ސޯލާ އެނާޖީއިން މޫދުފެން ޑީސެލިނޭޓް ކުރުމުގެ މަސައްކަތް ކުރާ ފަލަސްޠީނުގެ އަންހެން އިންޖީނިއަރެއްގެ ވާހަކަ!

ހައްދުފަހަނައަޅާފައިވާ އިސްރާއީލްގެ ޔަހޫދީން ފަލަސްތީނުގައި ހިންގަމުންދާ ޤަތުލު ޢާއްމު ތަކާއި، ފަލަސްޠީނުގެ މުސްލިމުންނަށް ކުރަމުންދާ ދަތިތަކާއިއެކު ޣައްޒާގެ މުސްލިމުންނަށް ސާފު ބޯފެން ލިބުމަށް ދިމާވެފައިވާ ދަތިތަކަށް ލުއެއް ހޯދައި ދިނުމަށް ފަލަސްޠީނުގެ އަންހެން އިންޖީނިއަރަކު އިރުގެ އަލިން ހަކަތަ އުފައްދާ، މޫދުގެ ލޮނުފެން ބޯފެނަށް ބަދަލުކުރެވޭ އާލާތެއް އުފައްދައިފިއެވެ.

ފަލަސްޠީނުގެ ޚާން ޔޫނިސްގައި ދިރިއުޅެމުންދާ އިންޖިނިއަރެއް ކަމަށްވާ އީނާސް އަލް-ޣޫލް މި އާލާތް އުފެއްދި ސަބަބާއި ގުޅޭ ގޮތުން އަލްޖަޒީރާއަށް މައުލޫމާތު ދެމުން އޭނާ ބުނީ، އުތުރު ޣައްޒާއިން ފެނުގެ ޚިދުމަތް އެއްކޮށް ކަނޑާލާފައިވާތާ 23 އަށްވުރެ ގިނަ ދުވަސް ވެފައިވާ ކަމަށެވެ.

"މީހުން ގެދޮރުން ނެރެވި، އެމީހުންނަށް ފެން ނުލިބޭ. ޚާއްޞަކޮށް (ޣައްޒާގެ) އުތުރުގައި."އީނާސް ބުނެފައިވެއެވެ.

އެހެންކަމުން، ފެން ލިބެން އޮތް މަގަކީ މޫދު ކަމަށްވާއިރު، މޫދުފެން ސާފު ބޯފެނަށް ބަދަލުކޮށް ބޭނުން ޖެހިފައިވާ މީހުން ނަށް ފެންފޯރުކޮށްދިނުމަކީ މުހިންމު ކަމެއް ކަމުން އެފަދަ އާލާތެއް އުފައްދާފައިވާ ކަމަށް އޭނާ ބުނެފައުވެއެވެ.

މީގެ އިތުރުން، އީނާސް ބުނެފައިވާ ގޮތުގައި އެ އާލާތަކީ އަނެއް ޚާއްޞަ ސިފައަކީ މިއީ ކޮންމެ ތަނަކުންވެސް ފަސޭހައިން ލިބެންހުންނަ ރީސައިކަލްކުރެވޭ ތަކެތި ބޭނުންކޮށްގެން ހަދާފައިވާ އާލާތަކަށް ވުމެވެ.

އެގޮތުން، ލަކުޑި އަދި ބޭނުންކޮށްފައިވާ ނުވަތަ ހަލާކުވެފައިވާ ބިއްލޫރި، ހަން ނުވަތަ ޓާޕޯލިން ފަދަ ތަކެތި ބޭނުންކުރެވިފައިވާ ކަމަށް އޭނާ ބުންޏެވެ.

މީގެ އިތުރުން، އެ އާލާތަކީ 4 މީޓަރުގެ ދިގުމިނުގެ އެއްޗަކަށް ވާއިރު، އެއީ ބޭނުން ކުރަން ފަސޭހަ، އަދި އެއްތަނުން އަނެއް ތަނަށް އުފުލުމަށްވެސް ފަސޭހަ އެއްޗެއް ކަން އީނާސް ފާހަގަކޮށްފައިވެއެވެ.

“މިއިން ލިބޭ ފެނަކީ ތާޒާ ސާފުފެން. އޭގައި އެއްވެސް ލޮނު ކަމެއް ނުހުރޭ. މީތި ބޯހިޔާވަހިކަން ހޯދަމުންދާ ތަންތަނުގައި މި އަންނަނީ ބޭނުން ކުރަމުން” އީނާސް ބުނެފައިވެއެވެ.

ޣައްޒާގެ މުސްލިމުން ބިކަކޮށް ނިކަމެތި ކޮށްލުމަށް ނުރައްކާތެރި ހަތިޔާރުގެ އިތުރުން އެހެން އުކުޅުތައް ވެސް ޔަހޫދީ ފައުޖުން ބޭނުން ކުރަމުންދާއިރު އެއިން އެއް ކަމަކީ, ޣައްޒާއަށް ކާބޯތަކެއްޗާއި ސާފު ބޯފެން އެތެރެ ކުރުން ހުއްޓުވައި, ޣައްޒާގެ މުސްލިމުން ހައިހޫނުގައި ޖެއްސުމެވެ. ޣައްޒާގައި ހާލު ޖައްސާފައިވާ 2.3 މިލިޔަން މީހުންނަށްވުރެ ގިނަ މީހުން ބަނޑުފުރާނަ މުއްތިކުރަން ބޭނުންވާ މިންވަރަށް އެ ސަހަރަށް ކާބޯތަކެތި ނުވައްދާތާ މިހާރު އެތަކެއް މަހެއް ފާއިތުވެއްޖެއެވެ.