އާސަންދައިން 18 ތަނަކުން މިހާރު ނަންބަރު އައިނު ހެއްދޭނެ

ކްލިނިކްތަކާއި އައިނު ފިހާރަތަކާއި، ހޮސްޕިޓަލްތައް ހިމެނޭގޮތަށް ނަންބަރު އައިނު ހައްދާ އިތުރު 18 ތަނަކަށް އާސަންދައިގެ ޚިދުމަތް މިއަދުން ފެށިގެން ފޯރުކޮށްދެވޭނެކަމަށް އާސަންދަ ކޮމްޕެނީ ލިމިޓެޑުން ހާމަކޮށްފިއެވެ.

މިއީ ޕްރިސްކްރިޕްޝަން ގްލާސަސް ނުވަތަ ނަންބަރު އައިނު ހެއްދުމުގެ ޚިދުމަތް، ރައްޔިތުންނަށް ލުއިފަސޭހަވާނެ ފަދަ ގޮތަކަށް ހަމަޖައްސާ، މި ޚިދުމަތް އިތުރަށް ފުޅާކުރުމުގެ މަގުސަދުގައި އެ ކުންފުނިން އަޅައިފައިވާ ފިޔަވަޅެކެވެ.  މި ފިޔަވަޅާއިއެކު ކްލިނިކްތަކުގައި އަދި އައިނު ފިހާރަތަކުގައި ރަޖިސްޓްރީވެފައިވާ އޮޕްޓޮމެޓްރިސްޓުން ޕްރިސްކްރައިބްކުރާ އައިނުތަކަށް އާސަންދައިގެ ދަށުން ކަވަރޭޖް ލިބޭނެއެވެ.

އާސަންދައިގެ ދަށުން އައިނު ހެއްދޭނެ ތަންތަން:

• އޭޑީކޭ ހޮސްޕިޓަލް

• އެޑްވާންސް އައި ކްލިނިކް

• އެޑްވާންސް މެޑިކަލް ކްލިނިކް

• އެއިމްސް ޑައިގްނޯސްޓިކް ކެއަރ

• އާޒިމް ނައީމް މެޑިކަލް އެންޑް ޑައިގްނޯސްޓިކް ސެންޓަރ

• ޗިޓީ އޮޕްޓިކަލް ކްލިނިކް

• އައި ކެއަރ ކްލިނިކް

• އައި ކެއަރ ކްލިނިކް ހުޅުމާލެ ބްރާންޗް

• އައި ކެއަރ ހޮސްޕިޓަލް

• އައި ކެއަރ ހޮސްޕިޓަލް ހުޅުމާލެ

• ފަރޫކް ހެލްތު ކެއަރ

• މަލްޑިކެއަރ

• ނޫސަންދާ

• ސެނަހިޔާ

• ޓްރީޓޮޕް ހޮސްޕިޓަލް

• ވިޝަން ކްލިނިކް

• ޕަބްލިކް ހެލްތު ފެސިލިޓީސް

އާސަންދައިގެ ދަށުން އައިނު ހެއްދުމަށް ދޭ އެހީ ސަރުކާރުން ވަނީ ބޮޑުކޮށްފައެވެ. މި އެހީގެ ދަށުން ހެލްތު އިންޝުއަރެންސްގެ ތެރެއިން ރައްޔިތުންނަށް އައިނު ހެއްދުމަށް މީގެ ކުރިން ކޮންމެ ދެއަހަރުން އެއް އަހަރު ދެމުން ދިޔަ 1000 ރުފިޔާގެ އެހީތެރި ކަން މިދިޔަ އަހަރުގެ ޖޫން މަހުން ފެށިގެން އައިނު ހައްދަން ދޭ އެހީ 2000 ރުފިޔާއަށް ވަނީ ބޮޑުކޮށްފައެވެ.

މީގެ އިތުރުން،  ސަރުކާރުން ވަނީ ހިލޭ އައިނު ހެއްދުމުގެ ފުރުޞަތު ފަހިކޮށްދެއްވުމަށް އައިޖީއެމްއެޗް އަދި ހުޅުމާލެ ހޮސްޕިޓަލްގައި އައިނު ފިިހާރާއެއްވެސް ހުޅުވާފައެވެ.