ޅ.ހިންނަވަރު ކައުންސިލް އިދާރާ ތިޖޫރީގެ ޑަބަލް ތަޅުދަނޑި ގެއްލި، ފައިސާ މަދުވުމުގެ މައްސަލަތަކެއް

ޅ.ހިންނަވަރު ކައުންސިލް އިދާރާ ތިޖޫރީގެ ޑަބަލް ތަޅުދަނޑި ގެއްލި، ފައިސާ މަދުވުމުގެ މައްސަލަތަކެއް ފާހަގަކުރެވިފައިވާކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.

ދައުލަތުގެ އޮޑިޓަރ ޖެނެރަލްގެ އޮފީހުން ނެރުއްވާފައިވާ ޅ.ހިންނަވަރު ކައުންސިލް އިދާރާގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ވަނީ ކައުންސިލް އިދާރާ ތިޖޫރީގެ ޑަބަލް ތަޅުދަނޑި ގެއްލުނުކަން ފާހަގަކޮށްފައެވެ. އަދި އޮޑިޓް ރިޕޯޓްގައި ވަނީ ތިޖޫރީއާ ގުޅޭގޮތުން ގިނަ ކަންތައްތަކެއް ފާހަގަކުރައްވާފައެވެ. އޭގެ ތެރޭގައި ތިޖޫރީއަށް ލާންޖެހޭ ފައިސާ ނުލައި ވަތްގަނޑުތަކުގައި ބެހެއްޓުމާއި، ތިޖޫރީ ހަފްތާ ރިޕޯޓް ނުކުރުމާއި، ތިޖޫރީން ފައިސާ މަދުވާ މައްސަލަ ހިމެނެއެވެ.

އޮޑިޓް ރިޕޯޓްގައި ބުނީ ކައުންސިލް އިދާރާގައި ހުރި ފައިސާ ރައްކާތެރިކަމާއެކު ބަލަހައްޓާފައި ނުވާކަމަށާއި، އެގޮތުން ތިޖޫރީއެއް ހުރިނަމަވެސް، ކައުންސިލް އިދާރާގެ ފައިސާ ބަލައިގަންނަ މުވައްޒަފާއި، ތިޖޫރީއާ ހަވާލުވެ ހުންނެވި ކައުންސިލްގެ ސެކްރެޓަރީ ޖެނެރަލްގެ މޭޒު ވަތްގަނޑުގައި ގިނަ އަދަދެއްގެ ފައިސާ ބަހައްޓާފައި ހުރިކަން ފާހަގަކުރެވޭ ކަމަށެވެ. އެގޮތުން ފައިސާ ބަލައިގަންނަ މުވައްޒަފުގެ މޭޒު ވަތްގަނޑުގައި 2024 ވަނަ އަހަރުގެ ޑިސެމްބަރުމަހުގެ 11 ވަނަ ދުވަހު 7،622 ރުފިޔާ ހުރިއިރު، ސެކްރެޓަރީ ޖެނެރަލްގެ މޭޒު ވަތްގަނޑުގައި 84،075 ރުފިޔާ ހުރިކަމަށް ރިޕޯޓްގައި ވަނީ ފާހަގަކޮށްފައެވެ.

އޮޑިޓް ރިޕޯޓްގައި ބުނީ ކައުންސިލް އިދާރާ ތިޖޫރީގެ އިތުރު ތަޅުދަނޑި ކޯޑާއެކު ގެއްލުނު ކަމުގެ މައުލޫމާތު މާލީ ޒިންމާދާރު ވެރިޔާ އޮޑިޓަރުންނަށް މައުލުމާތު ދިންނަމަވެސް މި ތަޅުދަނޑި ގެއްލުނުކަން ފުލުހުންނާއި ކައުންސިލް އިދާރާގެ އިސްވެރިންނަށް އަންގާފައި ނުވާކަމަށެވެ.

ކައުންސިލް އިދާރާއަށް ބަލައި ގަންނަ ފައިސާ ގަވާއިދުން ބޭންކު އެކައުންޓަށް ޖަމާކުރަމުން ނުދާއިރު، ފައިސާ ގުނިއިރު ނަގުދުގެ ގޮތުގައި ޖުމްލަ 103،247 ރުފިޔާ ހުރިކަމަށް އޮޑިޓް ރިޕޯޓްގައި ވަނީ ބުނެފައެވެ.

މީގެ އިތުރުން 2023 ވަނަ އަހަރާއި 2024 ވަނަ އަހަރުގެ ތެރޭގައި ތިޖޫރީގެ ހިސާބުތައް ބަލަހައްޓާފައި ނުވާތީވެ، ތިޖޫރީން 279،164 ރުފިޔާ މަދުވާކަމަށް އޮޑިޓް ރިޕޯތްގައި ވަނީ ބުނެފައެވެ.

އޮޑިޓް ރިޕޯތްގައި ވަނީ ތިޖޫރީގެ ހިސާބުތައް އަދާހަމަކޮށް އެއްވެސް ފައިސާއެއް ފާއިތުވެދިޔަ ތަނުގައި މަދުވެފައި ވޭތޯ ބަލައި ޔަގީންކޮށް ފައިސާ މަދުވާނަމަ، އެކަމުގައި އިހުމާލުވި ފަރާތެއްގެ އަތުން ފައިސާ އަނބުރާ ހޯދުމަށް އަންގާފައެވެ.