ބޭރުގެ ސައިޓްތަކުން ކުރާ ވިޔަފާރިން ފީ ނަގާތީ ހުށައެޅި ކުއްލި މައްސަލަ ބޭރުކޮށްލައިފި

ބޭންކް އޮފް މޯލްޑިވްސް (ބީއެމްއެލް) ގެ ޑެބިޓް ކާޑުތައް މެދުވެރިކޮށް ބޭރުގެ ބައެއް ވެބްސައިޓުތަކުން ކުރާ ކޮންމެ ވިޔަފާރިއަކަށް 30 ޕަސެންޓުގެ ފީއެއް ނަގާތީ، ރައްޔިތުންގެ މަޖިލީހަށް ހުށައެޅު ކުއްލި މައްސަލަ ބޭރުކޮށްލައިފިއެވެ.

މިއަދުން ފެށިގެން، ބީއެމްއެލްގެ ޑެބިޓް ކާޑުތަކުން ބޭރުގެ ބައެއް ސައިޓަކުން ކުރާ ވިޔަފާރިއަށް 30 އިންސައްތައާ ހަމައަށް ފީއެއް ނަގާނެކަން އިއުލާން ކުރީ އިއްޔެއެވެ. އެގޮތުން ފީ ނަގާނެ ކަމަށް އިއުލާން ކުރި ސައިޓް ތަކަކީ، ޓީމޫ، ޝީއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭ އެވެ.

މޫގެ އިތުރުން އޭޓީއެމްއިން ރާއްޖޭން ބޭރުގައި ނަގުދު ފައިސާ ނެގޭނެ އަދަދު މަހަކު 125 ޑޮލަރަށް ބަދަލުކޮށް، އޭޓީއެމްއިން ފައިސާ ނެގުމުން ޗާޖްކުރެވޭ އަދަދަކީ 10 ޑޮލަރަށްވެސް ވަނީ ހަދާފައެވެ.

އެކަމާއި ގުޅިގެން ކުއްލި މައްސަލައެއް މިއަދުގެ މަޖިލީހުގެ ޖަލްސާއަށް ހުށަހެޅުއްވީ ކެންދޫ ދާއިރާގެ މެންބަރު މައުރޫފް ޒާކިރުއެވެ.

މައުރޫފް ހުށަހެޅުއްވީ މައްސަލާގައި ވަނީ، ދިވެހިން އާއްމުކޮށް ވިޔަފާރިކުރާ އެފަދަ ސައިޓްތަކުން ފީއެއް ނެގުމަކީ ވަރަށް ގިނަ އާއްމުން ކަންބޮޑުވާ ކަމެއްކަން ފާހަގަކުރައްވާފައެވެ.

އަދި އޭޓީއެމްއިން ރާއްޖޭން ބޭރުގައި ނަގުދު ފައިސާ ނެގޭނެ އަދަދު މަދުކުރުމަކީވެސް ރާއްޖެއިން ބޭރުގައި ދިރިއުޅޭ ދިވެހި ރައްޔިތުންނާއި އެކިއެކި ބޭނުންތަކުގައި ރާއްޖެއިން ބޭރަށް ދަތުރު ކުރާ ރައްޔިތުންނަށް ނުހަނު ބޮޑު ތަކުލީފެއް ކުރިމަތިވާނެ ކަންކަމެއްކަމަށް މައުރޫފް ވިދާޅުވިއެވެ.

މީގެ އިތުރުން، ބޭރު ފައިސާ މާރު ކުރުމާއި ބޭރު ފައިސާއިން މުއާމަލާތް ކުރުމުގެ އުސޫލުތަކަށްވެސް ސަރުކާރުން ކުއްލި ކުއްލިއަށް ބަދަލުތައް ގެންނަކަން ފާހަގަކުރައްވައި މައުރޫފް ވަނީ، މިފަދަ ކަންކަމުގެ ސަބަބުން މުދަލާއި ޚިދުމަތުގެ އަގުތައް އިންތިހާއަށް އުފުލިގެން ދާނެ ކަމަށް ވިދާޅުވެފައެވެ.

"މިކަމުގެ ސަބަބުން މުދަލާއި ހިދުމަތުގެ އަގުތައް އިންތިހާއަށް އުފުލުމާއި ޑޮލަރު ނުލިބުމުގެ ސަބަބުން ބައެއް މުދާ އިމްޕޯޓްކުރުން ވިޔަފާރިވެރިން ހުއްޓާލަންޖެހި ރާއްޖެއިން ގިނަ ބާވަތްތަކެއްގެ އަަސާސީ ތަކެއްޗާއި ކާބޯތަކެތި އިތުރަށް އަގުބޮޑުވުން ނުވަތަ ލިބުން ދަތިވުން ނުވަތަ ބައެއް ތަކެތި ހުސްވުމަކީ އެކަށީގެންވާ ކަމެއް،" ކުއްލި މައްސަލަ ހުށަހަޅުއްވަމުން މެންބަރު މައުރޫފު ވިދާޅުވި އެވެ.

މައްސަލަ ބަލައިގަންނަން ފެންނަ ކަމަށް ފެންނަކަމަށް ވޯޓު ދެއްވީ އެންމެ 11 މެމްބަރުންނެވެ. ބަހުސްކުރަން ނުފެންނަކަމަށް 29 މެމްބަރަކު ވޯޓު ދެއްވިއެވެ.