އުވާލާފައިވާ ހިރިމަރަދޫ ކައުންސިލް އަލުން އިޢާދަކޮށް އިންތިޚާބު ބާއްވަން އެމްޑީޕީން ގޮވާލައިފި

ހދ. ހިރިމަރަދޫ އަކީ ފަޅުރަށެއްގެ ގޮތުގައި ކަނޑައަޅައި، އެ ރަށުގެ ކައުންސިލް ލާމަރުކަޒީ ޤާނޫނާ ޚިލާފަށް އުވާލާފައިވާތީ، އެކަން ބާޠިލުކޮށް ރަށު ކައުންސިލް އަލުން އިޢާދަކުރުމަށްފަހު އިންތިޚާބު ބޭއްވުމަށް އިދިކޮޅު އެމްޑީޕީން ސަރުކާރަށް ގޮވާލައިފިއެވެ.

މިކަމަށް ގޮވާލާފައިވަނީ އެމްޑީޕީގެ ލާމަރުކަޒީ ކޮމިޓީގެ 6 މެންބަރުންގެ ސަބްކޮމިޓީއަކުން އެކުލަވާލި ޚާއްޞަ ދިރާސާ ރިޕޯޓެއްގައެވެ. މި ރިޕޯޓް ތައްޔާރުކުރުމަށްޓަކައި ހިރިމަރަދޫގެ ރައްޔިތުންނާއި، ހަނިމާދޫ ކައުންސިލާއި، ދާއިރާގެ މަޖިލިސް މެންބަރުގެ އިތުރުން ފަންނީ މާހިރުންގެ ލަފާ ހޯދާފައިވާ ކަމަށް އެމްޑީޕީން ބުނެއެވެ.

އެމްޑީޕީގެ ރިޕޯޓުގައި ފާހަގަކޮށްފައިވާ ގޮތުގައި، ރައީސުލްޖުމްހޫރިއްޔާގެ އޮފީހުގެ ނަންބަރު 36/2025 ޤަރާރުން ހިރިމަރަދޫ އަކީ ފަޅުރަށެއް ކަމަށް ކަނޑައަޅައި ކައުންސިލް އުވާލާފައިވަނީ ލާމަރުކަޒީ ޤާނޫނާއި އިންތިޚާބުތަކާ ބެހޭ އާންމު ޤާނޫނާ ޚިލާފަށެވެ. މި ނިންމުމުގެ ސަބަބުން އެ ރަށުގައި ދިރިއުޅޭ 300 އަށްވުރެ ގިނަ ރައްޔިތުންނާއި ސްކޫލް ކުދިންގެ އަސާސީ ޙައްޤުތައް ގެއްލި، އިޖުތިމާޢީ އަދި ނަފްސާނީ ގޮތުން ބޮޑެތި ތަކްލީފުތަކެއް އުފުލަން ޖެހިފައިވާ ކަމަށް އެ ޕާޓީން ބުނެއެވެ.

ރިޕޯޓުގައި ބަޔާންކޮށްފައިވާ ގޮތުގައި، މި އަމަލުގެ ފަހަތުގައި ވަނީ ސަރުކާރު ހިންގާ ޕީއެންސީއަށް ސިޔާސީ ނާޖާއިޒު މަންފާއެއް ހޯދައިދިނުމެވެ. ހިރިމަރަދޫ ރައްޔިތުން ހަނިމާދޫއަށް ބަދަލުކުރުމަށް 184 ހައުސިންގ ޔުނިޓު އަޅައިދޭނެ ކަމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ވައުދުވި ނަމަވެސް، 6 މަސް ފާއިތުވީއިރުވެސް އަމަލީ އެއްވެސް މަސައްކަތެއް ކުރިއަށް ނުދާކަން އެމްޑީޕީން ފާހަގަކުރެއެވެ.

މީގެ އިތުރުން، ރަށެއް ފަޅުކުރެވޭނީ އެ ރަށެއްގެ ރަޖިސްޓްރީވެފައިވާ ހުރިހާ ރައްޔިތުން އެހެން ރަށަކަށް ބަދަލުވުމުން ކަމަށްވާއިރު، އަދިވެސް ރައްޔިތުން ރަށުގައި ތިއްބާ ކައުންސިލް އުވާލުމަކީ ޤާނޫނު އަސާސީއާ ޚިލާފު ބާޠިލު ކަމެއް ކަމަށް އެމްޑީޕީގެ ރިޕޯޓުގައިވެއެވެ. މިކަމުގެ ސަބަބުން ރައްޔިތުންނަށް ލިބޭ ގެއްލުމުގެ ބަދަލު ސަރުކާރުން ދޭންޖެހޭނެ ކަމަށްވެސް ބުނެފައިވެއެވެ.

މި މައްސަލަ ހައްލުކުރުމަށްޓަކައި އެމްޑީޕީން ވަނީ މުހިންމު ފިޔަވަޅުތަކެއް އެޅުމަށް ނިންމާފައެވެ. އޭގެ ތެރޭގައި ރައީސްގެ ޤަރާރު ބާޠިލުކުރުމަށް ކޯޓަށް ހުށަހެޅުމާއި، ދައުލަތުގެ މުއައްސަސާތައް ޖަވާބުދާރީކުރުވުން ހިމެނެއެވެ.

އެމްޑީޕީން ގޮވާލަނީ ހިރިމަރަދޫ އަކީ މީހުން ދިރިއުޅޭ ރަށެއްގެ ގޮތުގައި އަލުން ކަނޑައަޅައި، ރައްޔިތުންގެ ޚިދުމަތުގައި ދެމިއޮންނާނެ ކައުންސިލެއް އިންތިޚާބު ކުރުމަށެވެ.