އިސްރާއީލުން ޣައްޒާއަށް ހަމަލާދީ، ކުޑަކުއްޖަކު ޝަހީދުކޮށްލައިފި

އިސްރާއީލުން ޣައްޒާއަށް ހަމަލާދީ، ކުޑަކުއްޖަކު ޝަހީދުކޮށްލައިފިއެވެ.

މި ހަމަލާގައި ޝަހީދުވެފައިވަނީ އުމުރުން 15 އަހަރުގެ އަހްޔަމް އަލް އޮމާރީ ކަމަށް ފަލަސްތީނުގެ ރަސްމީ ނިއުސް އެޖެންސީ "ވާފާ" އިން ވަނީ ރިޕޯޓްކޮށްފައެވެ. އިސްރާއީލު ސިފައިން ދިން ބަޑީގެ ހަމަލާތަކުގައި އެ ކުއްޖާގެ އިތުރުން, އިތުރު މީހަކަށް އެކިވަރުގެ އަނިޔާތައް ލިބިފައިވާ ކަމަށް ވެސް އެ އެޖެންސީން ބުނެ އެވެ.

މި ހާދިސާ ހިނގާފައިވަނީ ޣައްޒާގެ ބައިތު ލާހިޔާގައެވެ. މިއީ އިސްރާއީލާއި ހަމާސްއާ ދެމެދު މިދިޔަ އަހަރުގެ އޮކްޓޯބަރު މަހުގެ 10 ވަނަ ދުވަހު ސުލްހައިގެ އެއްބަސްވުމެއް ގާއިމުކުރި ފަހުން، އެއްބަސްވުމާ ހިލާފަށް ހިނގަމުންދާ ހަމަލާތަކުގެ ތެރެއިން ހިނގި ހާދިސާއެއް ކަމަށް ބައިނަލްއަގުވާމީ މީޑިއާތަކުން ފާހަގަކުރެއެވެ.

އިސްރާއީލު ސިފައިން ބުނެފައިވާ ގޮތުގައި އެ ސަރަހައްދުގައި ހަރަކާތްތެރިވި ހަތިޔާރު އެޅި މީހަކަށް އަމާޒުކޮށް ހަމަލާދީފައިވާނެއެވެ. ނަމަވެސް މި ހާދިސާގައި އާންމުންނާއި ކުޑަކުދިން މަރުވަމުންދާ މައްސަލައިގައި އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ.

ޣައްޒާގެ އެކި ސަރަހައްދުތަކައް އަމާޒުކޮށް އިސްރާއީލުން ދެމުންދާ ހަމަލާތަކުގައި ފާއިތުވި ދުވަސްތަކުގައި ގިނަ އަދަދެއްގެ ބަޔަކު ވަނީ ޝަހީދުވެފަ އެވެ. އޭގެ ތެރޭގައި އެހީދޭ ޖަމިއްޔާތަކުގެ މުވައްޒަފުންނާއި ނޫސްވެރިންވެސް ހިމެނެއެވެ.