6 ސުކޫލެއްގެ އައު އިމާރާތް އެޅުމަށް އާރްޑީސީއަށް

ރާއްޖޭގެ 6 ސުކޫލެއްގެ އައު އިމާރާތް އެޅުމުގެ މަސައްކަތް އާރްޑީސީއާއި ހަވާލުކޮށްފިއެވެ.

މިއީ ރާއްޖޭގެ އެކި ހިސާބުތަކުން 29 ސުކޫލެއްގެ އައު އިމާރާތް ބިނާކުރުމަށް މިނިސްޓްރީ އޮފް އެޑިޔުކޭޝަންއިން ސަރުކާރުގެ 3 ކުންފުންޏާއި ހަވާލުކުރުމުގެ ތެރެއިންނެވެ.

މި އެއްބަސްވުމުގައި އާރްޑީސީގެ ފަރާތުން ޗީފް ފައިނޭންޝަލް އޮފިސަރ އަލްފާޟިލް ޙަސަން ރިފާއީ ބުޝްރީ ސޮއިކުރެއްވިއިރު، މިނިސްޓްރީ އޮފް އެޑިޔުކޭޝަންގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. ޢަބްދުއްލަޠީފް މުޙައްމަދުއެވެ.

މި އެއްބަސްވުމުގެ ދަށުން ހއ. އުލިގަމު ސްކޫލްގެ މަލްޓި-ޕާޕަސް ހޯލާއި ސްޓާފް ރޫމް އިމާރާތް ކުރުމާއި، ހއ. އިހަވަންދޫ ސްކޫލްގައި 12 ކްލާސްރޫމްގެ އިމާރާތެއް ބިނާކުރުމާއި، ރ. ހުޅުދުއްފާރު ސްކޫލްގައި ސްޓޫޑަންޓް އެޑްމިން ބްލޮކެއް ޤާއިމުކުރުމުގެ އިތުރުން ރ. އަތޮޅު ތަޢުލީމީ މަރުކަޒުގެ އުމްރާނީ ތަރައްޤީގެ މަސައްކަތްތަކާއި، ކ. ގާފަރު ސްކޫލްގައި 8 ކްލާސްރޫމާއި ހޯލް އިމާރާތް ކުރުމާއި، ކ. ގުރައިދޫގައި އައު ސްކޫލެއް ބިނާކުރުމުގެ މަސައްކަތްވެސް އާރްޑީސީއިން ކުރާނެއެވެ.

އާރްޑީސީގެ އިތުރުން، މި މަޝްރޫއުތައް ހަވާލުކޮށްފައިވަނީ ފަހި ދިރިއުޅުން ކޯޕަރޭޝަން (އެފް.ޑީ.ސީ) އާއި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ (އެމް.ޓި.ސީ.ސީ) އާއިއެވެ. އެގޮތުން ފަހި ދިރިއުޅުން ކޯޕަރޭޝަންއާއި ހަވާލުކޮށްފައިވަނީ 18 މަޝްރޫއެކެވެ. އަދި ބާކީ 4 މަޝްރޫއު ހަވާލުކޮށްފައިވަނީ އެމްޓީސީސީއާއިއެވެ.