އެފްޑީސީ އެޗްޑީސީގެ ދަށަށް އަދި އާރްއޭސީއެލް އެމްއޭސީއެލްގެ ދަށަށް ގެންނަނީ
ލިޔުންތެރިޔާ
ޚަދީޖާ އަރުފާ
ސަރުކާރު ހިއްސާވާ ކުންފުނިތައް (އެސްއޯއީ)ތައް ރިފޯމްކުރުމަށް ކުރަމުންދާ މަސައްކަތުގެ ތެރެއިން، ރީޖަނަލް އެއާޕޯޓްސް ކޮމްޕެނީ އެމްއޭސީއެލްގެ ދަށަށް އަދި ފަހިދިރިއުޅުން ކޯޕަރޭޝަން އެޗްޑީސީގެ ދަށަށް ބަދަލުކުރެވޭނެ ގޮތްތަކާއި ބެހޭގޮތުން މިއަދު މަޝްވަރާކުރައްވާނެކަމަށް ރައީސުލްޖުމުހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދުގެ ކެބިނެޓް ބައްދަލުވުމަށް ވަޑައިގެންމެވުމުގެ ކުރިން މީޓީންގ ގައި މަޝްވަރާ ކުރެވިގެންދާނެ ކަންކަމާއި ގުޅޭ ގޮތުން މައުލޫމާތު ހިއްސާ ކުރައްވަމުން ރައީސް މުޢިއްޒު ވިދާޅުވީ، މިއަދުގެ ކެބިނެޓް ބައްދަލުވުމަށް މުހިއްމުކަންތައްތަކެއް އެޖެންޑާކުރެވިފައިވާކަމަށެވެ.
އެގޮތުން، މިދިޔަ ހަފްތާގައި އެސްއޯއީ ރިފޯމްގެ ތެރެއިން އެސްޓީއޯގެ ދަށަށް ފެނަކަ ގެންދަން ނިންމާފައިވާ ނިންމުމަކީ ވަރަށް މުހިއްމު ނިންމުމެއްކަން ފާހަގަކުރައްވާ އެމަނިކުފާނު ވިދާޅުވީ އެސްއޯއީ ރިފޯމްގެ މަސައްކަތުގެ ތެރެއިން މިއަދުވެސް މުހިއްމު މަޝްވަރާތަކެއް އެބަހުރިކަމަށެވެ.
"އެގޮތުން ރީޖަނަލް އެއާޕޯޓްސް ކޮމްޕެނީ އެމްއޭސީއެލްގެ ދަށަށް ބަދަލުކުރުން އަދި އެ ދެ ކުންފުނި އެކީގައި ހިންގޭނެ ގޮތްތަކެއް މަޝްވަރާކުރުން އެބަ އޮތް، އޭގެ ސަބަބުން ވާނެ ފައިދާތައް ވަރަށް ގިނަ ގުނަ، އަދި އެޗްޑީސީއާ ފަހިދިރިއުޅުން ކޯޕަރޭޝަން މި ދެ ކުންފުނި އެއްކޮށް ހިންގުން ނޫނީ އެ ކުންފުނި އެޗްޑީސީގެ ދަށުން ހިންގާ ކުންފުންޏަކަށް ހެދުން، މިވެސް ވަރަށް ފައިދާހުރި ކަމެއް"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެއިތުރުން މޯލްޑިވްސް ފަންޑް ލިމިޓެޑް ކޯޕަރޭޝަން އަދި ބީސީސީ އެކީގައި މަސައްކަތް ކުރެވޭނެ ގޮތްތަކެއް ހޯދުމަށް މަޝްވަރާކުރުމަށް ވެސް މިއަދަށް އެޖެންޑާކޮށްފައިވާކަމަށް އެމަނިކުފާނު ވިދާޅުވިއެވެ.
އެއާއެކު ރައީސް މުއިއްޒު ވަނީ، އިގުތިސާދު ސިންދަފާތުކުރަން ބޭރުގެ ބައެއް ގައުމުތަކެކޭ އެއްގޮތަށް އިންވެސްޓާ ރެސިޑެންސީ ޕްރޮގްރާމެއް ތައާރަފުކުރަން ވެސް މިއަދުގެ ވަޒީރުންގެ މަޖިލީހުގައި މަޝްވަރާކުރަން ނިންމާފައިވާ ކަން ހާމަކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
