ރައީސް ޞާލިހުގެ މާލީ ބަޔާނުގައި އޮޑިޓަރ ސޮއިކުރެއްވިއިރު ދަރަންޏެއް އޮތްނަމަ އެކަން ނުބެލީ ކީއްވެ: އެމްޑީޕީ

ކުރީގެ ރައީސް އިބްރާހިމް މުހައްމަދު ޞާލިހުގެ ކެންޕެއިންގައި ކުރި ޚަރަދުގެ ތެރެއިން މޯލްޑިވިއަންއަށް ދައްކަންޖެހޭ ދަރަންޏެއް އޮއްވާ، އެމަނިކުފާނުގެ މާލީ ބަޔާނުގައި ދަރަންޏެއް ނެތް ކަމަަށް ބުނޭފައި ވަނިކޮށް އޮޑިޓަރ ސޮއި ކުރެއްވީ ކީއްވެތޯ އެމްޑީޕީ އިން ސުވާލު އުފައްދައިފިއެވެ.

މޯލްޑިވިއަނަށް އެމްޑީޕީގެ ފަރާތުން ދައްކަށް ޖެހޭ ފައިސާގެ ތެރެއިން 8 ޖެނުއަރީ 2024 ގެ ނިޔަލަށް 5،629،861 (ފަސްމިލިއަން ހަލައްކަ ނަވާވިސް ހާސް އަށްސަތޭކަ ފަސްދޮޅަސް އެއް ރުފިޔާ) ރުފިޔާ ނުދައްކާ އޮތްކަމަށް ބުނެ އެމްޑީޕީގެ ޗެއާޕާސަން ފައްޔާޒު އިސްމާއިލަށް އެޑްރެސްކޮށް ފޮނުވާފައިވާ ސިޓީއެއްގައި އެ ކުންފުނިން ބުނެފައިވަނީ އެއީ އެމްޑީޕީން ނަގާފައިވާ ޓިކެޓަށާއި، އަދި ޗާޓަރ ކޮށްފައިވާ ފުލައިޓްތަކަށް ދައްކަން ޖެހޭ ފައިސާ ކަމަށެވެ.

އަދި އައިލެންޑް އޭވިއޭޝަނާއި އެމްޑީޕީން މީގެ ކުރިން އެއްބަސްވެފައި އޮތީ ޚިދުމަތް ހޯދާ ތާރީހުން ފެށިގެން 48 ގަޑިއިރު ތެރޭގައި ފައިސާދައްކާ ހަލާސްކުރާ ގޮތަށް ނަމަވެސް އެކި ފަހަރު މަތިން ސިޓީ ފޮނުވައިގެން ވެސް އެ ފައިސާ ދައްކާފައި ނުވާކަމަށާއި، އެހެންކަމާއި އެކު މި މަހުގެ 18 ވަނަ ދުވަހުގެ ކުރިން އެ ފައިސާ ނުދައްކައިފި ނަމަ ޝަރުޢީ މަރުހަލާ ފަށާނެ ކަމަށްވެސް ބުނެފައިވެއެވެ.

އެކަމާއި ގުޅިގެން އެމްޑީޕީން މިއަދު ބުނީ ރިޔާސީ އިންތިޚާބުގައި ތާއީދު ހޯދުމަށް ކެނޑިޑޭޓުން ކުރި ޚަރަދު އޮޑިޓްކޮށް މާލީ ބަޔާން އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ.

"ރައީސް އިބްރާހީމް މުޙައްމަދު ޞާލިޙް ހުށަހަޅުއްވާފައިވާ މާލީ ބަޔާނަށް ބެލުމުން، އަދާނުކުރެވި ހުރި ދަރަނި ޖުމްލަ އަކީ 0 ކަމަށް ޖައްސަވާފައިވާއިރު، މޯލްޑިވިއަން އިން މި ހޯދަން އެދޭ 5،629،861 މިލިއަނެއްހާ ރުފިޔާ ދަރަންޏެއް ރިޔާސީ އިންތިޚާބާ ގުޅިގެން އޮތްކަން ކެނޑިޑޭޓްގެ މާލީ ބަޔާނުގައި ބަޔާންކޮށްފައި ނުވުމަކީ ދޮގު މަޢުލޫމާތު ދިނުން ކަމަށް ނުވާނެތޯ؟ އެހެންކަމަށްވާނަމަ އޮޑިޓަރ ސޮއިކުރެއްވިއިރު އެކަން ބައްލަވާފައި ނުވަނީ ކީއްވެތޯ؟" އެމްޑީޕީން ބުނެފައިވެއެވެ.