ރައީސް އެންގެވި ގޮތަށް އަރަބިއްޔާ ސްކޫލުގެ ކުރީގެ އިމާރާތް ތަޅާލުމުގެ މަސައްކަތް ފަށައިފި

އަލްމަދަރުސަތުލް އަރަބިއްޔަތުލް އިސްލާމިއްޔާ ކުރިން ހިންގި އިމާރާތް ތަޅައިލުމުގެ މަސައްކަތް މިނިސްޓްރީ އޮފް ސިޓީސް، ލޯކަލް ގަވާމަންޓް އެންޑް ޕަބްލިކް ވޯކްސްއިން މިއަދު ފަށައިފިއެވެ.

އަންގާރަ ދުވަހު މައްޗަންގޮޅި ރައްޔިތުންނާއެކު ބޭއްވި ބައްދަލުވުމުގައި ރައީސް ޑރ. މުހައްމަދު މުއިއްޒު ވިދާޅުވީ، ކުރީގެ އަރަބިއްޔާ ސްކޫލް ހިންގި އިމާރާތް ބާވެ، އެ ތަން ނުރައްކާތެރި ހާލަތަކަށް ގޮސްފައިވާތީ އިމާރާތް ތަޅާލުމުގެ މަސައްކަތް ފެށުމަށް ތައްޔާރުވެފައިވާ ކަމަށެވެ.

އަދި އެތަން ތަޅާލުމަށްފަހު، އެތަނުގައި ސައިކަލު ޕާކިންއަށް ހާއްސަ ތަނަކާއި، ކޮމިއުނިޓީ ޕާކެއް ތަރައްގީ ކުރަން ވިސްނަވާފައިވާ ކަަމަށް ވެސް ރައީސް ވިދާޅުވިއެވެ.

އެ މަސައްކަތް މިއަދު ފަށާފައިވާއިރު، ވަޒީރު އާދަމް ޝަރީފް އުމަރު ވިދާޅުވީ،އެ އިމާރާތް ހުންނަ ސަރަހައްދުގައި އާމިއްޔާ ސުކޫލާއި އިސްކަންދަރު ސުކޫލް ހުންނައިރު، އެއީ ވަރަށް ގިނަ އެހެން އިމާރާތްތައްވެސް ހުރި ސަރަހައްދެއް ކަމަށެވެ.

އެހެންކަމުން އެ ސުކޫލްތަކުގެ ކުދިންނާއި މުވައްޒަފުންގެ އިތުރުން އާއްމުންގެ ރައްކާތެރިކަމަށްވެސް އިސްކަންދޭންޖެހޭ ކަމަށެވެ.

މާލޭގައި ބައުވެ، ބޭނުން ނުކުރެވޭ ފަދަ ޙާލަތްތަކުގައި ހުރި، އަދި އެ ފަދަ ތަންތަނުގެ ސަބަބުން ނުރައްކާތެރި ޙާދިޘާއެއް މެދުވެރިވެދާނެ ކަމަށް ފެންނަ ޢިމާރާތްތައް ތަޅައިލުމުގެ މަސައްކަތްތަކުގެ ތެރެއިން 4 ޢިމާރާތެއް ތަޅައިލުމުގެ މަސައްކަތް ވަނީ އެ މިނިސްޓްރީން މީގެ ކުރިން ނިންމާފައެވެ.

އެއީ މއ. ރަބީޢުވިލާއާއި، އޯކިޑް ޕްލާޒާއާއި، ނިއު ޕްލާޒާގެ އިތުރުން ހައުސް ޕްލާޒާއެވެ. މިނިސްޓްރީއާ ތަޅައިލަން ޙަވާލުކުރެވިފައިވާ ޢިމާރާތްތަކުގެ ތެރޭގައި ހިމެނޭ، ކުރީގެ ކްރިމިނަލް ކޯޓު ހިންގި ޢިމާރާތުގެ މަސައްކަތް ވެސް ކައިރި ތާރީޚެއްގައި ފެށޭނެ ކަމަށް މިނިސްޓްރީން ބުނެއެވެ.