މަސްވެރިންގެ މުޒާހަރާ: ދެދޯނި ފުލުހުންގެ ބެލުމުގެ ދަށަށް؛ މައުރޫފް ހިމެނޭހެން ތިންމީހުން ހައްޔަރުކޮށްފި

ބޮޑު ކަންނެލީގެ މަސްވެރިން އިއްޔެ ހެނދުނުން ފެށިގެން މާލެ ސަރަހައްދުގައި ކުރަމުންދާ އިހްތިޖާޖުގެ ތެރެއިން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ހިމެނޭހެން ތިން މީހަކު ހައްޔަރުކޮށްފިއެވެ.

ފުލުހުން ބުނީ، މަސްވެރިން މިހާރު ކުރަމުންދާ އިހުތިޖާޖާ ގުޅިގެން 2 ދޯނި ފުލުހުންގެ ބެލުމުގެ ދަށަށް ވަނީ ގެނެސްފައިވާ ކަމަށެވެ.

އަދި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށާ މިމީހުންގެ ތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ހިމެނޭ ކަމަށެވެ.

މީގެ އިތުރުން، މި އިހުތިޖާޖުގައި ބިދޭސީން ބައިވެރިވަމުންދާކަން ފާހަގަކުރެވުމާއެކު، އެކަން އެގޮތަށް ނުކުރުމަށް ނަސޭހަތްތެރިވުމަށްފަހު، އެދޯނިތަކުގައި މަސައްކަތްކުރާ ބިދޭސީންނާ ގުޅޭ މައުލޫމާތު ހޯދުމަށްޓަކައި ފުލުހުންނާއި އިމިގްރޭޝަން ގުޅިގެން މަސައްކަތްކުރަމުންދާ ކަމަށްވެސް ފުލުހުން ބުންޏެވެ.

އެގޮތުން އިހުތިޖާޖުގައި ބިދޭސީން ހަރަކާތްތެރިވާކަމަށް ފާހަގަކުރެވިފައިވާ ދޯނިތަކަށްވެސް ފުލުހުން އަރާފައިވާ ކަމަށް ބުނެފައިވެއެވެ.

މި އަހަރުގެ މަސްވެރިންގެ ދުވަހާ ގުޅުވައި ބޮޑު ކަންނެލި މަސްވެެރިންގެ ޔޫނިއަނުން 49 ދޯންޏާއެކު މި އިހްތިޖާޖު ފެށީ ހެނދުނު 9:30 ގައި ހުޅުމާލެ ކަންނެލި ޖެޓީގަ އެވެ.

މިއީ ބޮޑު ކަންނެލި މަސްވެރިކަމުގައި ހުރި ކަންބޮޑުވުންތައް ސަރުކާރައް އިއްވައި، އެ ފަރާތްތަކުގެ ޑިމާންޑްތައް ސަރުކާރަށް އެނގުމުގެ ގޮތުން ފެށުނު އިހްތިޖާޖެއް ކަމަށް އިހްތިޖާޖުގައި ބައިވެރިވި މަސްވެރިން ބުނެފައިވެއެވެ.

ހުޅުމާލޭ ކަންނެލިޖެޓީން ފެށި މި އިހްތިޖާޖުގެ ދޯނިތައް މާލޭގެ ފަޅަށް ވަންނަން މަސައްކަތް ކުރުމުން ދޯނިތަކަށް ނުވަދެވޭ ގޮތަށް ފުލުހުންނާ އެމްއެންޑީއެފްގެ ކޯސްޓްގާޑުން ވަނީ ނެރު ބަންދު ކޮށްފަ އެވެ. އެހެންކަމުން ދޯނިތައް އިހްތިޖާޖު ކުރަމުން ދިޔައީ ފަޅުން ބޭރުގައެވެ.