ވިލާ ކޮލެޖްގެ "ސްޓޫޑެންޓް އެޗީވްމަންޓް އެވޯޑްސް ނައިޓް" ބާއްވައިފި

ވިލާ ކޮލެޖުން ތައުލީމް ހާސިލްކޮށް ދަސްވެނިވާ ދަރިވަރުންގެ ތެރެއިން މަތީ ވަނަތައް ހާސިލްކުރާ ދަރިވަރުންނަށް އެވޯޑު ދިނުމަށްޓަކައި "ސްޓޫޑެންޓް އެޗީވްމަންޓް އެވޯޑްސް ނައިޓް" އެ ކޮލެޖުން ބާއްވައިފި އެވެ.

މި ހަރަކާތުގެ ޝަރަފުވެރި މެހެމާނަކީ ރައްޔިތުން މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް އެވެ.

ދެހާސް އެކާވީސް ވަނަ އަހަރުން ފެށިގެން ބާއްވަމުން އަންނަ "ސްޓޫޑެންޓް އެޗީވްމަންޓް އެވޯޑްސް ނައިޓް"ގެ މި އަހަރުގެ ހަފްލާ ބާއްވާފައިވަނީ ރޭގައެވެ. މިއީ މިގޮތުން ބޭއްވޭ ހަތަރު ވަނަ އެވޯޑް ނައިޓް އެވެ.

މިފަދަ އެވޯޑް ނައިޓެއްގެ މަގުސަދަކީ ވިލާ ކޮލެޖާއި ގާތްގުޅުމެއް ބާއްވަމުންދާ އިންޑަސްޓްރީތަކާއި އެ އިންޑަސްޓްރީތަކާ ގުޅޭ ދާއިރާތަކުން ކިޔަވާނިމި މަތީ ވަނަތައް ހާސިލްކުރާ ދަރިވަރުންނަށް އެއްތަނަކުން ބައްދަލުވުމުގެ އުފާ ހާސިލްކުރުންކަމަށް އެ ކޮލެޖުން މައުލޫމާތުދެއެެވެ.

މި ރަސްމިއްޔާތުގައި ވާހަކަދައްކަމުން ޝަރަފްވެރި މެހެމާން ނާޒިމް ވަނީ ކޮލެޖުތައް ޔުނިވަރސިޓީތަކަށް ބަދަލުކުރުމާ ގުޅޭ ބިލެއްގެ މަސައްކަތް ކުރިއަށްދާކަން ފާހަގަކުރައްވާފައެވެ. އަދި ކުރިއަށް އޮތް މިފަދަ ޖަލްސާތަކުގައި ވިލާ ކޮލެޖުގެ ބަދަލުގައި ވިލާ ޔުނިވާސިޓީގެ ނަމުން މުޚާތަބުކުރުމަކީ ނާޒިމްގެ އުންމީދެއް ކަމުގައި ވިދާޅުވިއެވެ.

"ސްޓޫޑެންޓް އެޗީވްމަންޓް އެވޯޑްސް ނައިޓް"ގައި ގާސިމް އިބްރާހިމް އެވޯޑް ފޯ އެކްސިލެންސް ހާސިލްކުރި 23 ދަރިވަރަކާއި، ވިލާ ކޮލެޖްގެ ގޯލްޑް މެޑެލް އަދި އިންޑަސްޓްރީ ޕްރައިޒް ހާސިލްކުރި 51 ދަރިވަރަކާއި އޭސީސީއޭ ނެޝަނަލް ރެސިޑެންޓް ޕްރައިޒް ހާސިލްކުރި 12 ދަރިވަރެއްގެ އިތުރުން ވިލާ ކޮލެޖްގެ ބުކް ޕްރައިޒް އަދި ޑީންސް އެވޯޑް ހާސިލްކުރި 110 ދަރިވަރަކަށްވަނީ އެވޯޑް ދީފައެވެ.

ރޭގެ ރަސްމިއްޔާތުގައި ވާހަކަ ދައްކަވަމުން ވިލާ ކޮލެޖްގެ ވައިސް ރެކްޓަރު ޑރ.އަލީ ނަޖީބު ވިދާޅުވި ގޮތުގައި، މިދިޔަ އަހަރާއިމިއަހަރު ވިލާ ކޮލެޖުން ކުރިއަށްގެންދިޔަ 53 ޕްރޮގްރާމަކުން ދަސްވެނިވި 1237 ދަރިވަރަކު ސަނަދު ހާސިލްކޮށްފައިވެއެވެ.

އަދި މިއަހަރުގެ މިހާތަނަށް ވިލާކޮލެޖުން ދަސްވެނިވި ދަރިވަރުންނާއެކު މިހާތަނަށް 21،000 ހާހަށްވުރެ ގިނަ ދަރިވަރުން ދަސްވެނިވިފައިވާއިރު، މީގެ ތެރޭގައި ޔުނިވަރސިޓީ އޮފް ވެސްޓް އިންގްލެންޑްގެ ޕްރޮގްރާމްތަކުން ކިޔަވައި ވަނަތައް ހާސިލްކުރި ގިނައަދަދެއްގެ ދަރިވަރުން ހިމެނޭކަން ނަޖީބު ފާހަގަކުރެއްވިއެވެ.

މީގެން ދޭހަކޮށްދެނީ ބްރިސްޓަލްގައި ކިޔަވާ ދަރިވަރުންނާ އެއްހަމައެއްގައި ވިލާކޮލެޖުގައި ތިބެގެން ކިޔަވާދަރިވަރުން އެކަޑަމިކަލީ ހިފަހައްޓާލެވޭކަން. އަދި މީގެ ތެރޭގައި އޭސީސީ ވަލްޑްވައިޑް ޕްލޭސްގެ ގަދަ 40 ގައި ހިމެނޭ 12 ބޭފުޅަކު ހިމެނޭކަންވެސް ފާހަގަކޮށްލަން. އެނގިވަޑައިގަންނަވާނޭ ފަދައިން ވިލާކޮލެޖަކީ މިވަގުތު އޭސީސީގެ ރާއްޖޭގައި ހުރި ގޯލްޑް ސްޓޭޓަސްގެ ހަމައެކަނި ޓިއުޝަން ޕްރޮވައިޑަރ. އަދި އޭސީސީއޭގެ ތިން ލެވެލްއަށް ކިޔަވައިދޭ ހަމައެކަނި މަރުކަޒުވެސްމެ.

ވައިސް ރެކްޓަރު ޑރ.އަލީ ނަޖީބު

ވިލާ ކޮލެޖަކީ ރާއްޖޭގެ ފުރަތަމަ ޕްރައިވެޓް ކޮލެޖެވެ. ވިލާ ކޮލެޖުގައި މިހާރުވެސް ގިނަ އަދަދެއްގެ ދަރިވަރުން އަންނަނީ މަތީ ތައުލީމް ހާސިލުކުރަމުންނެވެ. އަދި ރާއްޖޭގައި ތިބެގެން އިނގިރޭސިވިލާތާއި މެލޭޝިޔާގެ ޔުނިވަރސިޓީތަކުން މަތީ ތައުލީމު އުނގެނުމުގެ ފުރުސަތުވެސް އެ ކޮލެޖުންދަނީ ފަހިކޮށްދެމުންނެވެ.