ބުރާސްފަތި ދުވަހުން ފެށިގެން ފަލަސްތީނުގައި އަންރުވާ މަނާކުރަނީ

މިހަފްތާގެ ބުރާސްފަތި ދުވަހުން ފެށިގެން ފަލަސްތީނުގެ ރެފިއުޖީންނަށް އެހީވާ އދ ގެ ޖަމިއްޔާއެއް ކަމަށްވާ އަންރުވާ ފަލަސްތީނުގައި މަނާކުރަން ހައްދުފަހަނަ އަޅާފައިވާ އިސްރާއީލުން ނިންމައިފިއެވެ.

މިއީ ފަލަސްތީނުގައި ޔަހޫދީން ހިންގާ އުދުވާންތަކުގައި ހާލުގައި ޖެހޭ ރައްޔިތުންނަށް ތައުލީމާއި ބޭސްފަރުވާ އާއި ކާނާ ފޯރުކޮށްދޭ ޖަމިއްޔާއަށް ވާއިރު، އދ އިން ވެސް ވަނީ ޔަހޫދީންގެ މި ނިންމުމާއި ދެކޮޅު ހަދައި، މިކަމުގެ ސަބަބުން ފަލަސްތީނުގެ ރައްޔިތުން އިތުރު ނިކަމެތިކަމަކަށް ވެއްޓިގެންދާނެކަމަށެ ބުނެފައެވެ.

އެހެންނަމަވެސް، ޔަހޫދީން ވަނީ 48 ގަޑިއިރުގެ ތެރޭގައި އިރުމަތީ ގުދުސް ދޫކޮށް ދިޔުމަށް އަންރުވާއަށް އަމުރުކޮށްފައެވެ. މި އަމުރާއިއެކު، އެ ޖަމިއްޔާގެ މުއައްޒަފުން ވަނީ ތަކެތި ބަންދުކޮށް ޓްރަކްތަކަށް އެޅުމުގެ މަސައްކަތް ފަށާފައެވެ.

އަންރުވާގެ ބަދަލުގައި ފަލަސްތީނަށް އެހީ ފޯރުކޮށްދޭނީ ކޮން ޖަމާއަތެއްކަމެއް ޔަހޫދީ ސަރުކާރުން ހާމަކޮށްފައިނުވާއިރު، އަންރުވާގެ ވެރިޔާ ވަނީ ޔަހޫދީން މި ނިންމުން ބަދަލުކޮށްދިނުމަށް އެދި އދ ގެ ސަލާމަތާއި ބެހޭ މަޖިލީހަށް ވެސް ހުށަހަޅާފައެވެ.