ކުރީގެ އެއްބަސްވުން ބާތިލު، ތުޅާދޫ އެއާޕޯޓް އަޅަން ބިން ހިއްކަން ހަވާލުކޮށްފި

ބ. ތުޅާދޫގައި ޑޮމެސްޓިކް އެއާޕޯޓެއް ހެދުމުގެ މަޝްރޫއާއި ގުޅިގެން އެއާޕޯޓަށް ބޭނުންވާ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތުގެ އެއްބަސްވުމުގައި ސޮއިކޮށްފި އެވެ.

މިނިސްޓްރީ އޮފް ކޮންސްޓްރަކްޝަން، ހައުސިން އަދި އިންފްރާސްޓްރަކްޗާ އިން ބުނީ މި އެއްބަސްވުމުގައި ސޮއި ކޮށްފައި ވަނީ ބ. ތުޅާދޫގައި ޑޮމެސްޓިކް އެއާޕޯޓެއް ގާއިމުކުރުމަށް ބިން ހިއްކުމުގެ ގޮތުން 2023 ގައި ސޮއިކުރެމުގެ އެއްބަސްވުން ބާތިލުކުރުމަށް ފަހުގައި ކަމަށެވެ.

ތުޅާދޫގައި އެއާޕޯޓެއް ގާއިމުކުރުމުގެ މަޝްރޫއަކީ ރާއްޖޭގައި މީހުން ދިރިއުޅޭ ކޮންމެ ރަށަކާއި ރިސޯޓެއް އަދި ސިނާއީ ސަރަހައްދަކުން ވިޔަސް އެންމެ ގިނައިރު ވެގެން 30 މިނެޓުން ފޯރާނެ ދުރުމިނެއްގައި ޑޮމެސްޓިކް އެއާޕޯޓެއް ގާއިމުކޮށް، ގައުމީ ޑޮމެސްޓިކް އެއާޕޯޓް ވިއުގާ ފުޅާކުރުމުގެ ސިޔާސަތުގެ ދަށުން ކުރިއަށް ގެންދާ މަޝްރޫއު އެެކެވެ.

މިގޮތުން އެއާޕޯޓަށް ބޭނުންވާ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަސައްކަތުގެ އެއްބަސްވުމަކީ 570,260,350.80 ރުފިޔާގެ މަޝްރޫއުއެއް ކަމަށް އެ މިނިސްޓްރީން ބުންޏެވެ. މި މަސައްކަތް 660 ދުވަހުގެ ތެރޭގައި ނިންމަން ޖެހެ އެވެ.

މި އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓްރަކްޗާގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ހަސަން ރަޝީދު އެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕވޓ ލޓޑގެ ފަރާތުން އެކުންފުނީގެ ޑެޕިޔުޓީ މެނޭޖިންގ ޑިރެކްޓާ މުހައްމަދު ޖަމްޝީދެވެ.

މި މަޝްރޫޢުގެ ތެރެއިން ބ. ތުޅާދޫގައި ގާއިމުކުރެވިގެންދާނެ އެއާޕޯޓަކީ 1800 މީޓަރު ދިގު އަދި 30 މީޓަރު ފުޅާ ރަންވޭ އަކާއެކު ކޯޑް ތްރީސީ އަށް ގާއިމުކުރެވޭ އެއަރޕޯޓެކެވެ. އަދި މިއަދު ސޮއެކުރެވުނު އެއްބަސްވުމުގެ ދަށުން އެއާޕޯޓު ގާއިމުކުރުމަށްޓަކައި 55.4 ހެކްޓަރުގެ (2،231،740.00 ކޮޑި މީޓަރުގެ ވެލި) ބިން ހިއްކައި، 2804 މީޓަރުގެ ރޮކް ރިވެޓްމެންޓް އަދި 1677 މީޓަރުގެ ޖިއޯ ބޭގް ރެވެޓްމެންޓް ޖަހާނެ އެވެ.