ފަޒުލް އާއި އެޗްޑީސީގެ ބޯޑު މެންބަރުން ސަސްޕެންޑް ކޮށްފި

ފުލުހުން އިސްނަގައިގެން އެޗްޑީސީގައި ކުރިއަށްގެންދާ ޖިނާއީ ތަޙުޤީޤާއު ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި، އެ ކުންފުނީގެ މެނޭޖިންގ ޑިރެކްޓަރާއި އެހެން ހުރިހާ މެންބަރުން، ތަޙްްޤީޤު ނިމެންދެން ސަސްޕެންޑް ކުރައްވައިފިއެވެ.

ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ ބޭފުޅުން ސަސްޕެންޑު ކުރީ ފުލުހުންގެ ތަހުގީގު މިނިވަންކަމާއެކު ބާރަށް ކުރިއަށް ގެންދިއުމަށް ޖާގަ ދިނުމަށް ކަމަށެވެ.

‏”މިކަމާގުޅިގެން ގޯތި ލިބިފައިވާ އެއްވެސް ފަރާތެއްގެ އެއްވެސް ޙައްޤަކަށް އުނިކަމެއް ލިބިފައިނުވާކަން އަދި ނުވެސް ލިބޭނެކަމުގެ ޔަޤީންކަން ހުރިހާ ފަރާތްތަކަށް އަރުވަމެވެ.“ ހީނާ ވިދާޅުވިއެވެ.

ބިންވެރިޔާ ސްކީމުގެ ލިސްޓުން ބޭރުން ހުޅުމާލެއިން ގޯތިތަކެއް ދިންކަމަށް ބުނާ މައްސަލާގައި ފުލުހުންގެ ފޮރެންސިކް ޓީމެއް އިއްޔެ ވަނީ އެޗްޑީސީއަށް ވަދެފައެވެ. ފުލުހުންގެ ޓީމް އެޗްޑީސީއަށް ވަދެފައިވަނީ ހަވީރުގެ ވަގުތެއްގައެވެ. މި މައްސަލައިގެ ޖިނާއީ ތަހުގީގެއް ހިންގަމުންދާކަމަށް ފުލުހުންވެސް ވަނީ ބުނެފައެވެ.

މިމައްސަލައާއި ގުޅިގެން އިއްޔެ އެޗްޑީސީން ވަނީ ނޫސްވެރިންގެ ބައްދަލުވުމެއްވެސް ބާއްވާފައެވެ.

އެ ބައްދަލުވުމުގައު ފަޒުލްގެ ބޭބެއަށް އެޗްޑީސީން ގޯތި ދިންކަމަށް ދެކެވެމުންދާ ވާހަކަތަކާ ގުޅޭގޮތުން ފަޒުލް ވިދާޅުވީ، އެފަދަ ކަމެއް ކޮށްފައި ނުވާނޭކަމަށާއި، ބިންވެރިޔާ ސްކީމުން ގޯތި ދިނުމުގައި މައްސަލައެއް އުޅޭކަން ފާހަގަކުރެވިގެން އެކަން ހައުސިން މިނިސްޓްރީގެ ސަމާލުކަމަށް ގެނައީވެސް އެޗްޑީސީން ކަމަށެވެ.

ފަޒުލް ވިދާޅުވީ، މި މައްސަލާގައި ފުލުހުން ކުރަމުންދާ ތަހުގީގުތަކަށް އެޗްޑީސީގެ ފަރާތުން ފުރިހަމަ އެއްބާރުލުން ދޭނޭކަމަށާއި، ޖުމްލަ ގޮތެއްގައި މިކަންކަން ހިނގާ ގޮސްފައިވާ ކަންކަން ބަލަންޖެހޭކަމަށެވެ.