އެފްޑީސީގެ އަމާން ޓަވަރުތައް ކައިރިން 670 ޓަނުގެ ކުނި ނަގައިފި
މަދިރިން ރައްކާ ނަމުގައި އިއްޔެ ފެށި ހުޅުމާލެ ސާފްކުރުމުގެ ހަރަކާތުގައި ފަހިދިރިއުޅުމަށް ދީފައިވާ އަމާން ޓަވަރުތައް ކައިރިން އިއްޔެ އެކަނިވެސް 670 ޓަނުގެ ކުނި ނަގާފައިވާކަމަށް އެޗްޑީސީން ބުނެފިއެވެ.
މިކަމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި އެޗްޑީސީގެ ހެޑް އޮފް މާކެޓިން އެންޑް ޕަބްލިކް ރިލޭޝަން މަލްޝާ ޝަރީފް ވިދާޅުވެފައިވަނީ، ސާފްކުރުމަށް ކުރި މަސައްކަތުން އިއްޔެ އެކަނިވެސް 670 ޓަނުގެ ކުނި ނަގާފައިވާކަމަށެވެ. ހުޅުމާލޭ ދެވަނަ ފިޔަވަހީ އެފްޑީސީގެ އަމާން ޓަވަރުތައް ހިމެނޭ ސަރަހައްދު ގޮނޑުކޮށްފައިވާއިރު، އެޗްޑީސީގެ ބޮޑު އެއްބާރުލުމަކާއެކު ގޮނޑުކޮށްފައިވާ ސަރަހައްދުތަކުން ކުނިތައް ނެގުމުގެ މަސައްކަތް އިއްޔެ ވަނީ ފަށާފައެވެ.
މަލްޝާ ވިދާޅުވީ އިއްޔެ ނެގި 670 ޓަނުގެ ކުނި ބަރުދަން ހިސާބުކުރާނަމަ އެއީ 450 އާއި 500 އާ ދެމެދުގެ އަދަދެއްގެ ކާރުގެ ބަރުދަން ކަމަށެވެ. ޓަވަރުތައް ހުންނަ ސަރަހައްދަށް އަޅާފައިވާ އެ ކުނިތައް ނެގުމުގެ މަސައްކަތް އަދި ނުނިމޭކަން ފާހަގަކުރައްވަމުން މަލްޝާ ވިދާޅުވީ މިއަދުވެސް ކުނިތައް ނެގުމުގެ މަސައްކަތް ކުރިއަށްދާނޭކަމަށެވެ.
ފަހިދިރިއުޅުން ޓަވަރުތައް ކައިރިއަށް ކުނިއަޅާ މައްސަލައަކީ ވަރަށް ބޮޑުވެފައިވާ މައްސަލައެކެވެ. މި މައްސަލާގައި އެފްޑީސީންވެސް ވަނީ އާންމު ތަންތަނަށް ކުނި ނޭޅުމަށް ތަކުރާރުކޮށް އަންގާފައެވެ. އަދި ކުނިއަޅާފަރާތްތަކާ ދެކޮޅަށް ހަމަޖެހިފައިވާ އުސޫލުން ފިޔަވަޅު އަޅާނޭކަމުގެ އިންޒާރުވެސް އެފްޑީސީން ވަނީ ދީފައެވެ. އެފްޑިސީން ވަނީ އެކި ފަހަރުމަތިން އެތަންތަނަށް އަޅަމުންދާ ކުނިތައް އުކާލުމުގެ މަސައްކަތްވެސް ކޮށްފައެވެ. އެގޮތުން އަމާން ޓަވަރުތަކުގެ އާއްމު ސަރަހައްދުތަކަށް އުކާލާފައިވާ ކުނިތައް ނައްތާލުމަށް މިހާތަނަށް 13.5 މިލިއަން ރުފިޔާ ހަރަދުވެފައިވާ ކަމަށް އެފްޑީސީން ވަނީ ބުނެފައެވެ.
ޓަވަރުތައް ހުންނަ ސަރަހައްދަށް އުކާލާފައި ހުންނަ ތަކެތީގެ ތެރޭގައި ފާހާނާ، ރެފްރިޖްރޭޓަރ އަދި ފަރުނީޗަރުފަދަ ތަކެތި ހިމެނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
