ކަޅު ބާޒާރަށް ފައިސާ ފޯރުކޮށްދެނީ މަޝްހޫރު ރިސޯޓުތަކުން؛ އެއީ މަނީ ލޯންޑަރ ކުރުން: އިޙްސާން

ކަޅުބާޒާރުގައި ޑޮލަރު މާރުކުރާ ފަރާތްތަކަށް ބޭރު ފައިސާ ފޯރުކޮށްދެނީ ރާއްޖޭގެ ބޮޑެތި ރިސޯޓުތަކާއި ޑޮލަރުން އާމްދަނީ ހޯދާ ވިޔަފާރިތަކުން ކަމަށް މިނިސްޓަރު އިޙްސާން ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ ލައިސަންސެއް ނެތި ޑޮލަރު މާރުކުރާ ތަންތަނަކީ އެ ފަރާތްތައް އަމިއްލައަށް ބޭރު ފައިސާ އެތެރެކުރާ ނުވަތަ ޚިދުމަތެއް ދީގެން ޑޮލަރު ހޯދާ ތަންތަން ނޫން ކަމަށެވެ. އެ ތަންތަނަށް ޑޮލަރު ލިބެނީ ޓޫރިޒަމް ދާއިރާގައި ހަރަކާތްތެރިވާ ނަން މަޝްހޫރު ރިސޯޓު ޗެއިންތަކާއި ކޮންސްޓްރަކްޝަން ފަދަ ދާއިރާތަކުން ޑޮލަރުން ފައިދާ ހޯދާ ކުންފުނިތައް މެދުވެރިކޮށް ކަމަށް ވެސް ވިދާޅުވިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރެކޯޑްތަކަށް ހަވާލާ ދެއްވައި މިނިސްޓަރު ވިދާޅުވީ ރަޖިސްޓްރީ ކޮށްގެން ހިންގާ މަނީ އެކްސްޗޭންޖަރުންގެ ޢަދަދަކީ 63 ކަމަށެވެ. އެހެން ނަމަވެސް އެއްވެސް ހުއްދައެއް ނެތި މި ވިޔަފާރި ހިންގާ ގިނަ ފަރާތްތަކެއް ފާހަގަކުރެވިފައިވާ ކަމަށާއި އޭގެ ތެރޭގައި ޑޮލަރުން އާމްދަނީ ލިބޭ ވަކިވަކި ފަރުދުން ވެސް ހިމެނޭ ކަމަށް ވިދާޅުވިއެވެ.

އެގޮތުން ރަޖިސްޓްރީނުކޮށް މަނީ އެކްސްޗޭންޖް ކުރާ ފަރާތްތަކުގެ ތެރެއިން 7 ފަރާތަކުން މިދިޔަ 9 މަސްދުވަހުގެ ތެރޭގައި 76 މިލިއަން ޑޯލަރު ކަޅުބާޒާރުގައި ވިއްކާފައިވާ ކަމަށް މިނިސްޓަރު އިހުސާން ވިދާޅުވި އެވެ.

"އަޅުގަނޑުމެންނަށް މީގެ ތެރޭގައި އެބަ ފާހަގަކުރެވޭ ރާއްޖޭގައި ނަން މަޝްހޫރު ރިސޯޓްތައް. އޭގެ ތެރެއިން އެއް ރިސޯޓު ޗޭނަކުން މިދިޔަ ނުވަމަސް ދުވަސް ތެރޭގައި ހަތަރު މިލިއަން ޑޮލަރު ކަޅުބާޒާރުގައި މާރުކޮށްފައިވޭ. އެމްއެމްއޭގެ އުސޫލުން މާރުކުރަން ޖެހޭ މިންވަރު މިއަށްވުރެ ކުޑަ. އެކަމަކު އެމްއެމްއޭއަށް މާރުކުރަން ޖެހޭއިރު ޑޮލަރު ނުހުރޭ ކަޅުބާޒާރަށް ނެރެން ޑޮލަރު އެބަހުރޭ"

ޤާނޫނީ ގޮތުން ހުއްދަ ނަގައިގެން ކުރަންޖެހޭ ކަމެއް ހުއްދައެއް ނެތި ކުރުމަކީ ޖިނާއީ ކުށެއް ކަމަށާއި އެ ގޮތަށް ހޯދާ ފައިސާ ވިޔަފާރީގައި ނުވަތަ އަމިއްލަ ބޭނުމަށް ޚަރަދުކުރުމަކީ މަނީ ލޯންޑްރިންގގެ ޢަމަލެއް ކަމަށް މިނިސްޓަރު ވިދާޅުވިއެވެ. އެހެންކަމުން އެ ފަރާތްތައް އެނގިގެންނާއި ނޭނގި ނަމަވެސް ބައިވެރިވަނީ މަނީ ލޯންޑްރިންގގެ ޢަމަލުތަކެއްގައި ކަމަށް ވެސް ވިދާޅުވިއެވެ.

ހުއްދަ ނުނަގާ މަނީ އެކްސްޗޭންޖު ކުރުމަކީ ޖިނާއީ ކުށެކޭ. އެ ޖިނާއީ ކުށް ކޮށްގެން މިހޯދާ ފައިސާ، އަމިއްލަ ގޮތުގައި ބޭނުން ކުރުމާއި ވިޔަފާރީގެ ގޮތުގައި ބޭނުން ކުރުމާއި އޭގެން ފައިދާ ހޯދުމަކީ ރާއްޖޭގެ ގާނޫނުގައި މިވަގުތު ބުނާ ގޮތުން މަނީ ލޯންޑްރިން. އެ ފަރާތްތަކުން މިއެންގޭޖުވަނީ އެނގިގެން ވިޔަސް، ނޭނގި ވިޔަސް، މަނީ ލޯންޑަރިން ހަރަކާތްތަކުގައި."

ހުއްދައެއް ނެތި ޑޮލަރު މާރުކުރުމަކީ ބައެއް ފަރާތްތަކުން އާދައިގެ ކަމެއް ކަމަށް ދެކުނަސް އެއީ ސީރިއަސް ޖިނާއީ ކުށެއް ކަމަށް މިނިސްޓަރު ފާހަގަކުރެއްވިއެވެ.