ބަނގުރާ ބުއިކަން ސާބިތުވެ 40 އެތިފަހަރުން ހައްދު ޖެހުމަށް ހުކުމްކޮށްފި

އައްޑޫ ސިޓީ ސ. ހިތަދޫގައި މީހަކު ބަނގުރާ ބުއިކަން ސާބިތުވެ 40 އެތިފަހަރުން ހައްދު ޖެހުމާއެކު 3،600 ރުފިޔާއިން ޖޫރިމަނާ ކުރުމަށް އެ ރަށު މެޖިސްޓްރޭޓް ކޯޓުން ހުކުމްކޮށްފިއެވެ.

ސ. ހިތަދޫ މެޖިސްޓްރޭޓް ކޯޓަށް ޕީޖީ އޮފީހުން ހުށެހެޅި ބަނގުރާ ބުއިމުގެ ކުށުގެ ދަޢުވާ މައްސަލައިގައި ހުކުމް އިއްވާފައިވަނީ ސ. ހިތަދޫ، ސީނިއާގެ، އަޙްމަދު ފަހްމީގެ މައްޗަށެވެ. މި މައްސަލައިގައި އޭނާގެ މައްޗަށް ހުކުމް އިއްވާފައިވަނީ އިއްޔެ އެ ކޯޓުން ބޭއްވި އަޑުއެހުމުގައެވެ.

މި މައްސަލައަކީ މިދިޔަ އަހަރު ފެބްރުއަރީ 9 ގައި 18:58 ހާއިރު ފަހްމީ ބަނގުރާ ބޮއެގެން ސ. ހިތަދޫ ނޫރާނީ ސްކޫލް ކައިރީގައި ދަނގަޑު ބުރިއެއް ހިފައިގެން ހުރިކަމަށް ތުހުމަތުކުރެވިގެން ފުލުހުންގެ ބެލުމުގެ ދަށަށް ގެންގޮސް، މައްސަލައިގެ ތަހުގީގުގައި އޭނާ މަސްތުވުމަށް ބަނގުރާ ބޭނުންކުރާ މީހެއްކަމަށް ބުނެ، ބަނގުރާ ބޯކަމަށް އިއުތިރާފުވެފައިވާތީ ހުށެހެޅުނު މައްސަލައެކެވެ.

އެއާއެކު ގާނޫނު ނަންބަރު 09/2014 ގެ 616 ވަނަ މާއްދާގެ (ރ) ގެ 2 ވަނަ ނަންބަރާއި ހަވާލާދީ އޭނާގެ މައްޗަށް ވަނީ ބަނގުރާ ބުއިމުގެ ކުށުގެ ދަޢުވާ އުފުލާފައެވެ.

މި މައްސަލައިގެ ޝަރީޢަތުގެ މަރުޙަލާގައި، ދަޢުވާލިބޭ އަޙްމަދު ފަހްމީ ވަނީ ޕްރޮސިކިއުޓަރ ޖެނެރަލްގެ އޮފީހާއެކު ކުށަށް އިއުތިރާފު ވުމުގެ އެއްބަސްވުމެއް ގާއިމުކޮށްފައެވެ. މި އެއްބަސްވުމުގެ ދަށުން، ކޯޓުގެ އިބްތިދާއީ އަޑުއެހުމުގައި އޭނާ ވަނީ އަމިއްލައަށް ކުށަށް އިއުތިރާފުވެފައެވެ.

ޝަރީޢަތުން މައްސަލަ ބެލުމަށްފަހު، ގާނޫނުލްއުގޫބާތުގެ 51 ވަނަ މާއްދާގެ (ހ) ގެ ދަށުން ދަޢުވާލިބޭ ފަރާތުގެ އިއުތިރާފަށް ރިޢާޔަތްކޮށް ކުށް ސާބިތުވާކަމަށް ވަނީ ކަނޑައަޅާފައެވެ. އަދި ދެފަރާތުގެ ދެމެދުގައި ވެވިފައިވާ އިއުތިރާފު ވުމުގެ އެއްބަސްވުމަށް ބަލައި، އަދަބު ކަނޑައެޅުމުގެ އުޞޫލުގެ ދަށުން އޭނާއަށް ދެވޭ އަދަބު ވަނީ ލުއިކޮށްދީފައެވެ.

އެ ގޮތުން، ކޯޓުން ނިޔާ ކަނޑައަޅައި ޙުކުމްކޮށްފައިވަނީ އިސްލާމީ ޝަރީއަތުގައިވާ ގޮތުގެ މަތިން 40 އެތިފަހަރުން ޙައްދު ޖެހުމާއެކު، -/3,600 ރުފިޔާއިން އޭނާ ޖޫރިމަނާ ކުރުމަށެވެ.

މި ޖޫރިމަނާގެ ފައިސާ ޙުކުމް ކުރެވުނު ދުވަހުން ފެށިގެން 2 މަސް ދުވަހުގެ ތެރޭގައި ސ. ހިތަދޫ މެޖިސްޓްރޭޓް ކޯޓަށް ދެއްކުމަށް ވަނީ އަންގާފައެވެ.