އިސްރާއީލާއެކު އަސްކަރީ ގުޅުން ވަރުގަދަކުރުން ހިމަނައި، 1.15 ޓްރިލިއަން ޑޮލަރުގެ އަސްކަރީ ބިލެއް އެމެރިކާއިން ފާސްކޮށްފި

އިސްރާއީލާއެކު އޮންނަ އަސްކަރީ އަދި ޓެކްނޮލޮޖީގެ ގުޅުންތައް އިތުރަށް ފުޅާކުރުން ހިމަނައި، 1.15 ޓްރިލިއަން ޑޮލަރުގެ ބޮޑު އަސްކަރީ ބަޖެޓެއް އެމެރިކާގެ ހައުސް އޮފް ރެޕްރެޒެންޓެޓިވްސް އިން ފާސްކޮށްފިއެވެ.

ރިޕަބްލިކަން ޕާޓީގެ އަޣުލަބިއްޔަތު އޮންނަ ހައުސްއިން ބުދަ ދުވަހު މި ބިލު ފާސްކުރީ ވަރަށް ހަނި ތަފާތަކުންނެވެ. ބިލު ފާސްކުރުމަށް 216 މެންބަރުން ވޯޓު ދިންއިރު، ބިލާ ދެކޮޅަށް 212 މެންބަރުން ވޯޓު ދިނެވެ. މި ވޯޓުގައި ރިޕަބްލިކަން ޕާޓީގެ ހަތް މެންބަރަކު ބިލާ ދެކޮޅަށް ވޯޓު ދިންއިރު، ޑިމޮކްރެޓިކް ޕާޓީގެ ހަ މެންބަރަކު ވަނީ ބިލަށް ތާއީދުކޮށްފައެވެ.

"2027 ނޭޝަނަލް ޑިފެންސް އޮތޮރައިޒޭޝަން އެކްޓް" (NDAA) ގެ ނަމުން ނަންދެވިފައިވާ މި ބިލަކީ ރައީސް ޑޮނަލްޑް ޓްރަމްޕް އެމެރިކާގެ އަސްކަރީ ބަޖެޓު ބޮޑުކުރުމަށް ހުށަހަޅާފައިވާ ހުށަހެޅުމުގެ ބައެކެވެ. މިދިޔަ އަހަރު 900 ބިލިއަން ޑޮލަރުގައި އޮތް ބަޖެޓު 1.5 ޓްރިލިއަން ޑޮލަރަށް ބޮޑުކުރުމަށް ޓްރަމްޕް ބޭނުންވާއިރު، މީގެ މައިގަނޑު ސަބަބަކީ އެމެރިކާއާއި އިސްރާއީލުން ފެބްރުއަރީ މަހުގެ ފަހުކޮޅު އީރާނާ ދެކޮޅަށް ފަށާފައިވާ ހަނގުރާމައަށް ޚަރަދުކުރުމެވެ.

މި ބިލާ ގުޅޭގޮތުން ޚިޔާލުފާޅުކުރަމުން ރިޕަބްލިކަން މެންބަރު ތޯމަސް މާސީ ބުނީ، މި ބިލުގެ ސަބަބުން އެމެރިކާގެ އަސްކަރީ ޓެކްނޮލޮޖީއާއި ސަޕްލައި ޗެއިންތައް އިސްރާއީލުގެ އަސްކަރިއްޔާއާ މަސްހުނިވެގެންދާނެ ކަމަށެވެ. މިއީ ގައުމުގެ މިނިވަންކަމަށް އޮތް "ޚިޔާނާތެއް" ކަމަށް ސިފަކޮށް، ސެނެޓުން މި ބިލު ފާސްނުވުމަށް އޭނާ އުއްމީދުކުރާ ކަމަށް ބުންޏެވެ.

އިސްރާއީލަށް އަސްކަރީ އެހީތެރިކަން ދިނުން ހުއްޓާލުމަށް އެމެރިކާގެ ގިނަ ރައްޔިތުން ގޮވާލަމުންދާ ދަނޑިވަޅެއްގައި، މި ބިލުގެ ދަށުން އިސްރާއީލާއެކު އޮންނަ އަސްކަރީ ގުޅުން އިތުރަށް ވަރުގަދަކުރުމަށް ނިންމުމުން ގިނަ ފާޑުކިޔުންތަކެއް ވަނީ އަމާޒުވެފައެވެ.

ސެނެޓުގައި މި ބިލަށް ބޮޑެތި ހުރަސްތަކެއް ކުރިމަތިވާނެ ކަމަށް ބެލެވެއެވެ. ސެނެޓުގެ މައިނޯރިޓީ ލީޑަރު ޗަކް ޝޫމާ ވަނީ މި ބިލަކީ އީރާނު ހަނގުރާމައަށް ދެވޭ "ހުއްދަ ކަރުދާހެއް" ކަމަށް ބުނެފއެވެ. އަދި ގައުމުގެ އިޖުތިމާއީ ޕްރޮގްރާމްތަކުން ބަޖެޓު އުނިކުރަމުންދާ ދަނޑިވަޅެއްގައި މިހާ ބޮޑު އަދަދެއް އަސްކަރިއްޔާއަށް ހޭދަކުރުމަށް ޑިމޮކްރެޓުން ދެކޮޅު ހަދައެވެ.

މި ބޮޑު ބަޖެޓުގެ ތެރޭގައި ޔޫކްރެއިނަށް ދޭ އެހީގެ އިތުރުން، ވޯޓުލުމުގެ ނިޒާމަށް ހަރުކަށި ބަދަލުތަކެއް ގެނައުމަށް ހުށަހަޅާފައިވާ "ސޭވް އެމެރިކާ އެކްޓް" ވެސް ހިމެނެއެވެ. މިއީ އެމެރިކާގެ އިންތިޚާބުތަކުގައި މަކަރު ހަދާކަމަށް ބުނެ ޓްރަމްޕް ކުރައްވާ ތުހުމަތުތަކާ ގުޅިގެން ގެންނަން އުޅޭ ބަދަލުތަކެކެވެ.