”އިންތިޚާބުތަކާ ދިމާކޮށް، ޞާލިޙް 1،900 ކުށްވެރިން މިނިވަންކުރި؛ މިސަރުކާރުން އެކަން ނުކުރާނެ“

ކުރީގެ ރައީސް، އިބްރާޙީމް މުޙައްމަދު ޞާލިޙްގެ ވެރިކަމުގައި، އިންތިޚާބު ތަކާ ދިމާކޮށް 1،900 ކުށްވެރިން މިނިވަންކުރެއްވި ކަމަށާ، މި ސަރުކާރުން، ސިޔާސީ ވިސްނުމުގައި އެފަދަ ކަމެއް ނުކުރާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އަތޮޅު ތަކަށް ކުރައްވަމުންދާ ދަތުރުފުޅުގެ ތެރެއިން، ތޮއްޑޫ އަށް ވަޑައިގެން އެ ރަށު ރައްޔިތުންނާއި ބައްދަލު ކުރައްވައި ވާހަކަދައްކަވަމުން ރައީސް ވިދާޅުވީ، ސަރުކާރުން ބޭނުންވަނީ މުޖުތަމަޢުގެ ހަމަޖެހުން ކަމަށެވެ.

އަދި މިދިޔަ ސަރުކާރުގައި އެކިއެކި އިންތިޚާބު ތަކާ ދިމާކޮށް ކުށްވެރިންނަށް މާފުދީ، މިނިވަންކުރިކަމަށާ އޭގެ ސަބަބުން މުޖުތަމައުގައި ނުރައްކާތި ކަންކަން ހިނގާފައިވާ ކަމަށް ވިދާޅުވިއެވެ.

"އަޅުގަނޑުމެންނަށް ފެނިގެންދިޔަ އެކި އިންތިޚާބުތަކާ ދިމާކޮށް ޖަލުތަކުގައި ތިބޭ ކުށްވެރިން އެއްވެސް ވަރެއްގެ ރިހެބްލިޓޭޝަނެއްގެ ތެރެއަށް ނުގޮސް މަގުމައްޗަށް ދޫކޮށްލާތަން [ކުރިން ފެނުނު]. އޭގެ ސަބަބުން ވަރަށް ގިނަ އެކި ކަހަލަ ނުރައްކާތެރި ކަންތައް އަނިޔާވެރި ކަންކަން މަގުމަތީ ހިނގާ،"

ރައީސް މުޢިއްޒު

މިއާއެކު ރައީސް މުއިއްޒު ވިދާޅުވީ، އެ މަނިކުފާނުގެ ވެރިކަމުގައި ކްލެމެންސީއާއި އަދި ރައީސަށް ލިބިދީފައިވާ ބާރުގެ ތެރެއިން އަދަބު ލުއިކޮށްދީގެން ނުވަތަ މާފުދީ މިނިވަންކޮށްފައިވާނީ 86 ކުށްވެރިން ކަމަށެވެ.

އެހެންނަމަވެސް ކުރީ ސަރުކާރުގައި ކޮންމެ އިންތިޚާބަކާ ދިމާކޮށް އެތައް ސަތޭކަ ކުށްވެރިންނެއް ދޫކުރި ކަން ފާހަގަކުރައްވައި އޭގެ ތަފްސީލް އެމަނިކުފާނު ވަނީ ހިއްސާކުރައްވާފައެވެ. އެއީ؛

- ރިޔާސީ އިންތިޚާބާ ދިމާކޮށް 2023 ވަނަ އަހަރު 429 ކުށްވެރިން ދޫކޮށްލި

- 2022 ވަނަ އަހަރު 256 ކުށްވެރިން ދޫކޮށްލި

- ކައުންސިލް އިންތިޚާބާ ދިމާކޮށް 2021 ވަނަ އަހަރު 458 ކުށްވެރިން ދޫކޮށްލި

- 2019 ވަނަ އަހަރު، މަޖިލިސް އިންތިޚާބާ ދިމާކޮށް 762 ކުށްވެރިން ދޫކޮށްލި

މި އަހަރުވެސް އޮތޭ މަޖިލިސް އިންތިޚާބު.. އަޅުގަނޑުމެން އިންތިޚާބާ ދިމާކޮށް ސިޔާސީ ވިސްނުމެއްގައި ބަޔަކު މަގުމައްޗަށް ދުލެއް ނުކުރާނަން.

ރައީސް މުޢިއްޒު

މިއާއެކު ރައީސް މުޢިއްޒު ވަނީ، ޖަލުގައި ތިބޭ މީހުންނަށް ރިހެބްލިޓޭޝަނާއި ސަރުކާރުގެ މަޝްރޫއުތަކުގައި ބައިވެރިވެވޭ ގޮތަށް ކެބިނެޓުން ނިންމާފައިވާކަން ފާހަގަކުރައްވާފައެވެ. އެހެން ކަންކުރުމުން، ގައިދީން ޖަލުން މިނިވަންވާއިރު އެމީހުން ތިބޭނީ ކަންތައްތަކެއް ދަސްވެ، މުޖުތަމައަށް ވެސް ކަންކަން ކޮށްދެވޭ ބައެއްގެ ގޮތުގައި ކަމަށް ރައީސް ވިދާޅުވިއެވެ.

"މި ކަންކަމަށް ހައްލު ގެންނަންޖެހޭނީ މި ގޮތަށް. އޭރުން ދެމެހެއްޓެނިވި ނަތީޖާއެއް ނުކުންނާނީ. ދެމެހެއްޓެނިވި ކަމަކަށް ވާނީ. އަޅުގަނޑުމެން ބޭނުންވަނީ މުޖުތަމައަށް ހަމަޖެހުން އަންނަން. ސިޔާސީ ވިސްނުމެއް އިސްކޮށް ނޫނިއްޔާ ބަދަލު ހިފަން އަޅުގަނޑުމެން ކަންކަމެއް ނުކުރާނަން،"ރައީސް މުޢިއްޒު ވިދާޅުވިއެވެ.