ހާލު ދެރަވެ ސާޢިދަށް އައިސީޔޫގައި ފަރުވާ ދެނީ

ރާއްޖޭގެ ކުޅިވަރު ނޫސްވެރީންގެ ތެރޭގައި ފާހަގަކޮށްލެވޭ އަހްމަދު ސާއިދުގެ ހާލު ދެރަވެ އައިސީޔޫގައި ފަރުވާ ދޭން ފަށައިފި އެވެ.

ސާއިދު އަކީ ދެ ކިޑްނީ ފެއިލްވުމާއި ގުޅިގެން އެކަމަށް ފަރުވާ ހޯދަމުން އަންނަ މީހެކެވެ. ކިޑްނީ ފެއިލްވެފައިވާކަން އެނގުނީ 2018 ވަނަ އަހަރު އެވެ. އޭރު ކިޑްނީގެ ހާލަތު ވަނީ ވަރަށް ބޮޑަށް ގޯސްވެފަ އެވެ.

ދައުލަތުގެ އެހީތެރިކަން ލިބި, ކިޑްނީ ބަދަލުކުރުމުގެ އޮޕަރޭޝަނަށް ފުރަން ތައްޔާރުވަމުންދިޔަ ސާއިދުގެ ހާލަތު ގޯސްވީ މިއަދު ހެނދުނު އެވެ. އަދި ހާލަތު ދަށްވެ މިހާރު ދަނީ އައިޖީއެމްއެޗްގެ އައިސީޔޫގައި ފަރުވާ ހޯދަމުންނެވެ.

އެނގިފައިވާ ގޮތުގައި ކިޑްނީ ޑޯނަަރަކު ހަމަޖެހި އެކަމަށް ހިނގާނެ ހަރަދު ވެސް މުޅީން ހަމަޖެހި މި މަހުގެ 13 ވަނަ ދުވަހު ލަންކާއަށް ފުރަން އޮތީ ހަމަޖެހިފަ އެވެ.

މިދިޔަ އަހަރުތަކުގައި ޑައިލިލީސް ހަދަމުން ވެސް ސާއިދު ގެންދިޔައީ އޭނާގެ ކުޅިވަރު ނޫސްވެރިކަމުގެ ހަޔާތުގައި ކުލަ ޖައްސަމުންނެވެ. ޕީއެސްއެމްގައި އޭނާގެ ދައުރު ބޮޑެވެ. އެ ދައުރު މިދިޔަ އަހަރުތަކުވެސް ފުރިހަމައަށް އަދާ ކުރަމުން ގެންދިޔަ އެވެ.

ސަކަ, މަޖާ މިޒާޖެއްގެ ސާއިދަކީ ކުޅިވަރު ނޫސްވެރީންގެ ތެރެއިން އެންމެ ފާހަގަކޮށްލެވޭ އެއް ކޮމެންޓޭޓަރެވެ. އޭނާގެ ހާލު ދެރަވެ އައިސީޔޫގައި ފަރުވާ ދޭން ފެށުމުން އެތައް ބަޔަކު ގެންދަނީ ހެޔޮ ދުއާގެ މެސެޖުތަކާއި ޝުއޫރުތައް ފާޅުކުރަމުންނެވެ.