މުޅި ލާމު ޣައްޒާއާއެކު - މިހާތަނަށް ފެނުނު އެންމެ ބޮޑު ހަރަކާތާއެކު ލާމުން ނަމޫނާއެއް

"މުޅި ލާމު ޣައްޒާއާއެކު" ނަމުގައި ބޮަޑު ވެހިކަލް ބުރެއް ކުރިއަށް ގެންގޮސް ލާމުން ނަމޫނާ ދައްކައިފި އެވެ.

ލ. އަތޮޅުގެ ރައްޔިތުން ޣައްޒާގެ ރައްޔިތުންނާ އެކު ތިބިކަން ހާމަކޮށް ދިނުމުގެ ގޮތުން ކުރިއަށް ގެންދިޔަ ވެހިކަލް ބުރު އޮތީ އިއްޔެ ހަވީރު އެވެ.

ވެހިކަލް ބުރު އޮތީ ލާމު ލިންކު ރޯޑްގަ އެވެ. ވެހިކަލް ބުުރު އިންތިޒާމު ކުރީ ލ. ގަމާއި ފޮނަދޫ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީ އާއި މަދަނީ ޖަމިއްޔާތައް ގުޅިގެންނެވެ.

ކައިރި ރަށްރަށުގެ ގިނަ އަދަދެއްގެ ބަޔަކު ވެސް ބައިވެރިވި އެވެ.

ވެހިކަލް ބުރުގައި ކުޑަކުދީންނާއި އަންހެނުންނާއި ގިނަ އަދަދެއްގެ ފިރިހެނުން ބައިވެރިވި އެވެ.

ވެހިކަލް ބުރު ކުރިއަށްދިޔަ ވަގުތު އައްޝައިހް އާދަމް ނިޝާން އާއި އައްޝައިހް ހާތިމް ޔޫސުފް ގެންދެވީ ފަލަސްތީނު ބިމުގެ މާތް ކަމާއި އެ ބިމާއި މުސްލިމުންނާއި ހުރި ގުޅުން ސާފުކޮށް ދެއްވަމުންނެވެ.

ވެހިކަލް ބުރު ނިންމާލުމުގެ ގޮތުން ބޭއްވި ޚާއްސަ ހަރަކާތުގައި ވެސް ޝެއިހް ނިޝާން އާއި ޝެއިހް ހާތިމް ވަނީ ޣައްޒާގެ މުޖާހިދުންނަަށް ހިތްވަރު ދީ ފަލަސްތީނުގެ ރައްޔިތުންނަށް އެހީވުމުގެ މުހިންމު ކަމާ ގުޅޭގޮތުން ދަރުސް ދެއްވާފަ އެވެ.

އިއްޔެ ރެލީ ނިންމާލީ ހާއްސަ ދުއާއަކުންނެވެ. މި ދުއާގައި ފަލަސްތީނަށް ނަސްރު ދެއްވާ ޣައްޒާގެ މުޖާހިދުންނަށް ކާމިޔާބީއަށް އެދި ދަންނަވާފައިވެ އެވެ.

އަދި ފަލަސްތީނަށް އަމާންކަން ދެއްވާ ޔަހޫދީންގެ ނިންމުން އަވަސް ކޮށް ދެއްވުން އެދި ދުއާ ކޮށްފައިވެ އެވެ.

ފޮނަދޫ ކައުންސިލާއި ގަމު ކައުންސިލުން ބުނީ ޣައްޒާގެ ދިފާއުގައި ކުރިއަށް އޮތްތާވެސް ތަފާތު ހަރަކާތްތައް ހިންގާނެ ކަމަށެވެ.

ލާމުގެ އެންމެ ހަރަކާތްތެރި ޖަމިއްޔާ “އިލްމު” އަދި ދާރިސް ޓީވީއާ ބައެއް އެހެން ޗެނަލްތަކުން ވަގުތުން ގެނެސްދިން މި އިވެންޓް އެތައް ހާސް ބަޔަކު ވަނީ ވަގުތުން ބަލާފަ އެވެ.

މި ވެހިކަލް ބުރު އިންތިޒާމު ކުރުމުގައި އެންމެ ދައުރެއް އަދާކުރީ އިލްމު ޖަމިއްޔާއިންނެވެ.

މިއީ ފަލަސްތީނުގެ މިނިވަން ކަމަށް މަސައްކަތް ކުރާ ޣައްޒާގެ ހަމާސް މުޖާހިދުންނަށް ހިތްވަރު ދިނުމުގެ ގޮތުން ރާއްޖޭގައި މި ފަހުން ބޭއްވި އެންމެ ބޮޑު ހަރަކާތެވެ.

އިއްޔެގެ ހަރަކާތުގައި ދެހާހަަށް ވުރެ ގިނަ މީހުން ބައިވެރިވި އެވެ.

ރާއްޖެ އަކީ ފަލަސްތީނުގެ މިނިވަން ކަމަށް އެންމެ ހަރުއަޑުން ގޮވާލާ ގައުމެވެ.

ސިލްސިލާ ގޮތެއްގައި މާލެއާ މުޅި ރާއްޖޭގައި ރެލީތަކާއި އިވެންޓްތައް ދަނީ ބާއްވަމުންނެވެ.

އެގޮތުން އިއްޔެއާ ރޭ މާލޭގައި ވެސް ހަރަކާތްތައް އޮތެވެ. އަދި ރ. މީދޫއާ އައްޑޫ ސިޓީގައި ވެސް ރެލީ އޮތެވެ.

މި ރެލީތަކާއި ހަރަކާތްތަކުގައި ގިނަ ބަޔަކު ބައިވެރިވެފައިވެ އެވެ.

ފަލަސްތީނުގެ ޣައްޒާގައި އިޒްރޭލްގެ ޔަހޫދީ ސިފައިން ގެންދަނީ ވަރުގަދަ ގަތުލު އާންމެއް ހިންގަމުންނެވެ. އެއީ އޮކްޓޫބަރު 7، 2023 ގައި ހިތްވަރު ގަދަ މުޖާހިދުން ދިން ވަރުގަދަ ހަމަލާއާ ގުޅިގެންނެވެ.

އެ ހަމަލާތަކަށް ބަދަލު ހިފުމުފެ ގޮތުން ކަމަށް ބުނެ ފެށި އެ ގަތުލުއާންމުގައި މިހާތަނަށް 51،000 ވުރެ ގިނަ މީހުން ޝަހީދު ކޮށްލާފައިވެ އެވެ. ގިނައީ ކުޑަކުދީންނާއި އަންހެނުންނެވެ.

އަނިޔާވެރިކަން ކިތަންމެ މައްޗަށް ގެންދިޔަ ނަމަވެސް ހަމާސްގެ މުޖާހިދުންގެ ހިތްވަރަށް އެއްވެސް ބަދަލެއް ނާދެ އެވެ. އަދި ގަދަ ހިތްވަރާއެކު ޔަހޫދީންގެ ފިނޑި ލަޝްކަަރާ ދަނީ ބައްދަލުކުރަމުންނެވެ.