މިދިޔަ 24 ގަޑިއިރުރު، އެންމެގިނައިން ވާރޭ ވެހުނީ މާލެއަށް

މިދިޔަ 24 ގަޑިއިރުގެ ތެރޭގައި އެންމެގިނައިން ވާރޭ ވެހުނީ މާލެސިޓީއަށް ކަމަށް މޫސުމާ ބެހޭ ޤައުމީ އިދާރާގެ ރެކޯޑުތަކުން ދައްކައިފިއެވެ.

މޯލްޑިވްސް މީޓިއޮލޮޖިކަލް ސެންޓަރުން އާއްމުކުރި މައުލޫމާތުތަކަށް ބަލާއިރު، މިހާރު ކުރަމުންދާ މޫސުމީ ވިއްސާރާގައި މާލެއަށް ވަނީ 136.5 މިލިލީޓަރުގެ ވާރޭ ވެހިފައެވެ. ދެން އެންމެ ގިނައިން ވާރޭ ވެހުނީ ހުޅުމާލެ އަދި ހުޅުލެއަށެވެ. އަތޮޅުތެރޭގެ ރަށްތަކަށް ބަލާއިރު، ދަރަވަންދޫ ގާފަރު އަދި ތޮއްޑޫއަށްވެސް ވަނީ ރެކޯޑް އަދަދަކަށް ވާރޭ ވެހިފައެވެ.

މާލެއަށް ވެހުނު ވާރޭގައި އާއްމު ދަތުރުފަތުރަށް އުނދަގޫވާވަރަށް ވަނީ ފެންބޮޑުވެފައެވެ. މީގެ އިތުރުން ބައެއް މަގުތަކުގައި ފެންބޮޑުވުމުގެ ސަބަބުން ގެތަކަށް ފެން ވަނުމާއި، ފިހާރަތަކަށް ފެންވަދެފައި ވެއެވެ.

މޫސުމާ ބެހޭ ގައުމީ އިދާރާ އަދި ޑިޒާސްޓާ އޮތޯރިޓީން ވަނީ ކުރިއަށް މިއޮތް ދުވަސްތަކުގައި ވިއްސާރަވެދާނެތީވެ، ލިބިދާނެ ގެއްލުންތަކުން ސަލާމަތްވުމަށް އިލްތިމާސްކޮށްފައެވެ.

ރޭ ވެހުނު ބޯ ވާރޭގެ ތެރޭގައި އެމްއެންޑީއެފްގެ ރެސްކިއު ޓީމުތަކުން ވަނީ މަގުތަކުން ފެން ހިއްކުމުގެ މަސައްކަތް ކުރިއަށްގެންގޮސްފައެވެ. އަދި ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ގޭބިސީތަކަށް ފެންވަންނަމުންދާތީ ރައްޔިތުންނަށް އެހީތެރިކަން ފޯރުކޮށްދިނުމުގެ ގޮތުން އެޓީމުތަކުން ވަނީ، އާދައިގެ މަތިން ވެލިބަސްތާ ޖެހުމުގައި ހަރަކާތްތެރިވެފައެވެ.

މޫސުމާ ބެހޭ އިދާރާއިން ލަފާކުރާގޮތުގައި އަދިވެސް މާލެ ސަރަހައްދަށް މޫސުން ގޯހެވެ. މެޓް އޮފީހުން ވަނީ ހއ.އަތޮޅުން ފެށިގެން ތ އަތޮޅަށް މޫސުން ގޯސްވެދާނެކަމަށް ލަފާކޮށް ހުދު ސަމާލް ނެރެފައެވެ. މެޓް އޮފީހުން ބުނީ މިއަދު ހެނދުނު ނުވައަކުން ފެށިގެން މެންދުރުފަހު ތިނެއް ޖެހުމާ ހަމަޔަށް ހުދު ސަމާލު ނެރެފައިވާ ސަރަހައްދަށް ބޯކޮށް ވާރޭވެހި ވައިގަދަ ވާނޭކަމަށް ލަފާކުރެވޭ ކަމަށެވެ.

މިހާރު ކުރަމުންދާ މޫސުމީ ވިއްސާރައާ ގުޅޭގޮތުން ނެޝަނަލް ޑިޒާސްޓާ އޮތޯރިޓީން ބުނީ، ބޯކޮށް ވާރޭވެހި މާލޭގައި ފެންބޮޑުވެފައިވާތީ ކަމާއިގުޅޭ އިދާރާާތަކާއި ގުޅިގެން އިޖާބަ ދިނުމުގެ މަސައްކަތް ކުރިއަށްގެންދާ ކަމަށެވެ.