ރައީސް ނަޝީދު، ރައީސް މުޢިއްޒު އަށް: ލާމަރުކަޒީ ނިޒާމާ ކުޅެ ތިޔަ ފައްކާކުރައްވަނީ ބަޣާވާތެއް

ކައުންސިލްތަކުގެ އިޚްތިޞާޞުގައި ހިމެނޭ ބިންތައް ސަރުކާރުގެ ބާރުގެ ދަށަށް ގެނައުމަށް ކުރާ މަސައްކަތުން ފައްކާކުރައްވަނީ "ރަނގަޅު ބަޣާވާތެއް" ކަމަށް ވިދާޅުވެ ކުރީގެ ރައީސް މުޙައްމަދު ނަޝީދު، ވަރުގަދަ އިންޒާރެއް ދެއްވައިފިއެވެ.

ތުޅާދޫ ދާއިރާގެ އަމިއްލަ މެންބަރު ޢަބްދުލްޙައްނާން އަބޫބަކުރު ވަނީ ރަށްރަށުގެ ބިމާއި ފަޅާއި ފަރު ފަދަ ތަންތަން ކައުންސިލްތަކުގެ ބެލުމުގެ ދަށުން ނަގައި ވަޒީރުންގެ މަޖިލީހުގެ ސީދާ ބާރުގެ ދަށަށް ބަދަލުކުރެވޭ ގޮތަށް ލާމަރުކަޒީ ގާނޫނު އިސްލާހް ކުރުމަށް މަޖިލީހަށް ބިލެއް ހުށަހަޅުއްވާފައެވެ.

ގދ. ތިނަދޫގައި މީހުން އަލުން އާބާދުވިތާ 60 އަހަރު ފުރުމުގެ މުނާސަބަތުގައި އެ ރަށުގައި ރޭ ބޭއްވި ރަސްމީ ޖަލްސާގައި އެ ބިލާ ގުޅޭގޮތުން ވާހަކަދައްކަވަމުން ނަޝީދު ވިދާޅުވީ ތިނަދޫ އަދި ހުވަދޫ ފަދަ ތަންތަނުގެ ރައްޔިތުންގެ ބިންތައް އަތުލަން އުޅޭ އިރު އެ ސަރަޙައްދުގެ ތާރީޚަށް ރައީސް ވިސްނެވުން ލާޒިމު ކަމަށެވެ.

"މި ރަށުގެ އަދި މި އަތޮޅުގެ ރައްޔިތުން އިހުތިޖާޖަށް ތެދުވީ ސަބަބެއް ނެތިއެއް ނޫން،" ނަޝީދު ވިދާޅުވި އެވެ.

ނަޝީދު ވިދާޅުވީ ހުރިހާ މައްސަލައެއްގެ މުލަކީ މާލެއިން ހުރިހާ ކަމެއް ނިންމުމުގެ ވިސްނުން ކަމަށެވެ.

"ދިވެހި ދައުލަތުން ވަރަށް ބޮޑަށް ގަބޫލުކުރީ، އަތޮޅުތަކުގެ ހިންގުންތައް، ނިންމުންތައް، ކަންކަން ހިންގާން ޖެހޭނީ އެ އަތޮޅުތަކުގެ ރައްޔިތުން އިންތިހާބުކުރާ ބަޔެކޭ. މާލޭގައި އޮންނަ ސަރުކާރަކުން އައްޔަންކުރާ ބަޔެއް ނޫނޭ،" ނަޝީދު ވިދާޅުވި އެވެ.

އެފަދައިން ކަންކަން ވެފައި އޮތްކަން ތާރީޚުން އެނގެން އޮތްއިރު،   ރައީސް މުއިއްޒު މި ރަށްރަށުގެ ބިންތައް ކައުންސިލްގެ އަތުން އަތުލައްވަން މަސައްކަތްކުރައްވައި ފައްކާކުރައްވަނީ ބަޣާވާތެއް ކަމަށްވެސް ނަޝީދު ވިދާޅުވިއެވެ.

"ރައީސް ޑރ. މުޢިއްޒު އަނެއްކާ ތި ފައްކާކުރައްވަނީ ރަނގަޅު ބަޣާވާތެއް. ދިވެހިރާއްޖެ ރޫޅާލުމަށް ތިބޭފުޅާ ތި މަސައްކަތް ކުރައްވަނީ"

ރައީސް ނަޝީދު

ޖަޒީރާ ޤައުމެއްގެ ރަށްރަށުގައި ކުރަންވީ ކަންކަން ވަޒީރުންގެ މަޖިލީހަށް ނޭނގޭނެ ކަމަށާއި ޤާނޫނު ބަދަލުކޮށްގެން ބިންތައް ވަކިކުރުމަށް ރައްޔިތުން "ވަރިހަމަ" ނުކޮށް ތިބޭނެ ކަމަށް ވެސް އެމަނިކުފާނު ވިދާޅުވިއެވެ.

"ދިވެހިރައްޔިތުން ޑރ. މުޢިއްޒު ތެދުވާނެ. މި ރާއްޖެ ފަހަތަށް ދިޔުމަކަށް އެ ރައްޔިތުން ޖާގައެއް ނުދޭނެ. އަޅުގަނޑުމެންވެސް ތެދުވާނަން. ދިވެހިރާއްޖޭގެ ރައްޔިތުންގެ ރުހުމާ ރައްޔިތުންގެ އެދުމާ އެކީ ނޫން ގޮތަކަށް ދިވެހިރާއްޖޭގެ އެއްވެސް ކަމެއް ހިނގައިގެން ނުވާނެ ހިންގިޔަ ދީގެންވެސް ނުވާނެ" ރައީސް ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވި ގޮތުގައި މާޒީގައި ލާމަރުކަޒީ ނިޒާމު ނެތުމުން ހިނގި ހަމަނުޖެހުންތައް ނިމިގެން ދިޔައީ ދެކުނުގެ ތިން އަތޮޅު ދިވެހި ދައުލަތާ ވަކިވުމާ ހަމައަށެވެ. ނަމަވެސް ފަހުން ލާމަރުކަޒީ ނިޒާމު ތަޢާރަފްވެ ޑިމޮކްރެޓިކް ބަދަލުތައް ގެނެވުނީ ތިނަދޫ ރައްޔިތުންނާ ގުޅިގެން ކުރި މަސައްކަތުން ކަމަށް އެމަނިކުފާނު ވިދާޅުވިއެވެ.

"ތިނަދޫގައި ތިބޭފުޅުން މިއަދު ދެކޭ ހުރިހާ ތަރައްގީއެއްގެ އަސްލަކީ އެ ޑިމޮކްރެޓިކް ނިޒާމް. ކޮންކްރީޓެއް ނޫން ތިބޭފުޅުންގެ ތަރައްޤީއަކީ. ތިބޭފުޅުންގެ ތަރައްޤީއަކީ ތިބޭފުޅުންގެ ވިސްނުމަށް ތިޔަ އައި ބަދަލު. މިނިވަންކަމަށް ތިބޭފުޅުން ކުރާ ޤަދަރު" ނަޝީދު ވިދާޅުވިއެވެ.

ނަޝީދު ވަނީ ތިނަދޫގައި އިތުރު އެއާޕޯޓް އަޅައި އެތަން ދެވަނަ މާލެ އަކަށް ހެދުމުގެ ފުރުސަތު ދީގެން ނުވާނެ ކަމަށާ، ކޮންކްރިޓް ތަރައްގީ ނޫން ގޮތަށް، ރަށްރަށުގެ ގޮނޑުދޮށްތަކާއި ފަރުތަކާއި، އެނޫންވެސް ގުދުރަތީ ވަސީލަތްތަކުގެ އެހީގައި ތަރައްގީ ހޯދޭނެ ކަމަށް ވިދާޅުވެފައެވެ.