ޣައްޒާއަށް އެމެރިކާއިން ހުށަހެޅި 15 ނުކުތާގެ ސުލްހައިގެ ޕްލޭން އިސްރާއީލުން ގަބޫލެއް ނުކުރި

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ރައީސް ޑޮނަލްޑް ޓްރަމްޕް ޣައްޒާއަށް ހުށަހެޅި 15 ނުކުތާގެ ސުލްހައިގެ ޕްލޭން ގަބޫލުނުކުރާނެކަން އިިއުލާންކޮށްފިއެވެ.

ނަތަންޔާހޫ ބުނީ ޙަމާސް ޖަމާއަތުން "ހަގީގީ މާނައިގައި" ހަތިޔާރު ބަހައްޓަންދެން އިސްރާއީލުގެ ސިފައިން ޣައްޒާއިން ފޭބުމުގެ އެއްވެސް މަސައްކަތެއް ނުކުރާނެ ކަމަށެވެ.

އާދިއްތަ ދުވަހު ބޭއްވި ކެބިނެޓް ބައްދަލުވުމެއްގައި ވާހަކަދައްކަމުން ނަތަންޔާހޫ ބުނީ، 15 ނުކުތާގެ މައްޗަށް އެކުލެވޭ އެ ލިޔުމަށް އިސްރާއީލުން ދެކޮޅު ހަދާ ކަމަށެވެ. އަދި އިސްރާއީލުގެ ސިފައިންނާއި ރައްޔިތުންނަށް އޮތް ނުރައްކާތައް ނައްތާލުމަށްޓަކައި ކުރާ މަސައްކަތްތައް ކުރިއަށް ގެންދާނެ ކަމަށް އޭނާ ބުންޏެވެ.

މިދިޔަ މަހު ޓްރަމްޕްގެ "ބޯޑް އޮފް ޕީސް" އިން ބުނެފައިވަނީ ޙަމާސްއާއި ޣައްޒާގައި ހަރަކާތްތެރިވާ އެހެނިހެން ހަތިޔާރު އެޅި ޖަމާއަތްތަކުން "މުޅިން ހަތިޔާރު ބެހެއްޓުމަށް" އެއްބަސްވުމަކަށް އާދެވިފައިވާ ކަމަށެވެ. ނަމަވެސް ޙަމާސްއިން ބުނަމުންދަނީ ބަރު ހަތިޔާރު ދޫކޮށްލެވޭނީ އިސްރާއީލުން ޣައްޒާއަށް ދެމުންދާ ހުރިހާ ހަމަލާތަކެއް ހުއްޓާލައި، އެ ސަރަހައްދުން އިސްރާއީލުގެ ސިފައިން ފޭބުމުން ކަމަށެވެ.

މިދިޔަ އަހަރުގެ ސެޕްޓެމްބަރު މަހު ޓްރަމްޕް އިއުލާންކުރި މި މަޝްރޫއުގެ ދަށުން، އެއްބަސްވުން ތަންފީޒުކުރުމަށް "ބޯޑް އޮފް ޕީސް" އެއް އުފެއްދުމަށާއި، ޣައްޒާ އަލުން އާބާދުކުރުމަށް ހިމަނާފައިވެއެވެ. ނަމަވެސް އިސްރާއީލުން މިކަމަށް ދެކޮޅު ހެދުމަކީ މި ސުލްހައިގެ މަޝްރޫއަށް ލިބުނު ބޮޑު ހީނަރުކަމެކެވެ.

ޙަމާސްގެ އޮފިޝަލަކު ބީބީސީއަށް މައުލޫމާތު ދެމުން ބުނެފައިވަނީ، އެ ޖަމާއަތުން އެއްބަސްވުމަށް އިހުތިރާމްކުރާ ކަމަށާއި، 15 ނުކުތާގެ މަޝްރޫއު ތަންފީޒުކުރުމަށް ތައްޔާރަށް އޮތް ކަމަށެވެ. އަދި މެދުވެރިއެއްގެ ދައުރު އަދާކުރާ ހުރިހާ ފަރާތްތަކަކުން ވެސް އެއްބަސްވުމާ އެއްގޮތަށް އަމަލުކުރޭތޯ ކަށަވަރުކުރުމަށް ޙަމާސްއިން ވަނީ ގޮވާލާފައެވެ.

އިސްރާއީލުގެ ސިޔާސީ މަސްރަހު ދިރާސާކުރާ ފަރާތްތަކުން ބުނާ ގޮތުގައި، ނަތަންޔާހޫ މިފަދަ ހަރުކަށި ނިންމުމެއް ނިންމީ ކުރިއަށް އޮތް އިންތިޚާބާއި، އޭނާގެ ކޯލިޝަންގައި ހިމެނޭ ހަރުކަށި ފިކުރުގެ މެންބަރުންގެ ޕްރެޝަރާ ހެދިއެވެ. ޚާއްސަކޮށް ނޭޝަނަލް ސެކިއުރިޓީ މިނިސްޓަރު އިތަމާރު ބެން ޣަވީރު ފަދަ ނިރުބަވެރިން ވަނީ މި ސުލްހައިގެ މަޝްރޫއު ބަލައިނުގަނެވޭނެ ކަމަށް ބުނެފައެވެ.

މި މައްސަލައިގައި އިސްރާއީލުން އެމެރިކާގެ އޮފިޝަލުންނާ މަޝްވަރާ ކުރަމުންދާ ކަމަށާއި، އެމެރިކާއިން ހުށަހަޅާ ބައެއް ކަންކަމަށް އިސްރާއީލުން އެއްބަސްވި ނަމަވެސް، މަސްލަހަތު ހިމެނޭ ކަންކަމުގައި ދޫނުދޭނެ ކަމަށް ނަތަންޔާހޫ ވަނީ ބުނެފައެވެ.