތުރަށް ކުރި ހޭދަ އުޅެނީ 76.1 މިލިއަން ރުފިޔާގައެވެ.

މިދިޔަ އަހަރުގެ މި މުއްދަތުގެ ތެރޭގައި 2.1 ބިލިއަން ރުފިޔާއިން ބަޖެޓް ޑެފިސިޓްވެފައި ހުރިނަމަވެސް މިއަހަރުގެ މިހާތަނަށް ބަޖެޓް ދައްކަނީ އަރަނިކޮށެވެ. މިއަހަރަށް ފާސްކޮށްފައިވާ ބަޖެޓުގައި މިއަހަރުގެ ތެރޭގައި ހިނގާނެކަމަށް އަންދާޒާކޮށްފައިވާ ޖުމުލަ ޚަރަދުގެ ތެރެއިން، 01 މެއި 2025 ގެ ނިޔަލަށް ހިނގާފައިވަނީ 24.3 އިންސައްތައެވެ. ސަރުކާރުގެ ފިސްކަލް ޕޮލިސީ ހަރުދަނާކުރުމަށް އެކުލަވައިލައިފައިވާ ސިޔާސަތުތައް މިއަހަރުގެ ތެރޭގައި ތަންފީޒުކުރަން ފަށައިފައިވުމާއެކު، ދައުލަތުގެ ޖުމުލަ ޚަރަދު، ނިމިގެންދިޔަ އަހަރުގެ މި މުއްދަތާ އަޅައިބަލާއިރު 21.3 އިންސައްތައިން ދަށްވެފައިވާކަމަށް ފިނޭންސުން ފާހަގަކުރެއެވެ.