ކިޔަވައިދިނުމުގެ ފެންވަރު މަތިކޮށް، އާ އީޖާދުތަކަށް އަހުލުވެރިކުރުވުމަށް އެމްއެންޔޫ-އެޖް 2026 ސިމްޕޯޒިއަމް ފަށައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ އެކަޑަމިކް މުވައްޒަފުންގެ މެދުގައި ކިޔަވައިދިނުމުގެ ފެންވަރު މަތިކުރުމަށާއި، ތަޢުލީމީ ދާއިރާގެ އައު އީޖާދުތައް ޙިއްޞާކުރުމުގެ މަޤްޞަދުގައި ބާއްވާ "އެމްއެންޔޫ-އެޖް 2026" ސިމްޕޯޒިއަމް މިއަދު ފަށައިފިއެވެ.

އެމްއެންޔޫއިން މަޢުލޫމާތު ދިން ގޮތުގައި ދެ ދުވަހުގެ މުއްދަތަށް ކުރިއަށްގެންދާ މި ސިމްޕޯޒިއަމްގައި އެ ޔުނިވަރސިޓީގެ 290 އެކަޑަމިކް މުވައްޒަފުން ބައިވެރިވެއެވެ. މިއީ ތަޢުލީމީ ބަހުސްތަކާއި، އައު އީޖާދުތަކާއި، ކިޔަވައިދިނުމުގެ އެންމެ ފުރިހަމަ ގޮތްތައް ޙިއްޞާކުރުމުގެ ތެރެއިން އުނގެނުމާއި އުނގަންނައިދިނުމުގެ ވައްޓަފާޅި ހަރުދަނާކުރުމަށް ބާއްވާ މުހިންމު ހަރަކާތެކެވެ.

މި ސިމްޕޯޒިއަމް ރަސްމީކޮށް ފައްޓަވައިދެއްވީ އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ދެއްވި ތަޤުރީރަކުންނެވެ. އެކަމަނާގެ ވާހަކަފުޅުގައި، ކިޔަވައިދިނުމާއި އުނގެނުމުގެ އިލްމީ ދިރާސާތަކަށް ޚާއްޞަ އިސްކަމެއްދޭ ޔުނިވަރސިޓީ މާޙައުލެއް ބިނާކުރުމުގެ ތަޞައްވުރު ހާމަކުރެއްވިއެވެ. އަދި އެކަޑަމިކް ދާއިރާގައި ދަރިވަރުންގެ އުނގެނުމަށް އެންމެ އިސްކަންދީ، ކިޔަވައިދިނުމުގެ އުޞޫލުތައް މުރާޖަޢާކޮށް އިތުރަށް ވަރުގަދަކުރުމަށް ލެކްޗަރަރުންނަށް ބާރުއެޅުއްވިއެވެ.

"ތަޢުލީމީ މަޝްވަރާތަކާއި އީޖާދީ ވިސްނުންތަކުގެ ތެރެއިން ކިޔަވައިދިނުމުގެ މޮޅު ފެންވަރެއް ޤާއިމުކުރުން" މި ޝިޢާރުގެ ދަށުން ކުރިއަށްދާ މި ސިމްޕޯޒިއަމްގެ ތެރެއިން ޢަމަލީ ތަޖުރިބާތައް ޙިއްޞާކުރުމުގެ 12 ޕްރެޒެންޓޭޝަނަކާއި، ޒަމާނީ ވަސީލަތްތައް ބޭނުންކޮށްގެން ކިޔަވައިދޭނެ ގޮތުގެ 4 ލައިވް ޑެމޮންސްޓްރޭޝަނެއް ދެއްކުމަށް ވަނީ ހަމަޖެހިފައެވެ. މީގެއިތުރުން، ކްލާސްރޫމްތަކުގައި ދިމާވާ ގޮންޖެހުންތަކާއި ތަޖުރިބާތަކާ ގުޅޭގޮތުން ގުޅިގެން މަޝްވަރާކުރުމަށް 15 "ލަރނިންގ ސަރކަލް" އެއް މި ސިމްޕޯޒިއަމްގެ ތެރެއިން ކުރިއަށްދާނެ ކަމަށް އެމްއެންޔޫއިން ބުންޏެވެ.

އެމްއެންޔޫއިން ފާހަގަކުރި ގޮތުގައި، މި ސިމްޕޯޒިއަމްގެ ސަބަބުން އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތަކުގެ ތެރޭގައި ހިމެނޭ ފެންވަރު ރަނގަޅު ތަޢުލީމު ކަށަވަރުކުރުން (އެސްޑީޖީ 4)، ޞިނާޢަތާއި އީޖާދު އަދި އުމްރާނީ ތަރައްޤީ (އެސްޑީޖީ 9) އަދި ލަނޑުދަނޑިތައް ޙާޞިލުކުރުމަށް ގުޅުން ބަދަހިކުރުން (އެސްޑީޖީ 17) ހާސިލުކުރުމަށް ވަރަށް ބޮޑަށް އެހީތެރިވެދޭނެއެވެ.

މިފަދަ ހަރަކާތްތަކުގެ ޒަރީޢާއިން، ދަރިވަރުންނަށް ފައިދާހުރި ތަޢުލީމީ މާޙައުލެއް ފަހިކޮށްދިނުމަށްޓަކައި، މުދައްރިސުންގެ މެދުގައި އީޖާދީ އަދި ގުޅިގެން މަސައްކަތްކުރުމުގެ ޘަޤާފަތެއް އާލާކުރުމަށް އެމްއެންޔޫއިން އަބަދުވެސް މަސައްކަތްކުރަމުންދާ ކަމަށް އެ ޔުނިވަރސިޓީން ބުނެއެވެ.