ހުޅުމާލެ ހޮސްޕިޓަލުގައި ގެސްޓްރޯ ނިއުރޯ އަދި ޔޫރޮލޮޖީގެ ޚިދުމަތް ފަށައިފި

ސިއްޙަތާއި އާޢިލާއާއި އިޖުތިމާއީ އެހީއާ ބެހޭ ވަޒީރު ޤީލާ އަލީ ހުޅުމާލެ ހޮސްޕިޓަލުގައި ގެސްޓްރޯ ނިއުރޯ އަދި ޔޫރޮލޮޖީގެ ޚިދުމަތް މިއަދު ރަސްމީކޮށް ފައްޓަވައިދެއްވައިފިއެވެ.

މި ތިން ޚިދުމަތް އިފުތިތާޙުކުރެއްވުމުގެ ތެރެއިން ވަޒީރު ވަނީ އެ ހޮސްޕިޓަލުގެ ނިއުރޯ ސައިންސް ޔުނިޓް ހުޅުވައިދެއްވައިފައެވެ.

ޕީއެސްއެމް ނިއުސްއަށް ދެއްވި ބަސްދީގަތުމެއްގައި ވަޒީރު ޤީލާ ވިދާޅުވީ މި ޚިދުމަތްތައް ބައެއް އަތޮޅު ހޮސްޕިޓަލްތަކުގައި މިހާރުވެސް ލިބެން ހުރި ނަމަވެސް ހުޅުމާލެ ހޮސްޕިޓަލުގައި މި ޚިދުމަތްތައް ޤާއިމުކުރެއްވީ އައިޖީއެމްއެޗަށް ކުރިމަތިވެފައިވާ ބާރުބޮޑުކަން ލުއިކުރެއްވުމުގެ ބޭނުމުގައި ކަމަށެވެ.

ވެއިޓްލިސްޓުގައި ގިނަ ޢަދަދެއްގެ ބަޔަކު މިވަގުތުވެސް ތިބިކަން ފާހަގަކުރައްވައި ވަޒީރު ވިދާޅުވީ އެ ލިސްޓު ކުޑަކޮށް ބޭސްފަރުވާއަށް ރާއްޖެއިން ބޭރަށް ދާ ދިއުން މަދުކުރެއްވުމަކީ އަމާޒެއް ކަމަށެވެ.

"މިހާރުވެސް ގިނަ އަދަދެއްގެ ބަޔަކު އަހަރެއްގެ މައްޗަށް ރާއްޖެއިން ބޭރަށް ބޭސްފަރުވާއަށް ދަތުރުކުރޭ. އުންމީދުކުރަނީ އެކަން މިއަށް ވުރެ ފަސޭހަކަމާއެކު ރާއްޖޭގައި ތިބެގެން ފޯރުކޮށްދިނުން. ރައީސްގެ އަމާޒަކީ މިފަދަ ސްޕަޝަލިސްޓް ޚިދުމަތްތައް ސަރުކާރުގެ ހޮސްޕިޓަލްތަކުގައި ޤާއިމްކޮށް ރައްޔިތުންނަށް ފަސޭހަތައް ފޯރުކޮށްދިނުން"

ވަޒީރު ޤީލާ ވިދާޅުވިއެވެ.

މާލޭ ގުރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާޤް ޙަލީމް ވިދާޅުވި ގޮތުގައި މީގެ ކުރިން މި ޚިދުމަތްތައް ހޯދުމަށް ހުޅުމާލޭގެ ރައްޔިތުން ދާން ޖެހެނީ އައިޖީއެމްއެޗް ނުވަތަ ދަރުމަވަންތައް ހޮސްޕިޓަލަށެވެ. ނިއުރޮލޮޖީ ޚިދުމަތުގެ ތެރެއިން ކޮންސަލްޓޭޝަނާއި އީއީޖީ ލިބޭނެ ކަމަށާއި ޔޫރޮލޮޖީގެ ކޮންސަލްޓޭޝަނާއި ޓެސްޓުތައް ހެދޭނެ ކަމަށާއި ގެސްޓްރޯއެންޓޮލޮޖީގެ ކޮންސަލްޓޭޝަން ފެށިފައިވާ ކަމަށް ސީއީއޯ ވިދާޅުވިއެވެ. ކައިރި މުސްތަޤުބަލެއްގައި ގެސްޓްރޯ ދާއިރާއިން އެންޑޮސްކޮޕީ އަދި ކޮލޮނޮސްކޮޕީގެ ޚިދުމަތް ދެވޭނެ އިންތިޒާމު ހަމަޖެއްސެވުމަކީ ޕްލޭނެއް ކަމަށްވެސް އެ ބޭފުޅާ ވިދާޅުވިއެވެ.

ނިއުރޯ ސައިންސް ޔުނިޓުގެ އީއީޖީ ޚިދުމަތް ކޮންމެ ދުވަހެއްގެ ރަސްމީ ގަޑީގައި ލިބެން ހުންނައިރު މެންދުރު ދޭއް ޖެހުމާ ހަމައަށް ނަން ނޯޓުކުރެވޭނެއެވެ. އިމަޖެންސީ ޙާލަތްތަކުގައި ކޮންމެ ވަގުތެއްގައިވެސް އެ ޚިދުމަތް ދެވޭނެ އިންތިޒާމު ވަނީ ހަމަޖައްސައިފައެވެ.

ފާއިތުވި ދެ އަހަރާއި ބައިގެ ތެރޭގައި ހުޅުމާލެ ހޮސްޕިޓަލުގެ ޖާގައިގެ ދަތިކަން ޙައްލުކޮށް ޚިދުމަތްތައް ފުޅާކުރުމުގެ ގޮތުން ޒަމާނީ ހަތަރު އޮޕަރޭޓިން ރޫމް ހިމެނޭ އޮޕަރޭޝަން ތިއޭޓާ ކޮމްޕްލެކްސްއެއް ޤާއިމުކޮށް 10 އެނދުގެ އައިސީޔޫއެއް ހުޅުވައި 14 އެނދުގެ ނިއޮނޭޓަލް އިންޓެންސިވް ކެއާ ޔުނިޓެއްވެސް ޒަމާނީ ފެންވަރުގައި ވަނީ ތަރައްޤީކޮށްފައެވެ.