ނަޝީދަށް ދިން ހަމަލާ: ވަކީލުންނަށް ހާޒިރުނުވެވިގެން މިއަދުގެ ޝަރީއަތްވެސް ކެންސަލް؛ ގާޒީގެ ކަންބޮޑުވުން

2021 ވަނަ އަހަރުގެ މެއި މަހުގެ 6 ވަނަ ދުވަހު ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ މިއަދު ކުރިއަށް ގެންދަން ހަމަޖެހުނު ޝަރީޢަތުގެ އަޑުއެހުން ކެންސަލްވެއްޖެއެވެ.

މިއަދުގެ އަޑުއެހުމުގައި ތާވަލުކުރެވިފައިވަނީ ދައުލަތުގެ ހެކިންގެ ހެކިބަސް ނެގުމަށެވެ.

މި އަޑުއެހުން ފައްޓަވަމުން ސޮފްއަތު ވިދާޅުވީ މި މައްސަލާގައި ހިމެނޭ އަލީ ހައިޝަމުގެ ވަކީލު ބަލިވެ އުޅޭތީ އަޑުއެހުމަށް ހާޒިރުވެވެން ނެތްކަން ސިޓީއަކުން އަންގާފައިވާ ކަމަށެވެ. އަދި ހާޒިރު ނުވެވޭ ސަބަބެއްގެ ގޮތުގައި އެ ސިޓީގައި ބުނެފައިވަނީ، ހައިޝަމްއާއި ބައްދަލު ނުވުމާއި ފަޔަށް އަނިޔާއެއްވުމުގެ އިތުރުން ބަލިވެއުޅުމެވެ.

ނަމަވެސް ހައިޝަމްގެ ވަކީލުގެ އެ ސަބަބުތައް ގަބޫލު ކުރެވެން ނެތްކަން ފާހްގަކުރައްވައި ގާޒީ ސޮފްއަތު ވިދާޅުވީ، ވަކީލު ހުށަހަޅާފައިވާ މެޑިކަލް ސެޓިފިކެޓަކީ ކޯޓުގެ ބޭނުމަށް ބޭނުންކުރެވޭނެ ލިއުމެއް ނޫން ކަމަށް އޭގައި ލިޔެފައިވާ ކަމަށެވެ.

މީގެ ކުރިންވެސް މައްސަލައިގެ ޝަރީއަތް ކެންސަލް ކުރަންޖެހުނީ އެހެން ދިފާޢީ ވަކީލެއް ހާޒިރު ނުވެގެންކަން ފާހަގަކުރައްވައި ގާޒީ ވިދާޅުވީ އެފަދައިން ޝައީޢަތުގެ އަޑުއެހުން ކެންސަލް ކުރަންޖެހޭ ނަމަ މައްސަލަ ކުރިއަށް ނުދާނެ ކަމަށެވެ.

"ފަހަރަކު ވަކީލަކު މިގޮތަށް ކޮންމެ ފަހަރަކު ބަލިވެގެން އަޑުއެހުން ކެންސަލް ކުރަން ޖެހޭ ކަމަށްވާ ނަމަ ޝަރީއަތަކަށް އަޑުއެހުން ކުރިއަކަށް ނުގެންދެވޭނެ،" ސޮފްއަތު ވިދާޅުވި އެވެ.

އެއާއެކު ގާޒީ ވަނީ ވަކީލުގެ ސަބަބު ގަބޫލު ކުރެވެން ނެތް ކަމަށް ނިންމައި ޝަރީއަތް ކުރިއަށް ގެންދަވަން ފައްޓަވާފައެވެ. ނަމަވެސް، ޝަރީއަތް ގެންދަން ބޭނުންވަނީ ވަކީލަކާ އެކުކަމަށް ހައިޝަމް ބުނުމުން ދައުލަތުންވެސް ވަނީ ހައިޝަމްގެ ފަރާތުން އެގޮތަށް އެދިފައި ވަނިކޮށް ވަކީލަކާ ނުލައި ހެކިބަސް ނެގުން ކުރިއަށް ގެންދަން އިއުތިރާޒްކޮށްފަ އެވެ.

އެހެންކަމުން ގާޒީ ވަނީ މިއަދުގެ ޝަރީއަތް ނިންމަވާލައްވާފައެވެ.