ޖަލަށްލީ ރައީސް ޔާމީން އެންގެވި ގޮތަށް ބަޔާންދޭން ދެކޮޅުހެދުމުން: ޒިޔަތު

އެމްއެމްޕީއާރްސީގެ ޚިޔާނާތުގެ މައްސަލައިގައި ކަމަށްބުނެ ޖަލަށްލާފައިވަނީ ކުރީގެ ރައީސް އަބްދުﷲ ޔާމީން އެންގެވި ގޮތަށް ތަހުގީގަށް ބަޔާން ނުދީގެންކަމަށް އެމްއެމްޕީއާރްސީގެ ކުރީގެ މެނޭޖިންގް ޑިރެކްޓަރ އަހުމަދު ޒިޔަތު ވިދާޅުވެއްޖެއެވެ.

ޒިޔަތު މިހެން ވިދާޅުވީ އެމްއެމްޕީއާރްސީގެ މައްސަލައާއި ގުޅިގެން އެބޭފުޅާ ނެރުއްވި ބަޔާނެއްގައެވެ.

ޒިޔަތު ވިދާޅުވީ ފިނިފެންމާ ލޯންޗުގެ ހާދިސާއަށްފަހު ކުރީގެ ރައީސް ޔާމީނުއާއި ކުރީގެ ނައިބު ރައީސް އަދީބު އާއި ޖެހުނު މައްސަލައިގައި އެބޭފުޅާ ރައީސް އޮފީހަށް ޙާޟިރުކޮށް އަދީބުއާއި ދެކޮޅަށް ބަޔާންތަކެއް ދިނުމަށް ރައީސް ޔާމީން އެންގެވިކަމަށެވެ. ނަމަވެސް އެގޮތަށް އަމަލުކުރުމަށް ދެކޮޅު ހެދުމުން ކުޑައިރުކޮޅެއްގެ ތެރޭގައި އޭނާ ހައްޔަރު ކުރީ ކަމަށް ޒިޔަތު ވަނީ ވިދާޅުވެފައެވެ.

އޭނާ އިތުރަށް ވިދާޅުވީ އެމްއެމްޕީއާރުސީ މެދުވެރިކޮށް ރިސޯޓް ހެދުމަށްޓަކައި ރަށްތަކާއި ފަޅުތައް ކުއްޔަށް ދިނުމަށް ކުރެވުނު އެންމެހައި މުޢާމަލާތްތަކުގެ ފުރިހަމަ މަޢުލޫމާތު ކުރީގެ ރައީސް ޔާމީންއަށް އެނގިވަޑާއިގަންނަވާނެކަމަށެވެ. އަދި އެމްއެމްޕީއާރްސީއަށް ލިބުނު އެއްވެސް ޗެކެއް ކުރީގެ ނައިބު ރައީސް އަހުމަދު އަދީބާއި ހަވާލުކޮށްފައި ނުވާނެކަމަށާއި، އެމްއެމްޕީއާރްސީގެ ފައިސާއަށް ޚިޔާނާތްތެރިވެފައި ނުވާނެކަމަށްވެސް ޒިޔަތު ވަނީ ބަޔާންކުރައްވާފައެވެ.

ދޫނީދޫ ކުޑަގޮޅީގައި އެކަހެރިކޮށް ބާއްވައި، ދަންވަރު ނެރެ ވަކިގޮތަކަށް ބަޔާންދިނުމަށް އޭނާއަށް މަޖުބޫރުކޮށް ބަޔާން ނަގާފައިވާކަމަށެވެ. އަދި އޭނާގެ މައްޗަށް ކުރެވުނީ ސިޔާސީ ދައުވާއެއްކަމަށްވެސް ޒިޔަތު ވަނީ ސިފަކުރައްވާފައެވެ.

ޒިޔަތު ވިދާޅުވީ މިހާތަނަށް މިކަމުގައި އެއްޗެއް ބުނެފައިނުވަނީ ދިމާވެދާނޭ ނުރައްކަލަށް ޖެހިލުންވާތީ ކަމަށެވެ. ނަމަވެސް ކަންތައްތައް ހިނގައިދިޔަ ގޮތުގެ ބަޔާނެއް މިހާރު ނެރުމަށް ނިންމީ މިސަރުކާރުން އިންސާފު ޤާއިމުކޮށްދެއްވާނެ ކަމުގެ ޔަޤީންކަން އޮތުމުންކަމަށްވެސް ޒިޔަތު ވަނީ ފާހަގަކުރައްވާފައެވެ.