އެއްބަސްވުމަކަށް ނާދެވުނަސް އީރާން ހަނގުރާމަ 2-3 ހަފްތާ ތެރޭގައި ނިމިދާނެ: ޓްރަމްޕް

އީރާނާ ދެކޮޅަށް ކުރަމުންދާ ހަނގުރާމަ ކުރިއަށް އޮތް ދެ ހަފްތާ ނުވަތަ ތިން ހަފްތާ ތެރޭގައި އެމެރިކާއިން ހުއްޓާލަފާނެ ކަމަށާއި، ހަނގުރާމަ ނިންމުމަށް އެއްބަސްވުމެއް ބޭނުންނުވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ވައިޓް ހައުސްގައި ނޫސްވެރިންނާ ވާހަކަދައްކަމުން ބުނީ، އީރާނާއެކު ސިޔާސީ ގޮތުން އެއްބަސްވުމަކަށް އައުމަކީ ހަނގުރާމަ ހުއްޓާލުމަށް އޮތް ޝަރުތެއް ނޫން ކަމަށެވެ.

"އީރާނުން އެއްބަސްވުމެއް ހަދާކަށް ނުޖެހޭ. އަހަރެމެން ވަރަށް އަވަހަށް އީރާނު ހަނގުރާމަ ނިންމާލުމަށް މިދަނީ ތައްޔާރުވަމުން،" ޓްރަމްޕް ބުންޏެވެ.

އޭނާ އިތުރަށް ބުނީ އީރާން "އިހުޒަމާނަށް" ސްޓޯން އޭޖް ފޮނުވާލެވިއްޖެ ކަމުގެ އިހުސާސް ކުރެވުމުންނާއި، އެ ގައުމަށް ނިއުކްލިއާ ހަތިޔާރެއް ނުއުފެއްދޭނެކަން ކަށަވަރުވުމުން އެމެރިކާއިން އެގައުމުން ފައިބާނެ ކަމަށެވެ.

ނަމަވެސް އީރާނުން އަބަދުވެސް ބުނަމުންދަނީ އެ ގައުމުގެ ނިއުކްލިއާ މަސައްކަތްތަކަކީ ސުލްހަވެރި ބޭނުންތަކަށް ކުރާ ކަންކަން ކަމަށެވެ. އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އެމެރިކާއާއި އިޒްރޭލުން އީރާނަށް ހަމަލާދޭން ފެށިތާ ފަސް ހަފްތާ ވެފައިވާއިރު، އެމެރިކާއާއެކު އެއްވެސް މަޝްވަރާއެއް ކުރިއަށް ނުދާ ކަމަށެވެ.

ޚާރިޖީ ސިޔާސަތުގެ މާހިރުން ވިދާޅުވާ ގޮތުގައި ޓްރަމްޕްގެ މި ވާހަކަތަކާމެދު ސަމާލުވާންޖެހެއެވެ

. "ކުރިން ބުނީ 4 ދުވަހުން ނިމޭނެ ކަމަށް. ދެން ބުނީ 3 ހަފްތާއިން ނިމޭނެ ކަމަށް. މިހާރު މިބުނަނީ 2-3 ހަފްތާއޭ،" ކުއިންސީ އިންސްޓިޓިއުޓްގެ މާހިރު ޓްރިޓާ ފާސީ ވިދާޅުވިއެވެ.

އޭނާ ސިފަކުރެއްވި ގޮތުގައި އެމެރިކާގެ މި އަމަލުތަކަކީ އިޒްރޭލުން ގެންގުޅޭ "މޯވިންގ ދަ ލޯން“ ސިޔާސަތާ އެއްގޮތް ކަމެކެވެ.

ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ. މިކަމާ ގުޅިގެން ޓްރަމްޕް ވަނީ އެމެރިކާގެ ބައިވެރި ގައުމުތަކަށް، ޚާއްސަކޮށް އިނގިރޭސިވިލާތާއި ފަރަންސޭސިވިލާތަށް ވަރަށް ބޮޑަށް ކިޔާފައެވެ.

"ޓްރުތް ސޯޝަލް" ގައި ކުރި ޕޯސްޓެއްގައި ޓްރަމްޕް ބުނީ، ހަނގުރާމައިގައި އެހީތެރިނުވާ ގައުމުތަކުން "އަމިއްލައަށް ތެޔޮ ހޯދަން" ޖެހޭނެ ކަމަށާއި، އެމެރިކާގެ އެހީއަށް ދެން އުންމީދު ނުކުރުމަށެވެ.

މީގެ އިތުރުން، އިޒްރޭލަށް ހަތިޔާރު ހިފައިގެންދާ ބޯޓުތައް ފަރަންސޭސިވިލާތުގެ ވައިގެ ސަރަހައްދުން ދަތުރުކުރުމުގެ ހުއްދަ ނުދޭތީ އެކަމާވެސް ޓްރަމްޕް ވަނީ ނުރުހުން ފާޅުކޮށްފައެވެ.

މި ދަނޑިވަޅުގައި، ބައިނަލްއަގުވާމީ ޖިނާއީ ކޯޓުން ހަނގުރާމައިގެ ކުށްވެރިއެއްގެ ގޮތުގައި ހޯދަން ބޭނުންވާ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނީ، އީރާން ހަނގުރާމައިގެ މަގްސަދުތައް ހާސިލުކުރުމުގެ ދެބައިކުޅަ އެއްބައި މިހާރު ނިމިފައިވާ ކަމަށެވެ.