ފޯޅަވަހީގެ މައްޗަށް އެންމެ ހައްގުކަން ބޮޑީ ރާއްޖެ: ރައީސް މުޢިއްޒު

ޗާގޮސް އައިލެންޑްސް ނުވަތަ "ފޯޅަވަހި" ގެ ނަމުން މަޝްހޫރުވެފައިވާ ރަށްތަކުގެ މިލްކުވެރިކަން މޮރިޝަސްއަށްވުރެ ހައްގުކަންބޮޑީ ރާއްޖެއަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިނގިރޭސިވިލާތުގެ "އެކްސްޕްރެސް" ނޫހަށް ދެއްވި ޚާއްޞަ ބަސްދީގަތުމެއްގައި ރައީސް މުޢިއްޒު ވިދާޅުވީ، ފޯޅަވަހީގެ މައްސަލާގައި ދިވެހި ސަރުކާރުގެ ކަންބޮޑުވުންތަކާއި ރާއްޖޭގެ ދަޢުވާ ރަސްމީ ސިޓީ މެދުވެރިކޮށް އިނގިރޭސި ސަރުކާރަށް ހުށަހަޅާފައިވާނެ ކަމަށެވެ.

ރައީސް ވިދާޅުވި ގޮތުގައި، ޖިއޮގްރަފީ ގޮތުންނާއި، ތާރީޚީ އަދި ގާނޫނީ ގޮތުން ބެލިޔަސް، އެ ރަށްތަކުގެ މައްޗަށް މޮރިޝަސްއަށްވުރެ ބޮޑު ހައްގެއް އޮތީ ދިވެހިރާއްޖެއަށެވެ.

"ފޯޅަވަހީގެ މިލްކުވެރިކަމަށް އެހެން ކޮންމެ ގައުމަކަށްވުރެ ރާއްޖޭގެ ހައްގު ބޮޑުކަމަށް އަޅުގަނޑުމެން ގަބޫލުކުރަނީ ތާރީޚީ ހެކިތަކުގެ މައްޗަށް ބިނާކޮށް،" ރައީސް މުޢިއްޒު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، މި މައްސަލައިގައި ޚިޔާލުތަފާތުވުންތަކެއް ހުރި ނަމަވެސް، އިނގިރޭސިވިލާތާއި ރާއްޖެއާ ދެމެދު އޮތް ގުޅުން ވަރުގަދަ ކަމަށެވެ. އަދި ރާއްޖެއަކީ އިނގިރޭސިވިލާތުގެ ރައްޔިތުންގެ މެދުގައި އެންމެ މަގުބޫލު އެއް މަންޒިލްކަން އެމަނިކުފާނު ފާހަގަކުރެއްވިއެވެ.

ތަފާސްހިސާބުތަކަށް ބަލާއިރު، މޮރިޝަސްގެ ވެރިރަށް ޕޯޓް ލުއިސްއާ ފޯޅަވަހި އޮތީ 1,300 މޭލު ދުރުގައެވެ. ނަމަވެސް ރާއްޖޭގެ ވެރިރަށް މާލެއާ ފޯޅަވަހި އޮތީ އެންމެ 310 މޭލު ދުރުގައެވެ. މީގެ އިތުރުން، ފޯޅަވަހިން ފެނިފައިވާ 900 އަހަރަށްވުރެ ބާދަވެފައިވާ މަހާނަގާތަކުގައި ދިވެހި ބަހުން ލިޔުންތައް ހުރިކަމީ އެތަނާއި ދިވެހިންނާ އޮތް ޒަމާންވީ ގުޅުމުގެ ހެއްކެކެވެ. 16 ވަނަ ގަރުނުގެ ދިވެހި ރަސްކަލެއްގެ ފަތްކޮޅުތަކުންވެސް ފޯޅަވަހީގެ މައްޗަށް ދިވެހި ދައުލަތުގެ ބާރު ހިނގާކަން އެނގެން އެބައޮތެވެ. މިއީ މޮރިޝަސްގައި އިންސާނުން ވަޒަންވެރިވުމުގެ 100 އަހަރު ކުރިއެވެ.

އިނގިރޭސި ބޮޑުވަޒީރު ކީރް ސްޓާމަރގެ ސަރުކާރުން މޮރިޝަސްއާއެކު އެއްބަސްވެފައިވަނީ، ޗާގޮސްގެ ރަށްތައް މޮރިޝަސްއަށް ދިނުމަށެވެ. ނަމަވެސް ސްޓްރެޓީޖިކް ގޮތުން މުހިންމު ޑިއޭގޯ ގާސިއާ މިލިޓަރީ ބޭސް 99 އަހަރަށް ކުއްޔަށް ހިފުމަށެވެ. މި އެއްބަސްވުމުގެ ދަށުން އިނގިރޭސިވިލާތުން އަހަރަކު 100 މިލިއަން ޕައުންޑް ކުލީގެ ގޮތުގައި ދައްކަން ޖެހޭއިރު، ޖުމްލަ ޚަރަދު 35 ބިލިއަނާއި 80 ބިލިއަން ޕައުންޑާ ދެމެދުގެ އަދަދަކަށް އަރާނެ ކަމަށް ބެލެވެއެވެ.